ǀOro hâ sūs
1 Khoeseǁî kurib di disiǁî ǁkhâb di disiǁî tsēs ais ge ǃKhūb di mîsa tita ǃoa ge hā: 2 “Khoenôa ǀgôatse, nētsēs di ǀonsa xoamâi, nē ǂhunuma tsēs disa. Nētsēs ais ge Babilons gao-aob ge Jerusalemsa ǃnamiǂgāsa. 3 Mâǃoaxa ǁaesa ǂkhō-e mîba, îts ǁîna mîba. Nētib ge ǃKhūb Eloba ra mî:
“Sūsa ǀaes ai mâi,
î ǁgam-e ǁîs ǃnâ ǁhō.
4 ǃGâi ǁgan-i ǃâde ǁîs ǃnâ ǂgā,
tîs tsî ǁgarab tsîra,
ǃgâi ǂkhōn ǀkha ǁîsa ǀoaǀoa.
5 ǂOaǂamsa gūna xa ū,
ǀaega ǁîs ǃnaka ǀhaoǀhao.
ǁÎsa ǀgaisase ǀgû kai,
î ǂkhōn tsî ǁgan-i tsîna sâi.”
6 Nētib ge ǃKhūb Eloba ra mî: “Tsūba si ǁnā ǃās ǀaoǂnâxūs disa; ǁnā ǀorotoa hâ sūs ǀurixasib âs ǁîsa xu ǂoa tamasa. Nē ǁgan-i ǃâsa xu naus ǁga ǁîsa xu ūǂui, ôaǂuiǃnâ tamase. 7 ǁÎs ge ǂnâxū ǀaob ge ǁîs ǃnâ hâ; ǁîbas ge ǀkhaiǀkhā ǃhaob ai ge ǂnâxū tsî ǁîba ǃhūb ai ǂnâxū tama hâ, tsarab ǀkhas nî ǁhanaise. 8 Ti ǁaiba ta ge ge khâi kai, ǀkhao ta nîga. Tita ge ǁîs ǀaoba ǀkhaiǀkhā ǃhaob ai ge ǁgui, ǁhanaiheb tidega.”
9 Nētib ge ǃKhūb Eloba ra mî: “Tsūba si ǁnā ǃās ǀaoǂnâxūs disa. Tita ge ǀaena kaise nî ǀhaoǀhao. 10 ǀAena kaise ǀhaoǀhao, î ǀaesa khau; ǁgan-e ǁanǁan î, ǁkhoaǁkhoa-ūxūna ǂgāǃnâ; ǂkhōna ǂhubiǂui. 11 ǁNās khaoǃgâ ǀkhaiǃnâ sūsa ǂnomdi ai mâi, îs ǀgam, îb ǂaib âsa khau, îb ǃanuoǃnâsib âsa ǁîs ǃnâ tsuni, îb ǀgūb âsa ǂhubiǁnâ. 12 ǁAuse ta ge ge ǀhupuǀhupusen, ǁîs di ǀgūb ge ǀaes xas tsîna ǂhubiǁnâhe tide. 13 Sa taotaosa dīgu ge ge ǃanuoǃnâ kai si. Tita ge sasa ge ǃanuǃanutsâ, xawes ge ǃanu tama ge i. ǁNā-amagas ge ǃanuoǃnâsib âsa xu ǃanuǃanuhe tide, ti ǀoasa ǁaiba ta sas ai nî ǁgôaxa kais kōse. 14 Tita ǃKhūta ge go ǃhoa. ǁÎs ge nî ī, tita ge ǁîsa nî dī. Tita ge ǀû tide, tsî ta ge ǀûba tsî ǀkhomxa tide. Tita ge sasa sa tanisens tsî dīga ǃoa nî ǀgoraǃgâ,”
tib ge ǃKhūb Eloba ra mî.Esekieli taras di ǁōb
15 ǃAruǀîs ge ǃKhūb di mîsa tita ǃoa ge hā: 16 “Khoenôa ǀgôatse, mû tita ge kaisets a ǀnam khoesa ǃnapetamase satsa xu nî ūbē, xawe tā ǃgae tamas ka io ā tamas ka io ǁgamron âtsa ǂnâ kai. 17 ǀHaimâinǀom, xawe ǃnōsasib ǃnâ. Tā ǁō hân ǂama ǃgae. Danas âtsa ǀgapa-ai îts ǁharora âtsa ǁharo. Tā amǁgaukha âtsa ǃgū-ai tamas ka io ǃgae-aon ra hā-ūbahe pere-e ǂû.”
18 ǁGoaga ta ge ǁaes ǀkha ge ǃhoa tsî ti taras ge ǃuia ge ǁō. Tsî ta ge sao ra ǁgoaga mîmāhe ta ge khami ge dī. 19 On ge khoena ge dî te: “Mîba dats kha tide tare-en nēts ra dīna sida harebeba hâsa?”
20 O ta ge ǁîn ǃoa ge mî, “ǃKhūb di mîs ge tita ǃoa ge hā: 21 Israeli ommi dina mîba: Nētib ge ǃKhūb Eloba ra mî: Tita ge ti ǃanusiba nî ǃanuoǃnâ kai; sadu ǀgaib di ǂnīsasib, sadu mûdi turab, sadu ǀomdi ǂkhaisiba. Tsî sadu ôagu tsî sadu ôadi tsîn ge gôab xa nî ǃgamhe. 22 O du ge tita ge dī khami nî dī. Tā sadu amǁgauga ǃgū-ai tamas ka io ǃgae-aon di pere-e ǂû. 23 Sadu ǀgapade a di danadi âdu ai hâ tsî ǁharodi âdo ǂaira âdu ai, tā ǃgae tamas ka io ā. Sadu ǂhanuoǃnâsigu xa du ge nî dītoahe tsî ǁîǃnāpe nî ǃgae-aigu. 24 Esekieli ge aiǁgause nî ība du; ǁîb ge dī khami du ge sadu tsîna nî dī. Nēs ga ī, o du ge tita a ǃKhū Elo ǃkhaisa nî ǂan.”
25 “Tsî satsa khoenôa ǀgôatse, ǁîn di ǁhaiǁhâǃkhaib, ǁîn dâb tsî ǂkhaisib, ǁîn ǃgâiaǂgaob tsî ǀoms di turab, tsî ǁîn ôagu tsî ǁîn ôadi tsîna ta ga ǁîna xu ūbē, 26 tsēs aib ge ǃhūsabeba sats ǃoa nî hā, nē ǂhôa-eb nî ǂanǂan tsise. 27 ǁNātsēts ge ǁkhawa nî ǃhoa ǁkhā tsîts ge ǃhūsabeb ǀkha nî ǃhoa tsî ǃaruǀî ǃnō tide. ǁNātits ge ǁîna aiǁgause nî ība tsîn ge tita a ǃKhū ǃkhaisa nî ǂan.”
© Khoekhoegowab Elobmîs © Bible Society in Namibia, 2020.
