Torob xa hâ ǁhapodi
1 Nē ǁaeb ǃnâb ge Antioxub Hakaǁîba Egipteba ǀgamǁî ǃnāsa ge ǁnāǂam. 2 ǁAubexa hakadisi tsēdi ǀgaiban ge hoaraga Jerusalems di khoena ǃhuniǀuri torosarana ana hâ hātoroǃkhamaoga, ai-i ǃnâ ǀhomaib ai gere mû. Nē hātoroǃkhamaogu ge ǁhâigôagu tsî hoaǀkhāǀāgôagu ǀkha ge ǁâtanisen hâ i. 3 ǁÎn ge hoaǀkhāǀāgôaga ǂgaeǂuihe tsî i hoa ǀkhākha xu ǁnāǂamdi tsî ǁnāǂamǃoadi tsîna ra dīhe ǃkhaisa ge mû. ǁKhaukhōde ǂgâugu, ǁhâigôaga ǀapi tsî gu ge ǂāga khāde xu ǂoab ǃnâ gere doe. Hoa ǃkharagaǃnâgu torosaragu tsî ǃhuniǀuri hātomdi ge sores di ǃnâb ǃnâ gere ǂkhai. 4 ǃĀs ǃnâ hâ-i hoa-i ge gere ǀgore, î di nē ǁhapode ǃgâi ǁgauǁgaus ase ī.
Jasonni ge Jerusalemsa ra ǁnāǂam
5 ǂHumi ǃnurib Antioxub ge ǁō ti ra mîb ge khoraǂuihetsoatsoa, ob ge Jasonna ǀoadisis xa ǃnāsa khoega ū tsî ǁnātimîsi Jerusalemsa ge ǁnāǂam. ǃĀs di ǂnubiǂgoagu ai ge mâ i khoega ǁgari-oahe tsîs ge ǃāsa ǁkhâuǁnâhe, ob ge Menelauba ǃnorasasib ǃaroma Tempelǃhommi ǀgūse ge mâ i ǁkhui-ommi ǃoa ge ǃkhoeni. 6 Jasonni tsî ǁîb khoegu tsîn ge ǁnā ǁaeb ai ǀkhomoǃnâse ǁîgu di ǃgâsa Jodeǁîna ǃgams ǀkha ge ǀhabe i. Jasonni ge ǁîb di ǂhunuma khoena ǃgams di ǃgâiǃgâb a kai ǂoaǃnâ ǃkhaisa ge mûǂan tama hâ i. ǁÎb ge ǁîb di ǂhunuma khoen ǃoagub ge hō dansa ǁîb di khākhoenab ge dan khami gere tsâ. 7 Xaweb ge ǂhanuba ūǃkhuni tama ge i. ǀUnis aib ge taosib ǀguiba ǁîb di ǀapesa xu ge hō, tsîb ge ǁkhawa Amonǁîn ǀkharib ǃoa ge ǃkhoeni, 8 tsîb ge ǁîb di ǂkhaba ûiba ǁnāti ge ǀuni. Arabiaǁîn di ǂgaeǂgui-aob Aretab ge ǁîba ǃkhōsis ǃnâ ge ū. ǁÎb ge ǂkhabadī-ao mûhe tsî ǁîb di ǂhunuma khoenab ge ǀapexū xui-ao ge ǃharaxūhe. Mâ khoe-i hoa-i xab ge ǁîba gere ôahe, tsîb ge ǃāsa xu ǃās ǃoa gere ǃkhoeni. ǁÎb ge Egipteb ǃoa 9 tsî ǁnās khaoǃgâ Grikeǃhūb ǃoa, Spartaǁîn hîa ge Jodeǁîn ǀkha ge khoexagu in ǁaegub nî ǁhaiǁhâǃkhai-e hō ǃkhais di ǃâubasens ǀkha ge ǃkhoeni. 10 Jasonni ge ǂgui khoena ǃgam tsî ǁîn di sorode ǁkhōhe tamase gere ǁnāxūǁgui tsî nēsi i ge ǀgui khoe-i tsîna ǁîb ǁōb xa ǃoa tama hâ. ǁÎb ge ǁkhō-e dībahe tama i tsî ǁîb di aboxagu ǀkhas tsîna ǁkhōhe tama ge i.
Antioxub ge Jerusalemsa ra ǁnāǂam
(1 Makabergu 1:20-63)11 Tsî gao-aob Antioxub ge Jerusalems ǃnâ ge īn di ǂhôasab ge hō, o hoaraga Judeab ge ǁnāǁgôa ti ge ǂâi. ǁNā-amagab ge ǁaixa ǀguru-i khami ǁaixa hâse Egipteba xu ge ǃnoe tsî Jerusalemsa ǀgaisa ǁâtanin ǀkha ge ūǂgā. 12 ǁÎb ge ǁîb khoega hō gu ra khoe-i hoa-e gu nî ǀkhomoǃnâse ǂnauǃan tsî ǁîn di omdi ǃnâ sâusen hâna ǃgam ǃkhaisa ge mîmā. 13 ǁÎgu ge ais ai gu ra hō khoe-i hoa-e gere ǃgam, aogu tsî taradi, axagu tsî ǀgôadi tsî ǂkham ǀgôaron tsîn ge gere ǂāhe. 14 ǃNona tsēdi ǁaeb ǃnâs ge Jerusalemsa ǁkhaisadisiǀoadisi khoena ge ǂoaǃnâ: Hakadisiǀoadisin ge ǁnāǂams ǃnâ ge ǁō tsîn ge ǂguina ūhe tsî khobon ase ge ǁamaxūhe.
15 Xaweb ge Antioxuba noxopa ge ǂkhî tama hâ i. ǁNā-amagab ge hoaraga ǃhūbaib ǃnâb ǁîba a ǃanu Tempeli ǃnâ, Menelaub hîa ge ǁîb di ǂgoms tsî khoen tsîna ǀapexūb ǀkha, ǁîb xa ǂgaeǂguihe hâse ge ǂgâ. 16 ǁÎb di ǀurixa tsî ǃanuoǃnâ ǃomgu ǀkhab ge Antioxuba, ǃanu xapan tsî ǀnî gao-aogu ge Tempeli di ǂkhaisib tsî ǃgôasib tsîn nî ǀgapiǀgapihega mā ǀkhaexūna ge ūbē. 17 ǁÎb ge ǁîb di dans xa kaise gere ǃgâiaǂgao tsî ǃKhūb ge ǁîb di ǃanu Tempela, Jerusalems khoen ge ǁore tsîb ge ǁnās xa ǂkhari ǁaero-e ǁaixa xui-ao ǃanuoǃnâ kai ǃkhaisa ge mûǂan tama hâ i. 18 Jerusalems khoen ga ǁnātikō ǂgui ǁorena dī tama hâ, ob ge Antioxuba ǃnoeaǃnauxase ǁkharahe tsî ǁnāti ī gâ dība xu ga ǂkhāhe hâ. ǁÎb ge ǁkhā ǃgomsib Heliodorub, hîa ge gao-aob Seleukub xa ǁuibab nî kōǃgâga sîheb ge tsâb, ǁkhāba ga tsâ hâ. 19 ǃKhūb ge ǁîb khoena ǁîb di Tempeli ǃaroma ǁhûi tama hâ, xaweb ge ǁîb Tempela ǁîb khoen ǃaroma ge ǂnubi. 20 Tempeli ge khoen di tsâgu ǃnâ tsî ǁkhāti ega khoen di ǃgâiǃgâb ǃnâs tsîna ge ǁhao. ǃKhūb ge ǁîba ǁaixab kao nî ǁnāxū tsî ǂkhîb kao ǁkhawa ǂkhaisiba nî mā-oa.
ǀNî ǁnāǂams Jerusalems ai
21 Antioxub ge ǃnanidisiǀgamǀaǀoadisi kiloxramgu ǀhaiǀuriba Tempela xu ū tsî Antioxs ǃoa ge ǃnoe. ǁÎb di ǀgapiǂâixasib ǃnâb ge doe-omgab nî ǂnâsa ǃhūb ai tsî ǁîb toroǂnubisa ǁgammi ai ǃgû kai ti gere ǂâi. 22 ǁÎb ge khoena nî ǃgomsiga ǃaromaba ǂgaeǂgui-aoga ge ǁgaumâi. Jerusalems ǃnâb ge Filipub, Frigiaba xu hâb hîa ge Antioxub xa ǃnāsase ǂkhabaxa iba ge ǁgaumâi. 23 Gerisimǃhommi tawab ge Andronikuba ge ǁgaumâi. ǀAro raseb ge Menelaub, hîa gere ǁîb di horesa Jodeǁîna ǃgâi tamase ûi-ūb, ǂgaeǂgui-aogu ǃgâ-ai ge ǂkhaba iba ge hâ i. Antioxub ge kaise Jodeǁîna ge ǃhuisa i 24 tsî ǁnā-amaga ǀgamdisiǀgamǀaǀoadisi toroǃkhamaoga Misiasa xu Jerusalems ǃoa, Apoloniub ti ǀon hâ ǃkhōdana-aob ǂgaeǂguis ǃnaka ge sî, tsî ǁîba ǃās ǃnâ hâ aorekhoega ǃgam tsîb nî tarekhoedi tsî axagu tsîna khobose ǁamaxū ǃkhaisa ge mîmā. 25 Apoloniub ge ǂkhîb di sîsabe-i khami Jerusalems ǃnâ ge hā. Tsî Sabbattsēs, hoaraga Jodeǁîn nî sâse īs ai ǁîb di toroǂnubis hîa ge ǀgaisase ǁâtanisen hâ is ǀkha ǃāsa xu ge ǂoa. 26 ǃNapetamaseb ge ǁîb khoega, hoa khoen ǃāsa xu ge ǁîgan nî mûse ǂoaxan nî ǃgamhe ǃkhaisa ge mîmā. ǁÎgu ge ǃās ǃnâ ǃkhoeǂgâ tsî kaise ǂgui khoena ge ǃgam.
27 Xawe Judab Makabaeub tsî ǀnî khoese khoegu ge ûiǂoa tsî ǃhomgu ǃnâ ǃkhoeniǂgâ tsî ǁnāpa xamarin khami gere ûi. ǁÎgu ge ǃanuoǃnâ gu tidega ǁnāpa gu gere hō haiǂûn ǀguina gere ǂû.
© Khoekhoegowab Elobmîs © Bible Society in Namibia, 2020.
