Susannas di îsasib ge ǀgam ǀgoraǃgâ-aokha ra ǂgae
1 Joakim ti ǀon hâ khoeb ge Babilons ǃnâ ge hâ i. 2 ǁÎb ge Hilkiab ôas, Susannas ǀkha ge ǃgame hâ i. Susannas ge kaise îsa tsî eloǃaoǃgâxa khoe ge isa. 3 ǁÎs îra ge ge ǂhanu-ai i tsî ǁîra ôasa Moseb ǂhanub ǃoa ge kaikai. 4 ǁÎs aob, Joakimmi ge kaise ge ǃkhū hâ i, tsîb ge îsa ǃhanaba ǁîb omsa ge ǁgoeǂnami hâ i. ǁÎb ge Babilons di ǀgapiǃgôasa Jodeǁî-ao-i, xui-aon ge Jodeǁîna ǂnûdi ǃaroma ǁnāpa gere ǀhao. 5 Babilons di Jodeǁîn ge ǀgū ǁaeb ǃnâ ǀgamkha, ǁîn di ǂgaeǂgui-aoga xu ǀgoraǃgâ-aose ge ǁhûi hâ i. Nē ǀgam ǀgoraǃgâ-aokha xab ge ǃKhūba nēti ge mî hâ i: “ǂKhabasib ge Babilons ǃnâ hâ, khoena nî ǂgaeǂguise i ǀgoraǃgâ-aogu ǁnāsa dī tama xui-ao.” 6 Nē khoekha ge ǃnāsa ǁaeba Joakimmi oms tawa gere hâ, tsîn ge khoena ǁîn di ǁhōgu nî ǀgoraǃgâhese ǁnāpa gere sī.
7 Tsēkorobe, tsēǃgâǁaeb di ǂûǁaeb ain ga hoa khoena ǂoa, os ge Susannasa ǁnaetib âs ǃoa ǃhanab ǃnâ gere ǃgûma. 8 Nē ǀgoraǃgâ-aokha ge ǁîsa mâ tsēs hoasa ǃhanab ǃnâs gere ǃgûmao, gere ǃkhē tsî hūs xū-i ǁîkha gere ǂâi-i ge ǁîsa ǁgoe-ūsa. 9 ǁÎkha ge ǁnātikōse kha Susannasa tura hâ ǃkhais ǀkha ge ǀgoreǀû, tsî ǁkhāti ǀgoraǃgâ-aosis di ǃereams âkha tsîna ge ǀuru. 10 Hoakha ge Susannasa turab xa ge ǃkhōǃnamihe hâ i, xawe kha tātsēs tsîna, mâti kha ra tsâ ǃkhaisa ge mîbagu tama hâ i, 11 mâ khoeb hoab gere ǁîs ǀkha ǁgoesab ūba hâ turab xa ǃhoasa tao xui-ao. 12 ǁÎkha ge mâ tsēs hoasa ǁîsa ǃhanab ǃnâ ǃâu tsî ǁîsa kha nî mû ǃkhaisa turaxase gere ǁkhore.
ǀGoraǃgâ-aokha ge Susannasa ǂgaeǂhapusa ra dītsâ
13 ǀGuitsē, tsēǃgâǁae kha ge ge mîǀîgu: “Tsēǃgâǂûs ǁaexa i ge go, xuige a khom ǁaru re.” 14 Tsî kha ge hoakha ǃkharaga ǀkhākha-u ge ǃgû. Xawe kha ge nēb, naub xa ǀūse Susannasa nî mûse ge oahā tsî ǃâubasen tamase ǁkhawa ge ǀhao. Ob ge mâb hoaba nauba tare-i ǃaromab go oahā ǃkhaisa ge dîtsoatsoa, xawe kha ge ǀunis ai ǁîkha hoakha ǁgoe-ūgus turab, Susannasa kha ūba hâba ge ǁguiǁnâ. Tsî kha ge ǀguri kha nî mû si ǁaeba ǀhûpe ge mîǀgui. 15-17 ǁÎkha ge ǂhanu ǃēsa Susannasa ǂgaeǂhapus ǃaroma ge ǃâu hâ i.
ǀGuitsēs ge Susannasa ǀgam ǃgāra ǀkha, ǀnais ra dī khami ǃhanab ǃnâ gere ǃgûma. Nē ǀgoraǃgâ-aokha ǁnāpa gaugausen tsî gere ǃkhēkha, ose i ge khoe-i xare-e ǁnāpa ge ǀkhai i. Kaise i ge ge ǀgamsa i tsîs ge ge ǁāsen ǂgao. Os ge ǃgāra ǃoa “ǁĀsen-ū oli-i tsî ǃgâihamxūn tsîna hā-ūba te, î ǃhanab di dao-amde ǃnau-am, î ta ǀguri hâ tsî ǁāsen ǁkhā” ti ge mî. 18 ǃGāra ge danadao-amde ǃnau-am tsî xōǀkhāb dao-ams ǃnâ, ǂganhe ge xūna nî sī ūse ge ǂoa. ǁÎra ge nē khoekha gaugausen kha ge hâ i, xui-ao ge mû tama hâ i.
19 Tsî ǃgāra ge ǂoa, o kha ge nē ǀgoraǃgâ-aokha, gaugausen kha ge hâ i ǃkhaiba xu uriǂoaxa tsî Susannas ǃoa ǃkhoe 20 tsî ǁîs ǃoa ge mî: “ǃHanab di dao-amdi ge ǃnau-amsa tsî khoe-i xare-i ge mû da tide. Sikhom ge sa ǀkha ǁgoes di turab xa go dāhe, xuige ǂhâba khom hâ-e mā khom re. 21 ǂKhās ka, o khom ge ǁnâuǃgâǃkhaib ǃoa ǃgû tsî sa ǃoagu, ǃgāra sîbē tsîs go ǂkham khoeb ǀkha ǁgoe-ūgu ǃkhaisa khom go mû, ti nî ǃkhō-am.”
22 Os ge Susannasa ǀhâimâinǀom tsî ge mî: “ǀNî dao-i ge nēsisa a ǀkhai. Sakho ǃnâ ta ga māsen, o ta ge ǃgamekhôas ǃaroma a ǃgamhe ǁkhā. ǂKhā ta ga xawes tsîna ta ge sakho ǃnuisa xu ǃnora ǁkhā tide. 23 Xawe a ta tita ǃKhūb ǃoagu ta nî ǁores xa, ti ǀhapiosis ǃnâ tsâ.” 24 ǁÎs ge ǃgari dommi ǀkha huib ǃaroma ǃau, o kha ge nē ǀgoraǃgâ-aokha tsîna ǀhapiǂgā-am si rase ge ǃautsoatsoa. 25 ǀGuib ǁîkha dib ge ǃkhoe tsî ǃhanab di dao-amde ge ǁkhowa-am.
26 Oms di sîsenaon ge ǃauban ge ǃhanab ǃnâ ǁnâuo, tare-i go ǁîs ǀkha ī ǃkhaisa nî ǂanǂuise, xōǀkhāb dao-ams ǃnâ-u ge ǂgâ. 27 Tsî ǀgoraǃgâ-aokha ge ǁîkha di ǂhôasa ǃhoa, o gu ge sîsenaona kaise ge tao, ǁnāti ī xū-i xare-i ge aiǃâ Susannas ǃoagu ge mîhe tama hâ i xui-ao.
ǀGoraǃgâ-aokha ge Susannas ǃoagu ra ǃkhō-am
28 Sao ra tsēs ain ge khoena ǂnûsa Joakimmi oms tawa ge ūhâ, tsî kha ge ǀgoraǃgâ-aokha, ǁîkha di mîǁguisa ǂkhaba ǀapes, Susannas nî ǃgamhes disa nî dīǂuise ge ǀkhī. 29 ǁÎkha ge hoaraga khoen ǁnāpa hân aiǃâ, Hilkiab ôas, Susannas, Joakimmi tarasa ge ǂgai kai. ǂGaihes ge 30 os ge ǁgûra, ǀgôan tsî hoaraga ǀaokhoen ǀkha ge ǂgâxa. 31 Susannas ge kaise îsa tsî anusa i tarekhoesa. 32 ǀHāb ǀkhas ge ǃgū-aihe hâ i, xui-ao kha ge nē ǂkhaba khoekha ǁîs ǀhabas nî ūǁnâ-aihe ǃkhaisa ge mîmā, î kha ǀuni ǃnāsa ǁîsa ǃgâise kō ǁkhā. 33 ǁÎs di ǀaokhoen tsî ǁîs ǀkha ge hâ i khoen hoan ge gere ā.
34 O kha ge ǀgoraǃgâ-aokha khoen aiǃâ mâ tsî Susannas danas ai ǁîkha ǃomga ǁgui tsî ǁîs ǃoagu hâ ǀhapiǂgā-amdi ǀkha ge tsoatsoa. 35 ǁÎs ge ās gere, xawe ǃKhūbas ra ǂgomǃgâ xui-ao ǀhommi ǃoa ge kōkhâi. 36 Nē ǀgoraǃgâ-aokha ge sao rase ge ǃkhō-am: “ǃHanab ǃnâ khom ǀguri ra ǃgûma, hîas ge nē khoesa ǁîs ǀgam ǃgāra ǀkha ge ǂgâxa. ǁÎs ge danadao-amde ǃnau-am tsî ǃgāra ge oa kai. 37 Tsîb ge ǂkham khoeb hîa ge ǃhanab ǃnâ gaugausen hâ iba ǁîs tawa sī tsî ǁîsa ge ǁgoe-ū. 38 Sikhom ge ǀgui ǀkhāb ai, ǃhanab di ǁhôas ǃnâ ge hâ i, tsî khom ge ǁîra sorosise ra ǁgoe-ūgu ǃkhaisa khom ge mûo, ǁîra tawa ǃkhoesī 39 tsî ǀhabe ra a hîa ge ǃkhō ra. Sikhom ge khoeba ǃkhōsa ge dītsâ, xaweb ge sikhom xa kaise ge ǀgaisa i. ǁÎb ge ǃkhoe tsî dao-amde ǁkhowa-am tsî ge ǃkhoebē. 40 Sikhom ge khoesa ǃkhōmâi tsî tarib a ǁnāba ǃkhaisa ge dî si, xawes ge ǃeream khom tama ge i. Sikhom ge sikhom ǃkhō-ams a ama ǃkhaisa ra nū.” 41 ǁNā ǀhûhâsib ǃnâ kha ge ǂgaeǂgui-ao tsî ǁkhāti ǀgoraǃgâ-ao i, xui-aon ge khoena ǁîkha ǂgom tsî Susannasa ǁōb ǃoa ge ǀgoraǃgâ.
Danieli ge Susannasa ra huiǂui
42 Susannas ge ǃgari dommi ǀkha ge ǀgore: “ǀAmo Elotse, xū-i xare-i ge sa aiǃâ ǂganǃgâsa tama hâ; sats ge xūn hoana īn nîs aiǃâ a ǂan. 43 Nē ta ge a ǁō nîse, xawets ge ǀhapio ta a tsî nē khoekha ra ǂhumi ǃkhaisa a ǂan. Tare-i ǃaroma ta kha nî ǁō?”
44 ǃKhūb ge ǁîs ǀgoresa ǁnâu 45 tsî ǃgamhes nîses nî ūbēhes aiǃâ, eloǃaoǃgâxa ǂkham khoeb Daniela, ǁîsab nî ǃnoraǃnorase ǁnāǀî ge ǂgaeǂgui. 46 Tsîb ge ǃgari dommi ǀkha ge ǂgaiǂui: “Tita ge nē khoes di ǃgamhes ǃnâ ǃâ ǂgao tama hâ!”
47 Nē ǂnubis khoen ge ǁîb ǃoa dabasen tsî “Tare-ets ra ǂâibasen?” ti ge dî.
48 Ob ge Daniela ǂnubis ǁaegub ǃnâ mâ tsî ge mî: “Israelǁîdo, tare-i ǃaroma du nēti a gâ ǁkhā? Israelǁî khoesa du dîǃnâ-i tsîna dī tamase, nē ama tama ǃkhō-am-i ǃaroma ǁōb ǃoa ra ǀgoraǃgâ? 49 Ab ǁhōba, nē khoekha go ama tama ǀhûǀguisa ǁîs ǃoagu mā xuige, ǁkhawa tsoatsoahe.”
50 Hoaraga ǂnubis ge ǁkhawa ǃnoesase ǁnâuǃgâǃkhaib ǁga ge oa tsî gu ge ǂgaeǂgui-aoga Danieli ǃoa “Elob xats ǂgaeǂgui-aose ǁhûihe hâ ǃkhais ge a mûmûsa, xuige sige ǁaegu hā ǂnû, îts tare-i ǃaromats nē khoekha ra ǂhumi ti ra ǂâi ǃkhaisa mîǃāba ge re” ti ge mî. 51 Ob ge Daniela ǁîgu ǃoa ge mî: “Nē khoekha ǀgora, î ǃnūǃnâguse ūhâ, î ta ǁîkha ǀguiǀguibese dîǃnâ.” 52 Tsî ǂgaeǂgui-aogu ge ǁîkha ǀgoras khaoǃgâb ge Daniela ǂguroba ǂgai tsî ge dî: “Sa kaira ǂkhabadī-aotse, nēsits ge ǀnaits ge dī hâ i ǁoren hoan ǃaroma nî ǃereambasen. 53 Sats ge ǂhumi ǃkhō-amsa ǁnâuǃgâǃkhaib ǃnâ go mā. Tsîts ge ǀhapio-e ǀgoraǃgâ tsî ǀhapixa-e go ǁnāxū, ǃKhūb ra ‘Tā ǀhapio tsî ǂhanu-ai khoe-e ǁōb ǃoa ǀgoraǃgâ’ ti mî hîa. 54 Tsî amasets ga mû hâ nē khoera ge ǁgoe-ūgu ǃkhaisa, o mîba te, mâ hais ǃnaka ra ge ǁgoe i ǃkhaisa?”
Ob ge “ǂkhari hais ǃnaka” ti ge ǃeream.
55 Ob ge Daniela, “Aha! ǁNā ǂhumib ge sa ǁōba nî ǃaroma. Elob di ǀhomǃgāb ge ǀnai sats nî ǀgam ǃâra ǃnâ ǁhāǃāhe ǃkhaisa go mîmāhe,” ti ge mî. 56 ǁNās khaoǃgâb ge ǂguro ǀgoraǃgâ-aoba ǂgaeǂguibēhe tsî ǀgamǁîba Danieli aiǃâ ge hā-ūhe. “Sats ge Jodeǁî tama, xawe a ǀurisa Kanaanǁî” tib ge Daniela ǁîb ǃoa ge mî. “Nē taras di îsasib ge satsa go ǂgaeǂhapu tsî sa turab ge sa ǂâisa ge ǀhôagaoǃnâ. 57 Sakho ge ǁnaeti hâ ǂhâba kho ra xū-i hoa-e Israelǁî tarekhoedi ǀkha hōbesa, ǁîdi ra sakho ǃao xui-ao, xawe nē Jodeǁî tarekhoes ge tātsē sakho māsen tide. 58 Nēsi mîba te re, mâ hais ǃnakats ge ǁîra mûǁgoe ǃkhaisa.”
Ob ge “Aikehais ǃnaka” ti ge ǃeream.
59 Ob ge Daniela “Aha! ǁNā ǂhumib ge sa ǁōba nî ǃaroma. ǃKhūb di ǀhomǃgāb ge hoaǀkhāǀāgôaba ǁîb ǃommi ǃnâ ūhâse ǃâu tsi hâ, ǀgam ǃâra ǃnâb nî ǃgaoǃā tsise. Tsî kho ge sakho hoakho nî hîkākāhe.”
60 On ge hoa khoena ǃau tsî Elob, hîa ǁnān ǁîb ǃnâ ra ǂgomna ra ǃnoraǃnoraba ge koa. 61 Danieli ge nūs ǃnaka kha ge ǂhumi ǃkhaisa ǁgau, xui-aon ge ǁîn hoana, nē ǀgam ǀgoraǃgâ-aokha ǃoagu ge khâimâ. 62 Moseb ǂhanub ge ra mî, ǂhumi ǃkhō-amsa ga mā khoe-i, ǀhapixa khoe-i nî ǃkhōǃoase ī ǁkharab ǁkhāba nî ǃkhōǃoasa. Tsî ǁnā-amaga kha ge nē ǀgam ǀgoraǃgâ-aokha, ǁōb ǁkharaba ge ǁgui-aihe tsîb ge ǀhapio khoes di ûiba ge sâuhe. 63 Susannas di îb Hilkiab, ǁîs di îs, aob Joakimmi tsî ǀaokhoen tsîn ge ǁîs ge ǀhapiose nē ǀhapiǂgā-ams ai a hōheo, Eloba ge koa. 64 ǁNā tsēsa xub ge Daniela ǀgapi ǃgôasiba khoen ǃnâ ge ūhe hâ i.
© Khoekhoegowab Elobmîs © Bible Society in Namibia, 2020.
