Elob ǀkha ǂhanu-ai kaihes
1 Elob ǀkha da ge ǂgoms ǃnâ-u ǂhanu-ai kaihe xui-ao da ge ǂkhîba sada ǃKhūb Jesub Xristub* ǃnâ-u Elob ǀkha ūhâ. 2 ǁÎb ǃnâ-u da ge ǂgoms ǃnâ Elob di ǀkhommi hîa da nēsi mâǃnâba hō xui-ao. Tsî sada ge Elob ǂkhaisib di ǃâubasens ǃnâ ra koasen. 3 Sada ǃgomsigu xa da ge ǁkhāti ra koasen, ǂan da a xui-ao ǃgomsigu ra mâǃkharusa hā-ū 4 tsî mâǃkharusa Elob di mā-amsa. Tsîs ge ǁîb di mā-amsa ǃâubasensa ra hā-ū. 5 Nē ǃâubasens ge taotao tama hâ, Elob di ǀnammi ge ǃAnu Gagab hîab ge sada māb ǃnâ-u ǂgaogu âda ǃnâ ǁhōǂuihe xui-ao.
6 Ganupe da a ǂkhabusa hîab ge Xristuba ǀnai mîǁguisa ǁaeb ai eloxoresan ǃaroma ge ǁō. 7 ǂHanu-ai khoe-i ǃaroma ǁōs ge a ǃgom, xawe ǃgâi khoe-i ǃaroma ǁōsa i ge khoe-e ǀnîsi a māsen ǁkhā. 8 Xaweb ge Eloba ǁîb di ǀnamma sada nēs ǃnâ ra ǁgauǂui, Xristub ge sada ganupe a ǁore-ao hîa ǁōba da ǃkhais ǀkha. 9 ǁÎb ǀaob ǀkha da ge Elob ǀkha ǂhanu-ai kaihe hâ tsî ǁnās ǃgâ-ai ǁîb xa Elob ǁaiba xu nî sâuhe. 10 Khākhoe da a hîa da ge ǁîb Ôab di ǁōb ǃnâ-u Elob ǀkha ge ǂkhîbagu kaihe. Tsî nēsi da Elob ǀkha ǂkhîbagu hâ, o da ge Xristub ûib ǃnâ-u nî orehe. 11 Xawe ǁnās ǀgui tamas, ǁkhāti da ge Elob ǃnâ ra ǃgâiaǂgao, sada ǃKhūb Jesub Xristub hîa da ǁîb ǃnâ-u nēsi ǂkhîbagusa ra ǃkhōǃoab ǃaroma.
Adammi tsî Xristub
12 ǀGui khoeb ǃnâ-ub ge ǁoreba ǃhūbaib ai ge hā tsî ǁoreba xu ǁōba. Tsî ǁnātib ge ǁōba hoaraga khoen ǃnâ ge khoraǂuisen, hoan ge ǁore amaga. 13 ǂHanub nî hâs aiǃâb ge ǁoreba ǀnai ǃhūbaib ai ge hâ i. ǂHanub ge ǀkhai i amagab ge ǁoreba ge ǃgôahe tama hâ i. 14 Xaweb ge ǁōba Adammi ǁaeba xu Moseb dib kōse gere gaoǂam, ǁnān hîa ǁoren ân ǃnâ Adammi ge ǃûǂam khami ge ǃûǂam tama hâ in tsîna.
Adammi ge ǁnāb hîa nî hāb di īsi ge i. 15 Xawe Elob di ǀkhommi ge Adammi di ǁoreb ǀkha a ǀgopeǀnōhe ǁoa. ǀGui khoeb di ǁoreb ǃaroman ge ǂgui khoena ge ǁō, xawe Elob di ǀkhommi tsî ǀkhomxa mās ge ǀgui khoeb, Jesub Xristub ǃnâ-u ǃnāǂamsa ǀkhaeba ǂguina ge mā. 16 Elob di mās tsî ǀgui khoeb di ǁoreb tsîn ǁaegub ge ǃkharagasiba hâ; ǀgui khoeb di ǁoreba xus ge ǀgoraǃgâs ge hāsa, xawe Elob di ǀkhomxa mās ge ǂguina ǁoreba xu ge ǂhanu-ai kai. 17 ǀGui khoeb di ǁoreb ǃaromab ge ǁōba nē ǀgui khoeb ǃnâ-u ge gaosîsen. Mâtikō ǃnāsasen ǁnān ǃnāǂamsasib ǀkhommi tsî ǂhanu-aisib tsîn di māsa ra ǃkhōǃoana ǀgui khoeb, Jesub Xristub ǃnâ-u ûib ǃnâ nî gaosîsen.
18 ǀGui khoeb ǁoreb ǃnâ-un ge hoa khoena ge ǀgoraǃgâhe amaga i ge ǀgui khoeb di ǂhanu-aisib sîsenni ǃnâ-u hoa khoena ǂhanu-aisib di ûiba ge ǃkhōǃoa. 19 ǀGui khoeb di ǁnâuǀnamoǃnâsib ǃaroman ge hoana ǁore-ao kai khamin ge ǀgui khoeb di ǁnâuǀnamxasiba xu hoa khoena Elob ǀkha ge ǂhanu-ai kaihe.
20 ǂHanub di hās ge ǁoreba ge ǂguiǂgui, xawe ǁoreb ge ǀarosen ob ge ǀkhomma ǃnāsase ge ǀarosen. 21 ǁOreb ge ǁōb ǃnâ gaosîsens ǁkhās khamib ge ǀkhomma ǁkhāti ǂhanu-aisib ǃnâ-u ǀamo ûib ǃoa Jesub Xristub sada ǃKhūba ǃnâ a gaosîsen ǁkhā.
© Khoekhoegowab Elobmîs © Bible Society in Namibia, 2020.
