Khoe-i ga ǀaesen, o ra dīhe ǀgores
ǁNaeǃnans ǂgaeǂgui-aob ǃoa
Davidi Psalms
1 ǀKhaehen ge hâ ǁnān ǂkhabusana ra kōǀîna,
ǃKhūb ge ǁîna tsūǀkhāb di tsēs ai ra ore.
2 ǃKhūb ge ǁîna ǁkhaeba tsî nî sâu;
ǁîna ǃhūb ǃnâ ǀkhae
tsîb ge ǁîna khākhoen ǃomǁae māǁnâ tide.
3 ǃKhūb ge ǁîna ǀaekharob ân ai hui
tsî ǀaeb âna xu nî ǂgauǂgau.
4 Tita ge “ǃKhūtse ǀkhomxa te re;
ǂgauǂgau te re, sats ǃoagu ta ge ǁore xuige” ti ge mî.
5 Ti khākhoen ge tita xa ǂkhabase ra mî:
“Mâǁaeb kha ǁîba ǁō tsîs ǀons âba nî kā?”
6 ǀKhī tsî ga kō te hā-i hoa-i ge
harebeoǃnâ xūna ra ǃhoa,
ǂgaob â-i mîǁgaiǁgais xa ra ǀoase,
tsî i ge ǂoa tsî nēsa ǃauga sī ra ǂhôa.
7 Hoaraga khākhoen âtan ge ti ǃoagu ra ǀapeǀhao
tsîn ge tsū xun ǀguina tita xa mûnanai tsî ra mî:
8 “Tsū ǀae-ai-i xab ge ǃkhōǃnamihe hâ,
tātsēs tsînab ge nēb ǁgoe ǃkhaisa xu khâi tide.”
9 Ti ǀgū ǀhōsab, ǁîba ta ǂgomǃgâ hâb,
ti pere-e tita ǀkha ra ǀgoragub
tsîn ge ǃnôas âba ti ǃoagu ūkhâi hâ.
10 Xawe sats ǃKhūtsa ǀkhomxa te re;
ūkhâi te, î ta ǁîna māda-am ǁkhā re.
11 Tita ǀkhats ǂkhî ǃkhaisa ta ge a ǂan
ti khākhoen ti ǂama dansa ūhâ tama xui-ao.
12 Ti ǂhanu-aisib ǃnâts ge tita ǀgapise ūhâ
tsî ǀamos kōse sa ǀgūhâsib ǃnâ ra mâi.
13 Koasas ǃKhūb, Israeli Elob di
ǀamosiba xu ǀamosib kōse.
Amen! Amen!© Khoekhoegowab Elobmîs © Bible Society in Namibia, 2020.
