ǃKhūb ge a Elo
1 “Xawe nēsi ǃgâ re ti ǃoaba-aots, Jakotse,
Israeltse, tita xa ge ǁhûiǂuihetse!
2 Satsa ge kuru ǃKhūb ge nēti ra mî,
ǁnāb satsa ǁhās ǃnâ ǂnubi tsî ge hui tsiba:
Tā ǃao, ti ǃoaba-aots, Jakotse;
Jesurunts, tita xa ge ǁhûiǂuihetse!
3 “Tita ge ǁgâsa ǃhūb ai ǁgam-e nî dâu kai
tsî ǁgamǃāga ǂnâsa ǃhūb ai.
Sa surib ai ta ge ti gagaba nî ǁhōǂui
tsî ti ǀkhaeba sa ôananôagub ai.
4 ǂHûihai-i khamin ge ǁîna
ǁgam-i ǃnâ mâ ǀgân khami nî ǃīǂoaxa,
ǁgamǃāgu xōǀkhā mâ haidi khami.
5 “ǀGui-i ge ‘ǃKhūb di ta a,’ ti nî mî.
ǀNî-i ge ‘Jakob’ ǀons ǀkha nî ǂgaihe.
ǀNî-i ge ǁî-i ǃommi ai ‘ǃKhūb di,’ ti nî xoa
tsî ‘Israel’ ti hâ ǀonsa nî sîsenū.”
6 Nētib ge ǃKhūb, Israeli di Gao-aob
tsî ǁîb Ore-aob, ǃKhūb Hoaǀgaixaba ra mî:
“Tita ge ǂGurota tsî ǀUnita;
tita xōǀkhā i ge ǀkhara elo-e a ǀkhai.
7 Tari-e tita khami ī-e? A-i ǁnâi aoǁnâ,
a-i ǂanǂan tsî ti aiǃâ ǃgāǃgā.
Tari-e ǀnai ge ī xūn hāsa ge ǂanǂan?
An hā nîse ī xūn xa mîba da.
8 Tā ǃao tamas ka io ǃhuri!
ǀNai ta kha ǁnāsa mîba tsî ǂanǂan du tama hâ?
Sadu ge ti ǃkhō-amaodo!
Ti xōǀkhā ǀkhara elo-e hâ-e?
ǀKhara ǃgareǀui-i a ǀkhai, ǀnî-i xare-e ta ǂan tama.”
ǁGôa-eloǃoabas ra mîǁgaiǁgaihe
9 ǁGôa-eloga ra kurun hoan ge a ǁau tsî ǁîn ra ǃgâiǃgâisenū xūn ge a ǂûtanioǃnâ. ǁÎn ǀhûǀguitimî-aon ge mû tamas ka io ǂan tama hâ. ǁNā-amagan ge nî taotaohe. 10 Tari-e ǁgôa-elo-e ra ǂnubi tamas ka io xū-e harebe tama ī-e ra kuru? 11 ǁÎ-i ǃoaba-aon hoan ge nî taotaohe; ǁîn ǂnubi-aogu hoagu ge khoes ǀguisa i. An hoana ǀhao, an khâimâ; ǁîn ge nî ǃaoǃaohe, ǁîn hoan ge nî taotaohe.
12 ǀUrikuru-aob ge ǁî-e unu tsî ǂnomdi ǃnâ garo, hamerdi ǀkha ǂnauǂhanuǂhanu tsî ǀgaisa ǁôab âb ǀkha ra ǂnauǃgâiǃgâi. ǁÎb ge ra ǃâ tsîb ge ǀgaib âba ra toa; ǁîb ge ǁgâs xa ra ǂkhabu.
13 ǃNaokuru-aob ge tsuriba ra ǂgae, ǁîb ge xoaxurub ǀkha ra ǀnōǁnâ. ǁÎb ge ǃnaoba skafs ǀkha ǂkhanuǂkhanu tsî ǃgupu ǀnō-ūdas ǀkha ra ǀnōǂui. ǁÎb ge ǁnāpa xu khoe-i di īb, khoesi îsasiba ūhâ ība ra ǃgaoǂui, om-i ǃnâ nî mâihese. 14 ǁÎb ge sederhaide ǁhāǁnâ, tamas ka io sipreshais tamas ka io aikehaisa ra ǁhûiǂui; nau haidi ǁaegu kai tsî ǀgaisase nî kaikhâise. ǁÎb ge sederhaisa ge ǃhana tsîb ge ǀnanuba ǁîsa ra ǀomkhâi kai. 15 Khoen ge ǁîsa xu ǀaena ra hō, tsî khau tsî ra ǀgamǀgamsen; ǁîsa xun ge ǀaesa khau tsî pere-e ra am. ǁÎsa xun ge elo-e kuru tsî ra ǀgoreǀî; ǁîsa xun ge ī-e ǃgaoǂui tsî ǁî-i aiǃâ ra ǃhonǁgoa. 16 ǁÎn ge ǃkhare ǃâb ǀkha ǀaesa ra khau; nau ǃkhare ǃâb ǀkhan ge ǁgan-e ra am tsî ra ǁâ. ǁKhātin ge ǁî-i ǀkha ǀgamǀgamsen tsî ra mî: “Ā, ǀgam da go, ǀaesa da go mû!” ti. 17 ǃGau ra ǃâ-i ǀkhan ge elo-e ra kuru, ǁîn ǁgôa-elo-e, tsîn ge ǁî-i aiǃâ ǃhonǁgoa tsî ǁî-e ra ǀgoreǀî. ǁÎn ge ǁî-i ǃoa ǀgore tsî ra mî: “Ore da re, sats a sida elo xuige!”
18 ǁÎn ge a ǀū, tamas ka ion ge a ǁnâuǃā ǁoa; ǁîn ge ǁîn mûde ǂganam xui-ao, în tā mû tsî ǁîn ǁnâuǃāga, în tā ǁnâuǃā. 19 ǁGôa-elo-īkuru-ao-i ge ǁnâuǃā-e ūhâ tama tamas ka io a ǂâiǂgā ǁoa nēti mîsa: “ǃKhare ǃâb ǁîn dib ǀkha ta ge ǀaesa ge khau; ǁîn ǂnomdi ai ta ge pere-e ge am, ǁgan-e am tsî da ge ge ǂû. O ta kha nēsi ǃgau go ǃâb ǀkha ta ge ǁgôa-elo-ī-e ge dībasen. O ta kha nēsi ǁîb aiǃâ nî ǃhonǁgoa?”
20 ǁÎn ge tsaoba ra ǂû; gâre ǂâis ge ǁîna ge ǂgaeǂhapu tsîn ge ǁîna aitsama huisen ǁoa tsî ra mî: “Ti amǀkhāb ǃommi ǃnâ hâ-e ǂhumi xū tama-e?”
ǃKhūb, Kuru-ao tsî Ore-aob
21 “Jakotse, nē xūn xa ǂâi re,
tsî Israeltse, sats a ti ǃgā xui-ao.
Tita ge satsa ge ǂnubi, sats ge a ti ǃgā;
Israeltse, ǀuru tsi ta ge tide.
22 ǃÂus khami ta ge sadu dīsade ge ǃgombē
tsî sadu ǁorena tsamaros khami;
tita ge ge ore du, xuige tita ǃoa oahā.”
23 ǀHomgo ǁnae re, ǃKhūb go ǁîsa dī xuige!
ǃHūbaib ǃgamsitse, ǃauǂgai re!
ǃHomgo, ǃgâiaǂgaob xa ra ǃause hā re,
haiǀgomso, tsî mâ hais ǁîs ǃnâ hâs hoasa!
ǃKhūb ge Jakoba ore xuige,
tsîb ge Israeli ǃnâ nî ǂkhaiǂkhaihe.
24 Nētib ge ǃKhūb sadu Ore-aob
sado ge ǁhās ǃnâ a ǂnubiba ra mî:
“Tita ge ǃKhūta, hoa xūna ge kuru ta,
ǀguri ge ǀhomma khoraǂui ta,
tita ǂûta ge ǃhūbaiba ge khoraǂui ta.
25 ǂHumi-aon saode ta ra sâoǃnâ kai
tsî aimûǀgaru-aona gâre kai,
gā-ain ǀapede dabaǃkhuni
tsî ta ǂans âna ra gâre kai.
26 Tita ge ti ǃoaba-aogu mîde ǁapoǁapo
tsî ti sîsabegu kēbode ra dīǀoaǀoa.
Tita ge Jerusalems ǃoa, ‘ǁÎs ge nî ǁanǃnâhe,’
tsî Judab ǃādi ǃoa, ‘ǁÎdi ge nî omkhâihe,
tsî tita ge ǁîdi hîkākāsa xūn hoana nî ǂnubikhâi’ ti ra mî ta.
27 Tita ge ǃgamsib ǃoa, ‘ǂNâ!
Tita ge sa ǃāga nî ǂnâ kai,’ ti ra mî ta.
28 Tita ge Koresi ǃoa, ‘ǁÎb ge ti ǃûi-aob,
ti ǃâubasens hoasa nî dīǀoaǀoaba,’ ti ge mî ta.
Tita ge Jerusalems ǃoa, ‘ǁÎs ge ǁkhawa nî omkhâihe,’
tsî Tempeli ǃoa, ‘Sa ǃgaoǃgaob ge nî ǁguihe,’ ti ge mî ta.”
© Khoekhoegowab Elobmîs © Bible Society in Namibia, 2020.
