Efeses kerkheb ǃoa hâ sîǂkhanis
1 “Efeses ǃnâ hâ kerkheb di ǀhomǃgāb ǃoa nēti xoa re:
“Nēs ge mîs, ǁnāb ǁîb di amǀkhāb ǃommi ǃnâ hû ǀgamirode ūhâ tsî hû ǃamǀaekandelargu ǁaegu ra ǃgûb disa. 2 ǂAn ta ge a taren hoana du ra dī ǃkhaisa; mâtikōse du sado ǀgaisase sîsen tsî ra mâǃkharu ǃkhaisa ta ge ra mû. ǁKhāti ta ge ǂan sadu khoen hîa a ǂkhaban, apostel* tama hâǃâ ra ǁnāti ǂgaiǂnûiǀkhāsenna du tanixaba tama tsî ǁîna ǃâi tsî ǂhumi-aon ase ra hōǂui ǃkhaisa. 3 ǁKhāti ta ge ǂan sadu a ǃnūǃnâxa tsî du ge ti ǀons ǃaroma tsâ tsî tātsēs tsîna tsau tama hâ i ǃkhaisa. 4 Xawe ta ge tita nēsa sadu ǃoagu ūhâ, sadu ǂguro ǀnamma du ge a ǂhara ǃkhaisa. 5 ǂÂihō re mâpa xu du ge ǁnā ǃkhaisa, ǃhobasen î ǂguro du gere dī sîsenga dī re. ǃHobasen tama du ka io ta ge hā tsî sadu di ǃamǀaekandelara ǁîb di mâǃkhaisa xu nî ūbē. 6 Xawe ǀgui ǃgâi xū-i hîa du sado ra dī-i ge hâ. Sadu ge Nikolaǁîn di sîsenga ǁkhan hâ, tita ǁkhāta khami.
7 “ǂGaera ūhâ-e, a i Gagab ra kerkhegu ǃoa mîna ǁnâu. Dan ra-e ta ge ǁnā hais, ûiba ra mās, Elob di Paradais ǃnâ mâs di ǂûna xu ǂûsa nî mā-am.
Smirnas kerkheb ǃoa hâ sîǂkhanis
8 “Smirnas ǃnâ hâ kerkheb di ǀhomǃgāb ǃoa nēti xoa re:
“Nēdi ge ǁnāb hîa ǂguro tsî ǀunib, ǁō ge hâ i tsî ge ǁkhawa ûiba xu hâ mîde. 9 Sadu ǃgomsigu tsî sadu ǀgâsiba ta ge a ǂan, xawe du ge ǃkhū hâ. ǁKhāti ta ge ǂkhaba xūn, sadu ǃoagu ǁnān hîa Jodeǁî tamaǃâ ra Jodeǁîse ǂgaisenna xu hâna a ǂan; xawen ge ǁîna a Satanni* di khoe. 10 Tsâts nîn xa tā ǃao. ǁGâuab* ge ǀnîdu âdo ǃkhōsis ǃnâ nî aoǂgā ǃâitsâhe du nîga, tsî du ge disi tsēdi di ǁaeba nî tsâ. ǁŌb kōse ǂgomǂgomsase hâ re, o ta ge ûib di kronsa nî mā du.
11 “ǂGaera ūhâ-e, a-i ǁnâu Gagab ra kerkhegu ǃoa mîna! Dan ra-i ge ǀgamǁî ǁōb xa tsûtsûhe tide.
Pergamums kerkheb ǃoa hâ sîǂkhanis
12 “Pergamums ǃnâ hâ kerkheb di ǀhomǃgāb ǃoa nēti xoa re:
“Nēs ge ǂhôas, ǁnāb hoaǀkhāǀā gôaba ūhâb disa. 13 ǂAn ta ge a mâpats ǁan hâ ǃkhaisa, ǁnāpa Satanni trons hâpa. Ti ǀonsats ge ra ǃkhōǀgaipe tsîts ge ti ǂgomsa ǀūxū tama, ti ǂgomǂgomsa ǃkhō-amaob Antipab, Satanni di ǁanǃkhais tawa ge ǃgamheb di ǁaeb ǃnâs tsîna. 14 Xawe ta ge ǀnî xūna sadu ǃoagu ūhâ: ǀNîn ge sadu ǃnâ hâ Bileammi di ǁkhāǁkhāde ra saona. ǁÎb ge Balaka mâtib Israelǁîna nî ǃhoaǁnâdana, în ǁgôa-elogu ra ǁguibahe ǂûna ǂû tsî ǀai ǃkhaisa gere ǁkhāǁkhā. 15 Tsîts ge ǁkhāti ǁkhā ǀgaus ai Nikolaǁîn di ǁkhāǁkhāde ra saona ūhâ. 16 ǃHobasen ǁnâi, tsî ǁnāsats ga dī tama io ta ge ǃnapetamase hā tsî ti amsa xu ra ǂoaxa gôab ǀkha nî ǃkhamū tsi.
17 “ǂGaera ūhâ-e, a-i ǁnâu Gagab ra kerkhegu ǃoa mîna!
“Dan ra-e ta ge sâusa manaba nî ǂûmā, ǁkhāti ta ge ǁî-e ǃuri ǀui-i, ǀasa ǀon-i xoa-aisa-i, khoe-i xare-i a ǀū, ǁnā-i ǃkhōǃoa ra-i ǀgui-i a ǂan-e nî mā.
Tiatiras kerkheb ǃoa hâ sîǂkhanis
18 “Tiatiras ǃnâ hâ kerkheb di ǀhomǃgāb ǃoa nēti xoa re:
“Nēs ge ǂhôas hîa Elob Ôab, mûdi âb ǀaes di ǁhabub khami ī tsî ǂaidi âb brons ǀurib hîa ra ǂkhaib khami ība xu hâsa. 19 ǂAn ta ge a taren hoana du ra dī ǃkhaisa. Sa ǀnammi, ǂgomǂgomsasib, ǃoabas tsî ǃnūǃnâxasib tsîna. Tsî ta ge a ǂan ǂgurots gere dīs xats nēsi ǃnāsase ra dī ǃkhaisa. 20 Xawe ta ge nēsa sats ǃoagu ūhâ: Sats ge tarekhoes Isabels, kēbo-aos ti ra ǂgaisensa ra mā-am, ǁîs di ǁkhāǁkhādi ǀkha ti ǃgāna ǀaib tsî ǁgôa-eloga ǁguibahe hâ ǂûna ǂûs ǃoa ǂgaeǂhapusa. 21 Tita ge ǁîsa ǃhobasens nî ǁaeba ge mā hâ i, xawes ge ǀaib âsa xu ǃhobasen ǂgao tama ge i. 22 Mû, tita ge ǁîsa ǀaekharob ai nî ǁgui, în ǁîs tsî ǁnān hîa ge ǁîs ǀkha gere ǃgamekhôan tsîna ǁkhōǁkhōsase nēs ǃnâ tsâ. Tita ge ǁnāsa nî dī, ǁîn ga ǁîs di ǂkhaba sîsenga xu ǃhobasen tama io. 23 ǁKhāti ta ge ǁîs di saoǃgonaona nî ǃgam. Tsî gu ge hoaraga kerkhega tita a ǂâidi tsî ǂgaogu di ôaǃnâ-ao tsî ta mâ-i hoa-e ǁî-i di ǃoaǂuis ǃoa nî mā ǃkhaisa nî ǂan.
24 “O ta ge sadu naudu Tiatiras didu, naun ra ‘Satanni di ǃgam ǂganǃgâsigu’ ti ǂgaina ge ǁkhāǁkhāsen tama idu ǃoa ra mî, ǀnî ǃgom-e ta ǃnao-ai du tidesa. 25 Xawe tita nî hās kōse, ū du hâ-e ǃkhōǀgara re. 26 Dan tsî ra ti sîsenga
ǀams kōse ǃkhōmâi-e ta ge
hoaraga ǁaedi ǂama ǁkhāsiba nî mā.
27 ‘ǁÎ-i ge ǁîna ǀurigaohaib ǀkha nî ǃûi,
on ge ǁîna ǂgoasūdi ra ǂkhūǂkhūhes
ǁkhās khami nî ǂkhūǂkhūhe.’
28 ǁÎ-e ta ge tita ge ti îba xu ǃkhōǃoa ǀgaib ǁkhāba nî mā. ǁKhāti ta ge ǁî-e ǁgoaǀgamirosa nî mā.
29 “ǂGaera ūhâ-e, a-i ǁnâu, Gagab ra kerkhegu ǃoa mîna.
© Khoekhoegowab Elobmîs © Bible Society in Namibia, 2020.
