Judab di gao-aob Usiab
(2 Kroniks 26:1-23)1 ǀGamdisihûǀaǁî kurib Israeli gao-aob Jerobeammi ǂgaeǂguis dib ǃnâb ge Amasiab ôab Usiaba ge Judab gao-ao kai. 2 ǁÎb ge disiǃnaniǀa kurixab a hîa ge gao-ao kai tsîb ge korodisiǀgamǀa kuriga Jerusalems ǃnâ ge ǂgaeǂgui. 3 ǁÎb ge ǁîb îb ǁkhāb khami ǃKhūba a ǃgâibana gere dī, 4 xawe di ge ǁgôa-elon ra ǀgoreǀîǃkhaide ge hîkākāhe tama hâ i tsîn ge khoena noxopa khauǁguibadi tsî ǀanǀanǁguibadi tsîna ǁnāpa sī gere ǁguiba. 5 Ob ge ǃKhūba Usiaba ǃomamasis ǀkha ge ǁkhara tsîs ge nē ǃomamasisa ǁîb ûitsēdi hoade ǁîb ai ge hâ i tsîb ge ǀguri hâ oms ǃnâ gere hâ. ǁÎb ôab Jotammi ge ǃhūba gere ǂgaeǂgui.
6 Usiab ge dī xūn hoan ge ǃNaeǃkhaidi ǂKhanis Judab Gao-aogu dis ǃnâ a xoamâisa. 7 Usiab ge ǁō tsî gao-aogu ǀhobadi tawa Davidi ǃĀs ǃnâ ge ǁkhōhe tsîb ge ǁîb ôab Jotamma ǁîb soas ǃnâ ge gao-ao kai.
Israeli di gao-aob Saxariab
8 ǃNonadisiǁkhaisaǀaǁî kurib Judab gao-aob Usiab ǂgaeǂguis dib ǃnâb ge Jerobeammi ôab Saxariaba Israeli gao-ao kai tsî ǃnani ǁkhâga Samarias ǃnâ ge ǂgaeǂgui. 9 ǁÎb ge ǁîb di aiǃgû-aogu ǁkhāgu khami ǃKhūb ǃoagu ge ǁore tsî Nebati ôab, gao-aob Jerobeammi Israela ge ǁoreb ǃnâ ǂgaeǂguiǂgāb di ǂkhaba aiǁgausa gere sao. 10 Jabesi ôab Salummi ge gao-aob Saxariab ǃoagu ǀapeǀhao, ǁîba khoen aiǃâ ǃgam tsî ǁîb soas ǃnâ ge gao-ao kai.
11 Saxariab ge dī xūn hoan ge ǃNaeǃkhaidi ǂKhanis Israeli Gao-aogu dis ǃnâ a xoamâisa.
12 ǁNātis ge ǃKhūb ge gao-aob Jehuba mîba mîmâisa ge dīǀoaǀoahe: “Sa ôananôagub ge hakaǁî surib kōse Israeli ǂama nî gao.”
Israeli di gao-aob Salummi
13 ǃNonadisikhoeseǀaǁî kurib Judab gao-aob Usiab ǂgaeǂguis dib ǃnâb ge Jabesi ôab Salumma Israeli gao-ao kai tsî ǀgui ǁkhâba Samarias ǃnâ ge ǂgaeǂgui.
14 Ob ge Gadi ôab Menahemma Tirsasa xu Samarias ǁga ǃgû tsî Salumma ǃgam tsî ǁîb soas ǃnâ ge gao-ao kai. 15 Salummi ge dī xūn hoan, ǁîb ge dī ǀapeǀhaos tsîna ǃkhōǂgā hân ge ǃNaeǃkhaidi ǂKhanis Israeli Gao-aogu dis ǃnâ a xoamâisa. 16 Menahemmi ge Tirsasa xub garu daob ai ǃās Tapuas tsî ǁîs ǁanǂgāsaben tsî ǁnā ǀkharib di khoen tsîna ge hîkākā, ǁîban ge māǁnâsen tama i amaga. ǁÎb ge ǁkhāti ǀgamǀkhā taradi ǃnāga ge ǃgaoǃā.
Israeli di gao-aob Menahemmi
17 ǃNonadisikhoeseǀaǁî kurib Judab gao-aob Usiab dib ǃnâb ge Gadi ôab Menahemma ge Israeli gao-ao kai, tsîb ge disi kuriga Samarias ǃnâ gere ǂgaeǂgui. 18 ǁÎb ge ǁîb ûitsēdi hoade ǃKhūb ǃoagu ǁore tsî Nebati ôab gao-aob Jerobeammi, Israela ge ǁoreb ǃnâ ǂgaeǂguiǂgāb di ǂkhaba aiǁgausa gere sao. 19 Siriab gao-aob Tiglat-Pileseri ge Israela a ǁnāǂam, ob ge Menahemma ǃnonadisihakaǀa kiloxramgu ǀhaiǀuriba ge mā bi, ǁîb di ǂkhâǃnâs ǀkhab gao-aosis âba nî ǀgaiǀgaise. 20 Menahemmi ge mâ ǃkhūǁîb Israeli dib hoaba korokaidisi tsî hûdisi xramgu ǀhaiǀuribab nî māsa ge ǂgaoǀkhā, îb Siriab gao-aoba matare. Ob ge Siriab gao-aoba ǁîb di ǃhūb ǃoa ǁkhawa ge oa.
21 Menahemmi ge dī xūn hoan ge ǃNaeǃkhaidi ǂKhanis Israeli Gao-aogu dis ǃnâ a xoamâisa. 22 ǁÎb ge ǁō tsî ge ǁkhōhe tsîb ge ǁîb ôab Pekahiaba ǁîba gao-aose ge saoǃgon.
Israeli di gao-aob Pekahiab
23 Korodisiǁî kurib Judab gao-aob Usiab ǂgaeǂguis dib ǃnâb ge Menahemmi ôab Pekahiaba Israeli gao-ao kai tsî ǀgam kurikha Samarias ǃnâ ge ǂgaeǂgui. 24 ǁÎb ge ǃKhūb ǃoagu gere ǁore tsî Nebati ôab gao-aob Jerobeammi Israela ge ǁoreb ǃnâ ǂgaeǂguiǂgāb di ǂkhaba aiǁgausa gere sao. 25 Pekahiab di ǂamkhoeb Pekab, Remaliab ôab ge korodisi khoegu Gileads digu ǀkha ǀapeǀhao tsî Pekahiaba gao-ommi di ǂgō-ommi ǃnâ ǃgam tsî ǁîb soas ǃnâ ge gao-ao kai.
26 Pekahiab ge dī xūn hoan ge ǃNaeǃkhaidi ǂKhanis Israeli Gao-aogu dis ǃnâ a xoamâisa.
Israeli di gao-aob Pekab
27 Korodisiǀgamǀaǁî kurib Judab gao-aob Usiab ǂgaeǂguis dib ǃnâb ge Remaliab ôab Pekaba Israeli gao-ao kai, tsî ǀgamdisi kuriga Samarias ǃnâ gere ǂgaeǂgui. 28 ǁÎb ge ǃKhūb ǃoagu ǁore tsî Nebati ôab, gao-aob Jerobeammi Israela ge ǁoreb ǃnâ ǂgaeǂguiǂgāb di ǂkhaba aiǁgausa gere sao.
29 Gao-aob Pekab di ǂgaeǂguis ǁaeb ǃnâs ge Asiriab gao-aob Tiglat-Pileseri ge Israela ǁnāǂam tsî Ijons, Abel-Bet-Maakas, Janoaxs, Kedes tsî Hasors tsî Gileadi, Galileab tsî Naftalib ǀkharigu tsîna ū tsî khoena ǃkhōsabese ǃgû-ūsa.
30 ǀGamdisiǁî kurib Judab gao-aob Usiab, Jotammi ôab ǂgaeǂguis dib ǃnâb ge Elab ôab Hoseaba, gao-aob Pekab ǃoagu ǀapeǀhao tsî ǁîba ǃgam tsî ǁîb soas ǃnâ ge gao-ao kai. 31 Pekab ge dī xūn hoan ge ǃNaeǃkhaidi ǂKhanis Israeli Gao-aogu dis ǃnâ a xoamâisa.
Judab di gao-aob Jotammi
(2 Kroniks 27:1-9)32 ǀGamǁî kurib Israeli gao-aob Pekab, Remaliab ôab ǂgaeǂguis ǁaeb ǃnâb ge Usiab ôab Jotamma ge Judab gao-ao kai, 33 ǀgamdisikoroǀa kurixab a hîa tsî disiǃnaniǀa kuriga Jerusalems ǃnâ gere ǂgaeǂgui. ǁÎb îs ge Jerusas, Sadoki ôasa. 34 Jotammi ge ǁîb îb Usiab di aiǁgausa sao tsî ǃKhūba a ǃgâibana gere dī, 35 xawe di ge ǁgôa-elon ra ǀgoreǀî-aihe ǃkhaide ge hîkākāhe tama hâ i tsîn ge khoena noxopa khauǁguibadi tsî ǀanǀanǁguibadi tsîna ǁnāpa sī gere ǁguiba. Jotammi ge ǀApasǀkhāb Dao-ams Tempeli disa ge kuru.
36 Jotammi ge dī xūn hoan ge ǃNaeǃkhaidi ǂKhanis Judab Gao-aogu dis ǃnâ a xoamâisa. 37 ǁÎb di ǂgaeǂguis ǁaeb ǃnâs ge ǃKhūb ge ǂguro ǃnāsa Siriab gao-aob Resinni tsî Israeli gao-aob Pekab tsîkha Judaba kha nî ǁnāǂamse sîsa. 38 Jotammi ge ǁō tsî gao-aogu ǀhobadi tawa, Davidi ǃĀs ǃnâ ge ǁkhōhe tsîb ge ǁîb ôab Axasa ǁîb soas ǃnâ ge gao-ao kai.
© Khoekhoegowab Elobmîs © Bible Society in Namibia, 2020.
