Elob ge Jerusalemsa nî hui
1 ǃNoaǂkhai, ǃnoaǂkhai, sas Sionse! Sa ǀgaiba ana re!
Îsa saran âsa ǂgaeǂgā re, sas Jerusalems, ǃanu ǃāse!
ǃGaohe taman tsî ǃanuoǃnân
tsîn ge ǁkhawa sas ǃnâ ǂgâ tide.
2 Tsaraba ǃgubuǁnâǀkhāsen,
î khâimâ ǃkhōsis ǃnâ hâ Jerusalemse!
Khēdega sa ǃaoba xu xore,
ǃkhōsis ǃnâ hâ ǀgôas Sions dise!
3 Nētib ra ǃKhūb Eloba mî xuige: “Xū-i xare-i ama du ge ǁamaxūhe tama hâ tsî du ge ǁkhāti marioǃnâse nî orehe. 4 Gaxu ǁae-i ǃkharu hâses ge ti ǁaesa Egipteb ǃnâ ǃhaokhoese sī ge ǁan tsîn ge Asiriaǁîna ǁîna ǁause gere ǁgâiǀā. 5 ǁNā-amaga nēsi tare-e ta nēpa ra dī, ti ǁaes marioǃnâse ǃkhōsis ǃnâ Babilons ǁga ge ūǃgûhe ǃkhaisa ta ra mûo? tib ge ǃKhūb Eloba ra mî. ǁÎna gere gaoǂam ǂgaeǂgui-aogu ge koasen tsî ǀû tamase ti ǀonsa gere ǀuriǀuri. 6 ǁNā-amagas ge ti ǁaesa ti ǀonsa nî ǂan; ǁnā-amagan ge ǁnā tsēs ai nî ǂan tita a ǁî, nēti ra mî ta ǃkhaisa: ‘Nē ta ge Tita.’ ”
7 Tarekōse i a îsa ǃhommi ai,
ǂkhîba ra ǂhôa sîsabeb,
ǃgâiǂhôasa ra ǀkhī-ūb,
ǃgâiǃōsiba ra ǂhôab,
Sions ǃoa “Sadu Elob ge ra ǂgaeǂgui!” ti ra mîb ǂaira mûsa.
8 ǃGâ re! Sa ǃûi-aogu ge ǃgari domgu âgu ǀkha
ǀhû hâse dâb ǃnâ ra ǂgaiǂui.
ǁÎgu ǂhunuma mûdi ǀkha gu ge
ǃKhūb oahās Sions ǁga hâsa ra mû.
9 Saso Jerusalems hîkākāsa ǃkhaiso,
ǀhû hâse ǃgâiaǂgaob ǃnâ ǂgaiǂui!
ǃKhūb ge ǁîb ǁaesa ǁkhaeǂgao
tsî Jerusalemsa ǃnoraǃnora xuige.
10 ǃKhūb ge ǁaedi hoadi mûǁae
ǁîb ǃanu ǁôaba ge ǂhaiǂhai.
Hoaraga ǃhūbaib ǀkhâuǀamdi
ge sada Elob ǃgâiǃōsiba nî mû.
11 ǃGû, ǃgû, ǁnāpa xu ǂoa!
Tā ǃanuoǃnâ xū-e tsâǀkhā!
ǁÎs ǁaeguba xu ǂoaxa, î du ǃanuǃanusen,
sadu ǃKhūb xapade ra tanido!
12 Sadu ge ǃhaese ǂoa
tsî ǃkhoeni tide xuige.
ǃKhūb sadu aiǃâ nî ǃgû
tsî Israels Elob sado ǃgâb ai nî ǃûi xui-ao.
Tsâ ra ǃgāb
13 ǃKhūb ge ra mî:
“Mû, ti ǃgāb ge nî ǃgâiǃgâ,
ǁîb ge ǀgapiǀgapihe tsî nî ǀgapiǃgôahe .
14 ǂGuin ge ǁîb xa gere burugâ;
ǁîb ge khoe-i xare-i xab mûǃāhe ǁoase ge ī i.
15 ǁNās ǁkhās khamib ge ǂgui ǁaede nî burugâ kai;
gao-aogu ge amdi âga ǁîb ǃoagu nî ǂganam.
Mîbahe tama gu ge hâ ina gu ge nî mû
tsî ǁnâu tama gu ge hâ ina gu ge nî ǁnâuǃā.”
© Khoekhoegowab Elobmîs © Bible Society in Namibia, 2020.
