ǀHomǃgāb Rafaeli
1 ǃGameǁâudīb ge toa, ob ge Tobita ǁîb ôab Tobiaba ǂgai tsî ge mîba: “Ti ôatse, sa ǃgûǁnū-aoba mataresa ǂâis ǃnâ ūhâ, î ǁîba ǀaromarisa māsa tā ǀuru.”
2 Ob ge Tobiaba ǁîba ge dî: “Ti îtse, mâtikō mataresa ta ga mā bi, tits ra ǂâi? Tita ge ǁîkhom ge hā-ū xūn di ǃkhare ǃâba ta ga mā bi, ti ra ǂâi. 3 ǁÎb ge tita ǃnorasa tsî ǂuruse ge oaǀkhī-ū. ǁÎb ge tita ǀkha, mari-eb Gabaeli tawa sī nî ūba tese ge ǃgû. ǁÎb ge ti tarasa ǂkhaba gagaba xu huiǂui tsî sa ǂgīsiba ge ǂuruǂuru. Mâtikō ǀaromarisa ta nî mā bi?”
4 Ob ge Tobita “Sakho ge hā-ū xūn di ǃkhareba mā bi, ǁîb ǁnāsa ǃoaǂui hâ xuige” ti ge ǃeream.
5 Tsîb ge Tobiaba Rafaela ǂgai tsî ǁîb ǃoa ge mî: “Nēn ge sakhom go hā-ū xūn di ǃkhare ǃâb xūna hâba tsi. Sats ge ǁîna ǃoaǂui hâ. Nēsi ǃnorasase ǁaru re.” 6 Ob ge Rafaela ǁîkha ǀgui ǀkhāb ǁga ǂgai tsî ge mî: “Eloba koa, î mâ khoe-i hoa-e ǁîb ge dība kho ǃgâin xa mîba, în ǁîn tsîna ǁîba ǃgôasiba mā tsî ǁîba koaǁnaeba. A i mâ khoe-i hoa-e, tare-eb ge Eloba dī ǃkhaisa ǂan. Tā tātsēs tsîna ǁîba koaǀû.
7 “Gao-aob di ǂganǃgâsiba sâusase ūhâs ge a ǃgâi, xawe Elob ra dīn ge mâ ǃkhai-i hoa-i ai nî ǃhoahe, îb ǁîba koahe tsî ǃgôasiba māhe ǁkhā.
“ǃGâisets ga dī, o i ge tsū xū-e sats ǀkha ī tide.
8 “ǀGore tsî ǂûtama* hâs ge a ǃgâi, xawe ǀgâsana huis tsî ǂhanu-aisib tsîn ge hoan ǃgâ-ai a ǃgâi. ǀGâsana māsenxase mās tsî ǂhanu-aisib tsîn ge ǃkhū tsî xawe ǂhanuoǃnâs ǃgâ-ai a ǃgâi. ǀGâsana mās ge ǃhuniǀuriba ǀhaoǀhaobasens ǃgâ-ai a ǃgâi. 9 ǁNāti ī māǂgaoxasib ge ǁōba xu sâu tsi tsî sa ǁoren hoana nî ǁābē. ǁNān hîa ǀgâsana ra mān ge ǀoasa ûiba nî ûi, 10 xawe ǁnān hîa ǁoreb tsî ǂkhabab ǃnâ ra ûin ge ǂkhôab ǀguiba ǁî-aitsama ǁîn ai ra hā-ū.
11 “ǀNai ta ge ge mîba du gao-aob ǂganǃgâsib nî sâusase nî ūhâhe, xawen Elob ra dīna mâ khoe-i hoa-e nî ǃhoabahesa. Nēsi ta ge xū-e ǃkhō-oa tamase ǀoasa amaba sado nî ǂhaiǂhaiba. 12 Tobit, sats tsî Saras tsîro gere Elob ǃoa ǀgore, o ta ge tita saro ǀgorede Elob ǂkhaisa hâǃkhaib ǃnâ gere sī-ū. ǁŌ hânats gere ǁkhō, o ta ge ǁnās ǁkhāsa gere dī. 13 Sats ge ǂû-i âtsa ǂû tamase tāba xu, ǁō hâ-ets nî ǁkhōse khâi tsēs aib ge Eloba satsa ta nî ǃâitsâse ge sî te. 14 ǁKhātib ge satsa ǂuruǂuru tsîb sa ǀuiǀgôas, Sarasa ǁîs ǃgomsiga xu nî huiǂuise ge sî te. 15 Tita ge Rafaelta, hû ǃanu ǀhomǃgāgu, Elob di ǂkhaisa hâǃkhaib ǃnâ ǁîba nî ǃoabase mâgu di ǀgui ta.”
16 Tobiti tsî Tobiab tsîkha ge ǃaob xa ra ǀkhūse ǃhūb ai ge ǁnāǁgoe. 17 Xaweb ge Rafaela ǁîkha ǃoa ge mî: “Tā ǃao, hoan a ǃgâi xuige. Eloba koasa hoaǁae ǂâis ǃnâ ūhâ re. 18 ǁÎb ge hā tsî ta nî hui du ǃkhaisa ge ǂhâba. Hoan ge Elob di ǂâisa xu ī, xui-ao kho ge xū-e surude tama hâ. Ûi kho hâs kōse Eloba koatsanade ǁnaeba re. 19 Tita ra ǂû tits ge mûts geo gere ǂâi, xawe ta ge amase xū-i xare-e ge ǂû tama hâ i; ǂû ta ra khami ǀgui i ge gere mûsen. 20 Nē ǃhūbaib ai kho hâs kōse kho ge ǃKhūb Eloba koa tsî nî gangan. Tita ge nēsi ǁîb sî te geb ǁga ra oa. Sats ǀkha ge ī xūn hoana xoamâi re.”
21 ǁNās khaoǃgâb ge Rafaela ǀhommi ǃoa ge bē. Tobiti tsî Tobiab tsîkha ge khâimâ kha ge, xawe ǃaruǀî mû bi tama ge i. 22 ǁÎkha ge koatsanade ǁnaetsoatsoa tsî Eloba ǁîb kai dīgu, ǁîb ǀhomǃgāb Rafaeli ǁîkha ǀkha hâ, hîab ge dīgu ǂama ge gangan.
© Khoekhoegowab Elobmîs © Bible Society in Namibia, 2020.
