Xristub* sada Hui-aob
1 Ti ǂkhari ǀgôarodo, nēna ta ge sado ra xoaba, ǁore du tidese; tsî i ga khoe-e ǁore, o da ge khoeb hîa ǁGûb tawa ra ǂnoaba daba ūhâ; ǁîb ge Jesub Xristub, ǂhanu-aiba. 2 ǁÎb ge a ǂkhîbagu, sada ǁoren ǃaroma tsî sada ǁoren ǀguina tama i tsî ǁkhāti hoaraga ǃhūbaib dina.
3 Tsî da ge nēs ǃnâ a ǂan, ǁîba da ǂan ǃkhaisa, mîmādi âba da ga ǁnâuǀnamo. 4 Tsî i ga khoe-e “Tita ge ǁîba ǂan” ti mî tsî mîmādi âba ǁnâuǀnam tama io, o i ge ǁî-e a ǂhumi-ao tsîb ge amaba ǁî-i ǃnâ a ǀkhai. 5 Xawe ǁnā-i ǁîb mîsa ra ǁnâuǀnam-i ǃnâb ge Elob di ǀnamma dīǀoaǀoasa, tsî da ge ǁnāsa xu a ǂan ǁîb ǃnâ da amase hâ ǃkhaisa. 6 Tsî ǁîb ǃnâ i hâ ti ra mî-i ge ǁî-i tsîna ǁîb gere ûi khami nî ûi.
ǀAsa mîmās
7 ǀNamsabedo, ǀasa mîmā-e ta xoaba du tama, xawe ǀoro mîmās tsoatsoasa xu du ge ūhâ is ǀguis ge. Nē ǀoro mîmās ge mîs hîa du ge ǀnai ǁnâu hâ isa. 8 Xawes ge nēsi ta ra xoaba du mîmāsa a ǀasa, ǁîs amab ge ǁîb ǃnâ tsî ǁkhāti sadu ǃnâ a mûhesa, ǃkhaenab ra ǃgû-ī tsîb ama ǃnâba ǀnai ra ǂkhai xui-ao.
9 Tsî i ga khoe-e ǃnâb ǃnâ i hâ ti mî tsî ǃgâsa-i â-e ǃhuisa, o i ge ǁî-e nēsis kōse ǃkhaenab ǃnâ hâ. 10 ǁNā-i hîa ǁî-i di ǃgâsa-e ǀnam-i ge ǃnâb ǃnâ ra hâ, tsî i ge khoe-e nî ǁoreb ǃnâ ǁnā kai xū-i xare-e ǁî-i ǃnâ a ǀkhai. 11 Xawe ǁî-i di ǃgâsa-e ga ǀnam tama i-i ge ǃkhaenab ǃnâ hâ tsî ǃkhaenab ǃnâ ra ûi tsî-i ge mâǀî-i garu ǃkhaisa a ǀū, ǃkhaenab mûdi â-e ra ǂgī kai xui-ao.
12 ǀGôado, sado ta ge ra xoaba, ǁoren âdu ǁîb ǀons ǃaroma ǀûbahe hâ amaga. 13 ǁGûgo, sago ta ge ra xoaba, ǁîba go tsoatsoasa xu ǂan xui-ao. Tsî ǂkham khoego, sago ta ra xoaba, ǁnāb hîa a ǂKhababa go ge dan xui-ao.
14 ǀGôado, sado ta ge ǁgûba du a ǂan xui-ao ge xoaba. ǁGûgo, sago ta ge ǁîba go tsoatsoasa xu a ǂan xui-ao ge xoaba. ǂKham khoego, sago ta ge ǀgaisa go a tsîs Elob di mîsa sago ǃnâ hâ tsî go ge ǂKhababa dan xui-ao ge xoaba.
15 Tā ǃhūbaib tsî ǁîb ǃnâ hâ xūna ǀnam. ǁNā khoe-i hîa ǃhūbaiba ǀnam-i ǃnâb ǁGûb di ǀnamma ǀkhai xuige. 16 Hoa xūn ǃhūbaib ai hân; sorosa xu hâ turagu, mûdi ra mû tsî turan tsî ǁî-i ūhâxūn di ǂnīsasib; nēn hoan ge ǁGûba xu hâ tama xawe ǃhūbaiba xu hâ. 17 Tsî gu ge ǃhūbaib tsî ǁîb di turaga ra ǃgû-ī, xawe ǁnā-i hîa Elob ǂâisa ra dī-i ge ǀamos kōse ra hâhâ.
Xristub di khākhoeb
18 ǀGôado, ǀams ge a ǀgū! Mîbahe du ge khamib ge Xristub di khākhoeba ǃgoaxa, ǁkhātin ge nēsis tsîna ǂgui khākhoen Xristub dina hâ, ǁîna xu da ǀams ǀgū hâ ǃkhaisa a ǂanna. 19 Sida di taman hâ amagan ge sida xu ge ǂoa, sida xun ga hâ hâ, on ge sida ǀkha ga hâ hâ i. Xawen ge ǁîna sida xu ge ǃgû, sida di taman hâ ǃkhais nî ǃgāsaga.
20 Xawe sadu ge ǃAnuba xu ǀnausa* ūhâ tsî du ge hoado amaba a ǂan. 21 Tsî ta ge sado ge xoaba, amaba du ǀū ǃkhais ose, xawe ǁîba du a ǂan tsî du ǁkhāti ǂhumi-i amab di tama ǃkhaisa ǂan amaga.
22 Tariba kha ǁnâi ǂhumi-aoba, ǁnāb hîa Jesub a Xristu ǃkhaisa ra ǀūxūb ǀguib ose? ǁNāb ge a Xristub di khākhoe, ǁîb hîa ǁGûb tsî ǀGôab hâkha ra ǀūxūba. 23 Khoe-i xare-i ǀGôaba ra ǀūxū-i ge ǁGûba ūhâ tama hâ. ǁNā-i ǀGôaba ra ǁguiǁnâ-i ge ǁkhāti ǁGûba ūhâ.
24 An tsoatsoasa xu du ge ǁnâuna sadu ǃnâ hâ. Tsoatsoasa xu du ge ǁnâun ga sadu ǃnâ hâ, o du ge sadu tsîna ǀGôab tsî ǁGûb ǃnâ nî hâ. 25 Tsîb ge ǁîba nēsa sada ge mîmâiba: ǀAmo ûiba.
26 O ta ge nēna sado ǁnān hîa sado ra ǂgaeǂhapun xa ra xoaba. 27 Xawe sadu ǃnâs ge ǁîba xu du ra ǃkhōǃoa ǀnausa hâ, tsî du ge ǂhâsi-i khoe-i xare-i nî sado ǁkhāǁkhā ǃkhais di-e ūhâ tide. ǁKhā ǀnaus ra sado hoaraga xūna ǁkhāǁkhā tsîs a ama tsî ǂhumi tama xui-ao, î du ǁîb ge ǁkhāǁkhā du khami ǁîb ǃnâ hâhâ.
28 O nēsi ǀgôarodo, ǁîb ǃnâ hâhâ re, î du ǁîb ga ǂhaio ǁkhoaǂgao tsî tā taosib ǃnâ ǁîb ga hā tsēs ai gau. 29 ǁÎb a ǂhanu-aisa du ga ǂan, o du ge ǁkhāti a ǂan ǂhanu-aisiba ra dī-i hoa-i ǁîba xu ǃnae hâ ǃkhaisa.
© Khoekhoegowab Elobmîs © Bible Society in Namibia, 2020.
