Aronni ǀkharub
1 ǃKhūb ge Moseb ǃoa ge mî: 2 “Israelǁîna mîba, în disiǀgamǀa ǀkharuga mā tsi, ǀgui ǀkharuba mâ ǂgaeǂgui-aob disiǀgamǀa ǃhaodi dib hoaba xu. Mâ ǂgaeǂgui-aob hoab di ǀonsa ǀkharub ai xoamâi, 3 î Aronni ǀonsa Levib di ǀkharub ai xoa. Mâ ǂgaeǂgui-aob hoab ge ǀkharuba nî hō. 4 ǀKharuga ǃKhūb di Tentommi tawa sī-ū, î ǁîga ǃGaeǀhaos ǂGaes, tita sadu ǀkha ra ǀhaos aiǃâ ǁgui. 5 Tita nî ǁîba ǁhûi aob di ǀkharub ge nî ǁhare. Nē ǀgaub ai ta ge toa tama ǂkhîoǃnâsib Israelǁaes dib, sakho ǃoagu hâba nî ǀû kai.”
6 Moseb ge Israelǁîn ǀkha ge ǃhoa, tsî disiǀgamǀa ǃhaodi di ǂgaeǂgui-aogu hoagu ge mâb hoaba Moseba ǀkharuba ge mā, tsîb ge Aronni tsîna ǁîb di ǀkharuba ǁîgu tawa ge ǁgui. 7 Moseb ge hoaraga ǀkharuga ǃKhūb di Tentommi ǃnâ ǂgâ-ū tsî ǃGaeǀhaos ǂGaes aiǃâ ge ǁgui.
8 Sao ra tsēs aib ge Moseba Tentommi ǃnâ ǂgâ, ob ge Aronni ǀkharub, Levib ǃhaosa gere ǁgauǂuib ge ǁhare ǃkhaisa ge mû. ǁÎs ge ǂnareroga hō, ǁhare tsî ǂûhe ǁkhā amandelǂûde ge ǂnûi-am! 9 Moseb ge hoaraga ǀkharuga ū tsî Israelǁîna ge ǁgau. ǁÎn ge tare-i ge īsa ge mû, tsîb ge mâ ǂgaeǂgui-aob hoaba ǁîb di ǀkharuba ge ū-oa. 10 ǃKhūb ge Moseb ǃoa ge mî: “Aronni ǀkharuba ǃGaeǀhaos ǂGaes aiǃâ ǁgui-oa. Nēs ge khâikhâisenxa Israelǁîn ǃaroma ǃkhâikhoms ase nî ī, ǂkhîoǃnâsiban ga ǀû tama i, on nî ǁō ǃkhaisa.” 11 Moseb ge ǃKhūb ge mîmā bi khami ge dī.
12 Israelǁaes ge Moseb ǃoa ge mî: “Os kom ǁnāsa sida ǀams ti ra ǂâibaseno! 13 Tentommi ǀgūse ga sī khoe-i hoa-i nî ǁōs ka, o da kom sida hoada ǀnai ǁō hâo!”
© Khoekhoegowab Elobmîs © Bible Society in Namibia, 2020.
