ǃGommi ǁaeb di ǀgores
ǁNaeǃnans ǂgaeǂgui-aob ǃoa.
Davidi Psalms
1 ǃKhūtse sa ǃoa ta ge ra ǁhaiǁhâ;
a ta tā taotaohe re.
Sa ǂhanu-aisib ǃnâ sâu te re ti Elotse.
2 Ti ǂgaisa ǁnâu,
îts ǁhaiǁhâǃkhaise ība te.
ǃNorasase sâu
î ǃhaese ore te re.
3 Sats ge tita ǃgareǀui tsî ǁhaiǁhâǃkhaise a ība
xuige sa ǀons ǃaroma
ǂgaeǂgui, î aiǃgûba te re.
4 Khoen tita ǁguiba hâ ǁnoasa xu ūǂui te re,
ti sâuǃkhaits a amaga.
5 Sa ǃommi ǃnâ ta ge ti ǀomsa ra māǁnâ;
sats ǃKhūts, amab di Elots ge go ore te.
6 Tita ge ǂhumi elona ra ǃoabana ǁkhan hâ,
xawe ta ge ǃKhūb ai ra ǂgomaiǂnûi.
7 ǃGâiaǂgao tsî ta ge sa hâhâ ra ǀnammi ǃnâ nî dâ,
ti tsûbats go mû
tsîts ti ǀoms di ǃgomsiga a ǂan xui-ao.
8 Khākhoen ǃomǁaets ge māǁnā te tama i
tsî ti ǂaira hara ǃkhais ai go mâi.
9 ǀKhomxa te re ǃKhūtse, ǃao ta ra xuige;
ti mûs ge ǃoab xa ǂkhabu hâ
ǁkhāti ti ǀoms tsî soros ona.
10 Ti ûiba ta ge ǃoab ǀkha ge hâǃkharu
tsî ti kuriga ǀhâimâinǀoms ǀkha;
ti ǀgaib ge ti ǁoren xa ge ǃnôa
tsî gu ge ǂkhōgu âtaga ge ǂkhabu.
11 Ti khākhoen hoan di ǀauxū kai
tsî ta ge ti ǁanǁare-aon di ǃaoǃaoxū kai.
Ti ǂansabena ta ǃaoǃaoxūse ība
tsîn hoan ǃganni ǃnâ ra mû tena ra ǃkhoeni.
12 ǁŌ hâ khoe-i khami ta ǂgaogu ǃnâ ǀuruhe hâ
tsî ta soa-i hîa khôa hâ-i khami ī.
13 Tupub ǂguin diba ta ra ǁnâu;
ǃaoba hoa ǀkhāgu ai;
tita ǃoagun ra ǀapeǀhaose
ti ûiba nî ūsen ra ǀapeǀhaose.
14 Xawe ta ge sats ai ra ǂgomaiǂnûi ǃKhūtse
tsî ta ge “Sats ge a ti Elo” ti ra mî.
15 Ti ǁaegu ge sa ǃomǁae hâ
xuige khākhoena xu
tsî ǃgôaǃgon te ran ǃomǁaeba xu ore te re.
16 Ais âtsa sa ǃgāta aiǃâ ǂkhai kai re,
î sa hâhâ ra ǀnammi ǃnâ sâu te re.
17 Tā ta taotaohe re ǃKhūtse
satsa ta ra ǂgaiǀî xuige;
An ǂkhaba khoena taotaohe,
an ǁŌhân Hâǃkhaib ǃnâ ǃnōǃnōhe.
18 A gu ǂhumixa amǁgauga ǃgome
ǂhanu-aisib ǃoagu ra ǂhumiga,
ǀgapiǂâixasib tsî ǃgôaoǃnâsib ǀkha.
19 Mâtikōseb a kai sa ǃgâisib
satsa ra ǃaoǃgânats ǁguibēba hâba,
ǁnān saǀî ra ǁhaiǁhânats ge dībaba
khoen ôan aiǃâ.
20 Sa ǀgūhâsib di ǂganǃgâsib ǃnâts ge ǁîna ra sâu
khoen di ǀapeǀhaode xu.
Sats ge ǁîna ra sâu
ǂnoagu ra namde xu.
21 Ab ǃKhūba karehe
ǁîb di hâhâ ra ǀnammab ge tita
ǂōǂōsib ǃnâ ta ge
xāǂgāsa ǃās ǃnâs khami hâ i ǁaeb ǃnâ ǁgau ǃkhais ǃaroma.
22 ǃAob ǃnâ ta ge ge mî:
“Ais âtsa xu ta ge ǃgaoǁnâhe hâ.”
Xawets ge ti ǀgoresa ge ǁnâu
sats ǃoa ta ge ǂgai ǃnubai.
23 Sadu ǁîb di ǃanudo, ǃKhūba ǀnam re,
ǃKhūb ge ǂgomǂgomsana ra sâu,
xaweb ge ǃnāǂamsase ǁnān ǀgapiǂâixana ra ǀkhao.
24 ǀGai, î du ǂgaoxa re
sadu ǃKhūb ai ra ǂgomaiǂnûido!
© Khoekhoegowab Elobmîs © Bible Society in Namibia, 2020.
