1 Johaneb ge Gesersa xu hā tsî Sendebeub ǀhabe-ū xūna, ǁîb îb Simonna ge mîba. 2 Simonni ge ǁîb kai ǀgôakha, Judab tsî Johaneb hâkha ǂgai tsî ǁîkha ǃoa ge mî: “Tita, ti ǃgâsagu tsî ti îb di ǀaokhoen ge Israelǁaes ǃaroma sige ǂkhamsisa xu nētsēs kōse ge ǃkham tsîn ge hoan xūna ǃgâise ge ǃgûǁnâ. 3 Tita ge nēsisa kaira hâ tsî sakho ge Elob di ǀkhomma xu ǀgaib sakho ǀoasa ûib dib ǃnâ hâ, xuige tita tsî ti ǃgâsab hâkhom soas ǃnâ sada ǁaesa ǃkhamba. Ab ǀhomma xu hâ huib Elob diba sakho ǀkha hâ.”
4 Johaneb ge ǀgamdisiǀoadisi ǁkhāǁkhāǂuisa toroǃkhamaogu tsî hātoroǃkhamaogu tsîna ǁhûi tsî Sendebeub ǃoagu nî torodīse ge dāǁnâ. ǁÎgu ge tsuxuba Modeins ǃnâ hâ 5 tsî sao ra ǃnauǁgoaga ǂgāb ǃnâ ge ǁgôa. ǁNāpa gu ge kai toroǂnubis di hātoroǃkhamaogu tsî ǀnūtoroǃkhamaogu tsîna ge mû, xaweb ge ǃāba nē ǀgam toroǂnubira ǁaegu ge ǁgoe i. 6 Johaneb tsî ǁîb di khoegu tsîn ge ǃkhams ǃaroma ge ǂhomisen. ǁÎb ge ǁîb toroǃkhamaogu ra ǃāba ǃgâusa ǃao ǃkhaisab ge mû, o ǁîb di toroǃkhamaoga ge aiǃgûba tsî gu ge ǁîga ǁîba ge sao. 7 Johaneb ge khākhoen kai ǃgôab di hātoroǃkhamaoga ūhâ xui-ao ǁîb di toroǂnubisa ge ǀgora tsî hātoroǃkhamaoga, ǀnūtoroǃkhamaogu ǁaegu ge hâ kai. 8 Xâiǁnâdi ge ǁnāǂams ǃaroma ge xâihe, tsîb ge Sendebeub tsî ǁîb toroǂnubis tsîna ge danhe tsî gu ge ǁîgu di ǂguiga ge ǃgamhe. Ûiǃgau gegu ge ǁîgu di ǀgaisa hâǃkhaigu, Kedrons tawa hâgu ǃoa ge ǃkhoeni. 9 Judab ge nē torob ǃnâ ge tsuihe, xawe ǁîb ǃgâsab Johaneb ge khākhoega Kedrons, Sendebeub xa ge ǂnubis kōse ge ǃgôaǃgon. 10 Ûiǂoa ge toroǃkhamaogu ge Asotus di ǃhoroǃhanagu ǃnâ ge mâ i ǂgō-omgu kose ge ǃkhoeni, ob ge Johaneba ǃāsa ge ǃkhāǂhubi. ǁNā tsē gu ge ǀgamǀoadisi khākhoetoroǃkhamaoga ge ǃgamhe tsîb ge Johaneba ǃnorasase Judeab ǃoa ge oa.
Simonni tsî ǁîb ôakha di ǃgamhes
11 ǀGapipristeri Simonni ge Abubub ôab Ptolemiba Jerixos ǂgāb ǂama ǂgaeǂgui-aose ge ǁgaumâi. Ptolemib ge 12 Simonni di ǀuiǀgôab ge i xui-ao kaise ge ǃkhū hâ i. 13 ǁÎb ge kaise ge ǃgôasi-ôaxa i tsî hoaraga ǃhūb ǂama gere ǀhonkhoe ǂgao. ǁNā-amagab ge Simonni tsî ǁîb ôakha ǃnariǃgamsa gere ǀapeǀape. 14 Simonni ge ǁîb ôakha, Matatiab tsî Judab tsîkha ǀkha ǀkharib di ǃāde, ǁîdi ǂhâsiga nî mûse ge sari. ǁÎgu ge ǀguikaidisi tsî hûdisihûǀaǁî kurib di disiǀguiǀaǁî ǁkhâb, Sebati ǃnâ Jerixos tawa ge sī. 15 Abubub ôab Ptolemib, hîa Simonni tsî ǁîb ôakha tsîna ǃgamsa gere ǀapeb ge ǁîga, Dok ti gere ǀonǂgaihe ǂkhari, ǀgaisa hâǃkhaib, ǁîb xa ge kuruheb tawa ge ǃkhōǃoa. ǁÎb ge kai ǁâudība ǁîga ge dība, xaweb ge nē ǀgaisa hâǃkhaib ǃnâ khoega ge gaugau hâ i. 16 Simonni tsî ǁîb ôakha ge ǀhoro, o gu ge Ptolemib tsî ǁîb ge gaugau hâ i khoegu tsîna hoaǀkhāǀāgôagu ǀkha ǁâudīb ge hâǃnâ i ommi ǃnâ ǃkhoeǂgâxa tsî Simonni, ǁîb ôakha tsî ǀnîn ǃgān din tsîna ge ǃgam. 17 Nē ǀhôagao dīb ǀkhab ge ǃgâiba, ǂkhabab ǃnâ ge daba.
18 Ptolemib ge ǃnuriba dīb ge xūn xa xoa tsî gao-aoba ge sîba. Nē sîǂkhanis ǃnâb ge toroǃkhamaogab nî hui bi nîse sîbahe tsî ǃhūb tsî ǃādi tsîna māǁnâhe ǃkhaisa ge ǂgan. 19 ǁÎb ge sîǂkhanisa xoa tsî toroǂnubidi ǂgaeǂgui-aoga ǁîb tawa nî ǃamǂgāsense ǁkhauǂui tsî ǁîga ǀhaiǀurib, ǃhuniǀurib tsî ǀkhaexūn tsîna ge mîmâiba. ǁNās khaoǃgâb ge ǀnî khoegu ǁîb diga Johaneba nî ǃgamse Gesers ǃoa 20 tsî nauga Jerusalems tsî Tempelǃhommi tsîna nî gaoǂamse ge sî. 21 Xaweb ge ǀgui khoeba Ptolemib di khoegu aiǃâ Gesers ǃoa aiǃkhoe tsî Johaneba, ǁîb îb tsî ǃgâsakha tsîn ge ǃgamhe ǃkhais tsî Ptolemib ge toroǃkhamaoga ǁîb tsîn nî ǃgamhega sîs tsîna ge mîba. 22 Nē ǂhôas xab ge kaise ge tsâǀkhāhe, xaweb ge ǀnaib ge ǃkhâikhomhe hâ i xui-ao, nē khoegu ǁîba nî ǃgamse ge sîhe hâ iga ǃkhō tsî ge ǃgam.
23 Sîsenxasigu Johaneb digu, ǁîb torogu, ǁîb ge dī ǃgâin, ǂnubiǂgoagu ǁîb ge ǂnubi tsî dītoa gu, ǁîb di sīǃnâdi 24 tsîn hoan ge ǀgapipristeri ǂgaeǂguis ǁaeb di ǃnaeǃkhaidi ǂkhanis ǃnâ a xoamâisa.
© Khoekhoegowab Elobmîs © Bible Society in Namibia, 2020.
