Davidi ge ǁaesa ra ǃgôakhâi
(2 Samuel 24:1-25)1 Satanni ge ǂkhababa Israelǁîn ǂama gere hā-ū ǂgao tsî ǁnā-amaga Davida ge khâikhâiǃnâ, îb ǁaesa ǃgôakhâi. 2 Ob ge Davida Joab tsî ǁaes di ǂamkhoegu tsîga ge mîmā: “Israeli hoaragaba, ǀgui ǀams ǃhūb disa xu nau ǀams kōse ǃgûǃnâǃganu, î ǁaesa ǃgôakhâi, mâtikōn a ǃkhaisa ta ra ǂan ǂgao xuige.”
3 Ob ge Joaba ge ǃeream: “Ab ǃKhūb sa Eloba Israelǁaesa, nēsin kōs xa kaidisi ǃnāde ǂguiǂgui. ǃGôahesa gao-aotse, ǁîn hoan kom a sao. Tare-i ǃaromats kha nē ǃkhaisa ra dī tsîs hoaraga ǁaesa nî ǀhapixa?” 4 Xaweb ge gao-aoba Joabab ge mîmā mîs ai ge mâ. Ob ge Joaba ǃgûǂoa, hoaraga Israela ǃgûǃnâǃganu tsî ǁnās khaoǃgâ Jerusalems ǁga ge oaǀkhī. 5 Joab ge gao-aob Davida ǃgôakhâib ge khoen di ǃgôaba ge mā. Israeli ǃnâ gu ge ǀguimiljun tsî ǀguikaidisiǀoadisi toroǃkhamao kai ǁkhā khoega ge hâ i tsî Judab ǃnâ hakakaidisi tsî hûdisiǀoadisiga. 6 Joab ge gao-aob di mîmās xab ge tsūbahe i xui-ao, Leviǁîn tsî Benjaminǁîn tsîna ǃgôakhâi tama ge i.
7 Elob ge Davidi ge dī dīb ǀkha ge ǂkhîoǃnâ tsî ǁnā-amaga Israela ge ǁkhara. 8 Ob ge Davida Elob ǃoa ge mî: “Nē ta go dī ǃkhais ǀkha ta ge kaise go ǁore. Toxopa ǀûba te re, tsūse ta go dī xuige.”
9 Ob ge ǃKhūba Davidi di mû-aob Gadi ǃoa ge mî: 10 “ǃGû, î Davida sī mîba, ǃnona xūna ta ra ǁgui-aiǃâ bi ǃkhaisa. ǁÎna xub ga ǁhûi xū-i hoa-e ta ge nî dī.”
11 Ob ge Gada nē ǂhôas ǃKhūb disa Davida sī-ūba tsî ge mî: “Mâ-ets ra ǁhûi? 12 ǃNona kurigu di ǃâtsūǀkhāba? ǃNona ǁkhâga sa khākhoen di toroǂnubis aiǃâ ǁhâmasa? ǃNona tsēdi ǁaeb ǃnâb ǃKhūba gôab ǀkha ǁnāǂam tsi tsî ǂhīǁōba sa ǃhūb ǃnâ nî sî, tsîb ǀhomǃgāba ǁōba hoaraga Israeli ǃnâ nî hā-ūsa? Mâti ta ǃKhūba sī nî mîba?”
13 Ob ge Davida Gada ge ǃeream: “Kai ǂōǂōsib ǃnâ ta ge hâ. A ta ǁnâi ǃKhūb ǃomǁae ǁnā, ǁîb ǀkhommi a kai xuige, xawe a ta tā khoen di ǃomǁae ǁnā re.”
14 Ob ge ǃKhūba ǂhīǁōba Israelǁîn ǃnâ ge sîǂgā tsîn ge hûdisiǀoadisi khoena ge ǁō. 15 ǁNās khaoǃgâb ge ǀhomǃgāba Jerusalemsab nî hîkākāse ge sî, xaweb ge ǃKhūba nē ǁkharab ǀkha aiǃgûsa ge ǀû; tsîb ge ǀhomǃgāb, ǁîna ra hîkākāb ǃoa “ǂÂu go, xuige nēsi ǀû” ti ge mî. ǀHomǃgāb ǃKhūb dib ge Araunab, Jebusǁîb di dāǃnâǃkhais tawa ge mâ i.
16 Davidi ge ǀhomǃgāba ǀhommi tsî ǃhūbaib tsîkha ǁaegu ge mûma, Jerusalemsab nî hîkākāseb gôaba ǃomǁae ūhâse. O gu ge Davidi tsî ǁaes di ǂamkhoegu, hoatsama ge ǃoab sarana ana hâ igu hoaga ǃhūb kōse ge ǃhonǁgoa. 17 Tsîb ge Davida ge ǀgore: “Elotse, tita ge ǃûǂam ge ta. Tita ge ǁaes nî ǃgôakhâihesa ge mîmā ta. Nē ǀkhomǀkhomsa khoena tare-en ge dī? ǃKhū ti Elotse, tita tsî ti surib tsîda ǁnâi ǁkhara, î sa ǁaesa sâu re.”
18 Ob ge ǃKhūb di ǀhomǃgāba Gada ge mîba Davidab nî mîmāsa, îb Araunab dāǃnâǃkhais tawa sī ǃKhūba altarsa ǂnubiba. 19 Ob ge Davida ǃKhūb di mîsa ǁnâuǀnam tsî Gadi ge mîba bi khami ge ǃgûǂoa. 20 Araunab tsî ǁîb di haka ǀgôagu tsîgu ge dāǃnâǃkhais ai gu ǃhoroba ra dāǃnâ hîa ǀhomǃgāba ge mû, o gu ge ǀgôaga sī ge gau. 21 Gao-aob Davidi ǁîb ǃoa ra hā ǃkhaisab ge mû, ob ge Araunaba dāǃnâǃkhaisa xu ǂoa tsî gao-aob aiǃâ ǃhūb kōse ge ǃhonǁgoa. 22 Ob ge Davida ǁîb ǃoa ge mî: “Sa dāǃnâǃkhaisa tita ai ǁamaxū re, î ta ǃKhūba ǁîs ai altarsa ǂnubiba, îb ǂhīǁōba toa; ǀoasase ta ge nî matare tsi.”
23 Ob ge Araunaba Davida ǃoa ge mî: “ǃGôahesa gao-aotse, ǁîsa ū, î ǂgaots ra xū-i hoa-e dī re. Nēgu ge gomaga khauǁguibas ǃaroma tsî nēdi ge dāǃnâ-ūkunide ǀaes ǃaroma tsî ǃhoro-e ǂûǁguibas ǃaroma. ǁÎn hoana ta ge ra mā tsi.”
24 Xaweb ge gao-aob Davida ge ǃeream: “Hî-î, ǀoasase ta ge nî matare tsi. Sa xū-e ta ge ǃKhūba ūba tide, matare tama ta hâ xū-e ta ǁîba nî ǁguibase.” 25 Tsîb ge Davida Araunaba ǃnanikaidisi ǃhuniǀuri maride dāǃnâǃkhais ǃaroma ge matare. 26 Tsîb ge ǁnāpa ǃKhūba altarsa ǂnubiba tsî khauǁguibadi tsî ǂkhîbagusǁguibadi tsîna ǁguiba tsî ge ǀgore. Ob ge ǃKhūba ǀaes ǀkha ǀhomma xu ge ǃeream, altars ai hâ ǁguibadeb nî ǂhubise.
27 ǁNās khaoǃgâb ge ǃKhūba ǀhomǃgāba ge mîmā, îb gôab âba ǁkhawa ǂgā-oa, ob ge ǀhomǃgāba ǁnāti ge dī. 28 ǁNās ǃnâ-ub ge Davida, ǃKhūb ge ǀgores âba ǁnâu-am ǃkhaisa ge mû, tsîb ge ǁguibade Araunab dāǃnâǃkhais ai mâ altars ai ge ǁguiba. 29 ǃKhūb di Tentommi, Moseb ge ǃgaroǃhūb ǃnâ kurub tsî khauǁguibadi altars tsîra ge ǁnā ǁaeb ai noxopa Gibeons di ǀgoreǀîǃkhais tawa hâ i, 30 xaweb ge Davida Elobab sī nî ǀgoreǀîse, ǁnāǀî ge ǃgû ǁoa i, ǃKhūb ǀhomǃgāb di gôab xab gere ǃao xui-ao.
© Khoekhoegowab Elobmîs © Bible Society in Namibia, 2020.
