Tempeli di ǂnubihes ǃaroma hâ aiǂhomisendi
(1 Gao-aogu 5:1-18)1 Gao-aob Salomob ge ge mîǀgui, Tempeli, ǁîb ǃnâb ǃKhūba nî ǀgoreǀîhebab nî ǂnubisa, tsîb ǁkhāti ǁîb tsîna gao-omma nî ombasensa. 2 Salomob ge hûdisiǀoadisi tani-aogu tsî ǁkhaisadisiǀoadisi ǀuiǁhā-aogu tsîga nē sîsenna ge dī kai. ǃNonaǀoadisi tsî ǃnanikaidisi ǂamkhoegu ge nē sîsenna mûǂams ǁgui-aisa ge ūhâ i.
3 Salomob ge gao-aob Hirammi, Tirus diba ge haisiba: “Ti îb gao-aob Davidi ǀkha sîsenǀhao, tsîts ge gao-ommab gere om ǁaeb ai sederhaiga ǁîb ai gere ǁamaxū khami tita tsîn ǀkha sîsenǀhao re. 4 Tita ge Tempela ǃKhūb ti Elob di ǃgôasib ǃaroma ra ǂnubi. ǁNāb ge ǃanu ǃkhaib, ǁîb tawa da tita tsî ti ǁaes tsîda ǁîba nî ǀgoreǀîba, ǀanǀanǁguibade ǁguibas ǀkha. ǁNāpa da ge khaihesa perega ǀamose ǁîba nî ǁguiba. ǁKhāti da ge khauǁguibade mâ ǁgoas tsî ǃuis, Sabattsēdi, ǀAsa ǁKhâb Kaitsēdi tsî nau ǃanu tsēdi ai ǃKhūb sida Eloba nî ǁguiba. ǁÎb ge Israela ge mîmā, îb nēsa ǀamos kōse dī. 5 Kai Tempela ta ge ra ǂnubi ǂgao, sida Elob nau elogu hoagu xa a kai xui-ao. 6 Khoe-i xare-i ge amase Eloba Tempel-e a ǂnubiba ǁoa, ǀhommi di kaisib xaweb ǁîba a ǃkhōǂgā ǁoa xui-ao. Mâti ta kha ǁnâi tita Tempel-i, ǀanǀanǁguibade Eloba dības ǀguis di-e a ǂnubi ǁkhā? 7 O ǁnâi ǃomsîsenni ǂansa ūhâ aoba sîba te re, ǃhuniǀurib, ǀhaiǀurib, brons-i tsî ǀurin tsî ǂhoa, ǂhoaǀapa tsî ǀapa ǃkhain tsîn ǀkha sîsens ǂansa ūhâba. ǁÎb ge ǃomsîsenni ǂansa ūhâ aogu, Judab tsî Jerusalems tsîra digu, ti îb Davidi ge ǁhûiǂuigu ǀkha nî sîsen. 8 Mâtikō ǂansa gu sa haiǁhā-aoga ūhâsa ta ge a ǂan, xuige sederhain, denehain tsî jeneperhain, Libanonni din xa sîba te re. Ti sîsenaoga ta ge nî sî, î gu sa sîsenaogu ǀkha sîsenǀhao, 9 î gu kaise ǂgui haina aiǂhomi, nē Tempeli hîa ta nî ǂnubib kaise kai tsî nî ǂoaǂamsa xui-ao. 10 Sa sîsenaoga ta ge sao ra ǂûna nî sîba: ǀGamǀoadisi tongu ǃhorob, ǀgamǀoadisi tongu gerstǃhorob, hakakaidisiǀoadisi litergu ǂauxûib tsî hakakaidisiǀoadisi litergu ǀkhera-oli-i tsîna.”
11 Ob ge gao-aob Hiramma sîǂkhani-i ǃnâ Salomoba nēti ge ǃeream: “ǃKhūb ge ǁîb di ǁaesab a ǀnam amaga, satsa ǁîn ǂama gao-aose ge mâi. 12 ǃKhūb, Israeli di Elob, ǀhommi tsî ǃhūbaib tsîkha di Kuru-aoba koa re. ǁÎb ge gao-aob Davida gā-ai ǀgôaba ge mā, gā-aisib tsî ǂans tsîra ūhâb, nēsi ǃKhūba Tempela ra ǂnubiba ǂgaob tsî gao-omma ra ombasen ǂgaoba. 13 Gā-ai tsî ǃomsîsenni ǂansa ūhâ aob, Hiram ti ǀon hâba ta ge ra sîba tsi. 14 ǁÎb îs ge Danni ǃhaosa xu ge hâ i tsî ǁîb îb ge ge Tirus di i. ǁÎb ge ǃhuniǀurib, ǀhaiǀurib, brons-i, ǀurin, ǀuidi tsî hain ǀkha xūna kurus ǂansa ūhâ. ǁÎb ge ǁkhāti ǂhoa, ǂhoaǀapa, ǀapa tsî ǃuri, tsaura lapin ǀkha a sîsen ǁkhā. ǁÎb ge ǁkhāti xoaǂgā-ain hoana a dī ǁkhā tsî mâ kuruǃnôa-i, ǁgui-aiǃâheb ka i hoa-e a dī ǁkhā. Ab sa ǁkhāǁkhāsa sîsenaogu tsî sa îb, gao-aob Davidi digu tsîn ǀkha sîsenǀhao re. 15 Nēsi ǁnâi mîmâits ge ǃhoro-i, garsǃhoro-i, ǂauxûi-i tsî ǀkhera-oli-i tsîna sîba da re. 16 ǂHâbats hâ sederhain hoana da ge Libanonǃhommi ai ǁhāǁnâ, ǃgaeǀhao tsî hurib ai Jopas kōse nî sī-ū. ǁNāpa xuts ge ǁîna Jerusalems ǁga a ǃgû-ū ǁkhā.”
Tempeli di ǂnubitsoatsoahes
(1 Gao-aogu 6:1-38)17 Gao-aob Salomob ge Israeli ǃnâ ǁan hâ ǃhaokhoegu hoaga ge ǃgôakhâi, ǁîb îb Davidi ge dī hâ is ǁkhās khami. ǁNāpa gu ge ǀguikaidisi tsî korodisiǃnonaǀaǀoadisi tsî ǃnanikaidisi ǃhaokhoega ge hâ i. 18 ǁÎb ge hûdisiǀoadisigu ǁîgu diga tani-aose, ǁkhaisadisiǀoadisiga ǀuide gu ǃhomgu ǃnâ nî ǁhāǂuise, tsî ǃnonaǀoadisi tsî ǃnanidisiga mûǂamaose ge mâi, î gu sîsenni nî dīhesa kōǃgâ.
© Khoekhoegowab Elobmîs © Bible Society in Namibia, 2020.
