Levitikus 13 - Khoekhoegowab New Translation 2020 (KKG20)

Khōǀaesenain xa hâ ǁgaragu

1 ǃKhūb ge Moseb tsî Aron hâkha ǃoa ge mî, 2 Khoe-i ga ǀhapi-i tamas ka io ǂunub tamas ka io ǁgao hâ ǀhapi-i, khōǀaesen-i ǁî-e nî ǃanuoǃnâ kai-e ǁî-i khōb ai ūhâ, o-i ge ǁnāti ī khoe-e prister Aronni tamas ka io ǁîb ôagu di ǀguib tawa nî sī-ūhe. 3 Pristeri ge ǀhapis hâ ǃkhaiba nî ôaǃnâ tsî ǁnā ǃkhaib ai hâ ǀûn ga a ǃuri tsîs ga ǀhapisa kaise ǃgam, o-i ge a khōǀaesen tsîb ge pristera ǁnā khoe-i a ǃanuoǃnâ ti nî mî. 4 Xawes ga ǀhapisa ǃuri īsiba ǁgau tsî ǃgam tama i tsî ǀûn tsîna ǃuri tama i, ob ge pristera ǁî-e hû tsēdi ǀgaiba ǀguri nî hâ kai. 5 Hû tsēdi khaoǃgâb ge pristera ǁî-i ǀhapisa ǁkhawa nî kō, tsî ǁîb mûǁaes ga ǀhapisa noxopa ǀgui ǀgaub ai ī tsî ǃaruǀî khoraǂuisen tama i, ob ge ǁîba ǁnāti ī khoe-e ǁkhawa hû tsēdi ǀgaiba ǀguri nî ūhâ. 6 Hûǁî tsēs aib ge pristera nē khoe-i di ǀhapisa ǁkhawa nî kō tsîs ga ǀhapisa ǂuru īsiba ǁgau tsî ǃaruǀî aiǃgû tama i, ob ge pristera ǁnā khoe-i a ǃanu ti nî mî. ǁÎ-i ga saran â-e ǁās khaoǃgâ i ge ǁî-e a ǃanu. 7 Xawes ga ǀhapisa ǁgao tsî aiǃgû pristeri nē khoe-i a ǃanu ti mî hâ hîa, o-i ge ǁnāti ī khoe-e ǁkhawa pristeri tawa nî oasī. 8 Pristeri ge ǁî-e ǁkhawa kō tsî ǀhapis ga ǁgao tsî aiǃgû, o ǃanuoǃnâ a ti nî mî, khōǀaesenni a xui-ao.

9 Khoe-i ga khōǀaesenna ūhâ, o-i ge ǁî-e pristeri tawa nî hā-ūhe 10 tsîb ge ǁîba ǁî-i di ǀhapisa nî kō. Tsîs ga ǀhapisa ǃuri īsib ǁîs ai mâ ǀûga ra ǃuri kaiba ūhâ tsî ūxa, 11 o-i ge toa tama khōǀaesenni ase nî mûhe, ǁnāti ī khoe-e ra ǃanuoǃnâ kaiba. Pristeri ge ǁî-i ǁnā-amaga a ǃanuoǃnâ ti nî mî, tsî-i ge ǂhâbasa tide ǁî-e ǃaruǀî ǀguri ūhâsa. 12 Khōǀaesenni ga ǃaruǀî danasa xu ǂaira kōse ǂnauǂoa tsî aiǃgû, 13 ob ge pristera ǁnā khoe-e ǁkhawa ǂōrisase nî kō. Xaweb ga pristera mû, khōǀaesenni hoaraga soros ai ǂnauǂoa hâ tsî ǃuri īsiba ra ǁgau ǃkhaisa, ob ge ǁîba ǁnā khoe-i a ǃanu ti nî mî. 14 Xawe i ga ǁnā khoe-e ǁgao hâ ǀhapi-e ūhâ, o-i ge a ǃanuoǃnâ. 15 Pristeri ge ǁkhawa ǀhapisa kō tsî ǁgaos hâ ǃkhaisab ga mû, o ǁnā khoe-i a ǃanuoǃnâ ti nî mî, ǁgaosa ǀhapis a ǃanuoǃnâ tsî khōǀaesenna ra ǃaroma xui-ao. 16 Xawes ga ǁgaosa ǀhapisa ǂuru tsî ǃuri īsiba ǁgau, o-i ge ǁnā khoe-e ǁkhawa pristeri tawa nî oasī. 17 Pristeri ge ǁkhawa ǀhapisa kō tsî ǃuri īsib hâsab ga mû, ob ge ǁî-i a ǃanu ti nî mî, ǃanu i a xui-ao.

18 Khoe-i ga tsuis hîa ge ǂurusa ūhâ, 19 tsîs ga ǁnās khaoǃgâ tsuis ge ǂnôa i ǃkhais ai, ǀapaǃuri ūba ǂoaxa, o i ge ǁnā khoe-e pristera sī nî ǁgau. 20 ǁÎb ge ǀhapisa kō tsî kaises ga ǃgam tsî ǁgaosa tsî ǀûn ǀhapis ai hâna ǃuri īsiba ūhâ, o ǁnā khoe-i a ǃanuoǃnâ ti nî mî; tsui kai i ra, o-i ge ra khōǀaesen kai. 21 Xaweb ga pristera kō tsî mû ǀhapis ai hâ ǀûn ǃuri tama tsîs ǀhapisa ǃgam tsî ǁgao tamasa, ob ge ǁîba ǁnā khoe-e hû tsēdi ǀgaiba ǀguri nî ūhâ. 22 Xawes ga ǀhapisa ǃgam tsî ǁgaosa, ob ge pristera ǁnā khoe-i a ǃanuoǃnâ ti nî mî, nē ǀhapis ra ǁî-e ǃanuoǃnâ kai xui-ao. 23 ǀHapis ga aiǃgû tamase ǀnais ge ǂnôa i ǃkhais ai ǀgui hâ tsî ǀhapis ge ǂnôa i ǃkhais di ǁgauǁgaus ǀguisa ūhâ, ob ge pristera ǁnā khoe-i ǃanu ti nî mî.

24 Khoe-i ga ǂhubi tsîb ga ǂhubiba ǁgaosa tsî ǀapa tamas ka io ǃurise a mûsen, 25 ob ge pristera ǀhapisa nî kō. ǂHubi ge ǃkhais ai mâ ǀûn ga ǃurise ǁgausen tsî ǀhapisa kaise ǃgam, os ge ǀhapisa ǂhubib ǃnâ-u, khōǀaesenni ǁnā khoe-e ra ǃanuoǃnâ kaiba ra ǃaroma. 26 Xaweb ga pristera kō tsî mû ǀhapis ai hâ ǀûn ǃuri tama tsîs ǀhapisa ǃgam tsî ǁgao tamasa, ob ge ǁîba ǁnā khoe-e hû tsēde ǀguri nî ūhâ. 27 Hûǁî tsēs aib ge pristera ǁkhawa ǀhapisa kō tsîs ga ǀhapisa ǁgao tsî ǃaruǀî aiǃgû, ob ge a khōǀaesen tsîb ge pristera ǁnā khoe-e ǃanuoǃnâ a ti nî mî. 28 ǀHapis ga aiǃgû tamase ǀnais ge ǂnôa i ǃkhais tawa ǀgui hâ tsî ǂhubib di ǁgauǁgaus ǀguisa ūhâ, ob ge pristera ǁnā khoe-i ǃanu ti nî mî.

29 Khoe-i ga ǀhapi-e danas ai tamas ka io ǃgans ǃnaka ūhâ, 30 ob ge pristera ǀhapisa nî kō. ǀHapis ga ǃgam tsî ǁgaosa tsî ǀûn hîa ǀhapis ai hâna ǃhunise ǁgausen tsî tsaura, ob ge pristera ǁnā khoe-i ǃanuoǃnâ ti nî mî, khōǀaesenni a xui-ao. 31 Xaweb ga pristera kō tsî ǀkhonna ra ǃaroma ǀhapis ǁgaosa tsî ǃgam tama tsîn ǀûna ǂnū īsiba ǁgau tama ǃkhaisa mû, ob ge ǁîba ǁnā khoe-e hû tsēdi ǀgaiba ǀguri nî ūhâ. 32 Hû tsēdi khaoǃgâb ge pristera ǁî-i ǀhapisa ǁkhawa nî kō, tsî ǁîb mûǁaes ga ǀhapisa ǃaruǀî khoraǂuisen tama i tsî ǁîs ai hâ ǀûna ǃhunise ǁgausen tama i tsî ǁgaosa tsî ǃgam tama i, 33 on ge ǁnā khoe-i di ǀûn hoana nî ǂkhomǁnâhe, xawe ǀhapis ai hâ ǀûn ǀguin ge ǂkhomhe tide. Pristeri ge ǃaruǀî ǁnāti ī khoe-e ǁkhawa hû tsēde ǀguri nî ūhâ. 34 Hûǁî tsēs aib ge pristera nē khoe-i di ǀhapisa ǁkhawa nî kō tsîs ga ǀhapisa ǂuru īsiba ǁgau tsî ǃaruǀî aiǃgû tama i, ob ge pristera ǁnā khoe-i a ǃanu ti nî mî. ǁÎ-i ga saran â-e ǁās khaoǃgâ i ge ǁî-e a ǃanu. 35 Xawes ga ǀhapisa ǁgao tsî aiǃgû pristeri nē khoe-i a ǃanu ti mî hâ hîa, 36 ob ge pristera ǁî-e ǁkhawa kō tsî ǀhapis ga ǁgao tsî aiǃgû, o-i ge ǁîba ǀûn di ǃhuni īsi-eb nî kō ǃkhais tsîna ǂhâbasaba tama hâ, ǁnā khoe-i ǂanǂansase a ǃanuoǃnâ xui-ao. 37 Xawes ga ǀhapisa pristeri di mûǁae aiǃgû tama i tsî ǂuru ǀûna ǀhapis ge ǂnôa i ǃkhais ai ǁhai, os ge ǀhapisa go ǂuru tsîb ge pristera ǁnā khoe-i ǃanu ti nî mî.

38 Khoe-i ga ǃuri ǂnaode khōb ai ūhâ, 39 ob ge pristera ǁnāti ī khoe-e nî kō. Nē ǂnaodi ga ǂkhai ra ǃuriba ūhâ, ob ge a ǁkhōǁkhōsa tama ǂunuǃnôa; o-i ge ǁnā khoe-e a ǃanu.

40-41 Khoeb di danaǀûn ga ǁnāǂoa tsîb ga ǂgāsa hō, ob ge ǁnās xa ǃanuoǃnâ kaihe tama hâ. 42 Xawen ga ǀapa tamas ka io ǃuri ǀhapina ǂgās âb ai ǂnauǂoa, o i ge a khōǀaesen. 43 Ob ge pristera ǁnā khoeba nî kō, tsîn ga ǀhapin ǂgās ai ǂnauǂoa hâna ǃuri tamas ka io ǀapa, 44 ob ge pristera ǁîb a ǃanuoǃnâ ti nî mî, khōǀaesenni danas âb ai hâ xui-ao.

45 Khoe-i ga khōǀaesenni ǁî-e ra ǃanuoǃnâ kaiba ūhâ, o-i ge doa hâ sarana nî ǂgaeǂgā tsî danaǀûna kam tide. ǁÎ-i ge ǃnakab ǃâb ǁî-i ais diba anaǂgan tsî “ǃAnuoǃnâ ta a, ǃanuoǃnâ ta a” ti nî ǂgaiǂui. 46 Nē khōǀaesenna i ūhâs kōse i ge ǁnāti ī khoe-e a ǃanuoǃnâ, ǁnā-amaga i ge ǁî-e ǀhûhâsib di hâǃkhaib ǃauga ǀguri nî ūhâhe.

ǃAnuoǃnâ kai ra saran xa hâ ǁgaragu

47 Khōǀaesenna ra ǃaroma ǂnao-i ga sara-i ai hâ, nēsi i ga ǃapi tamas ka io tsaura lapi xawe, 48 tamas ka io, i ga tsaura lapi ǃâro-i tamas ka io, ǀûxa sara-i tamas ka io, khō-i ǀkha kurusa xū-i ai hâ xawe, 49 nēsi i ga ǃam tamas ka io ǀapa īsiba ūhâ tsî khoraǂuisen, o-i ge a khōǀaesen tsî pristera nî ǁgauhe. 50 Pristeri ge kō tsî ǁnā sara-i tamas ka io khō-e hû tsēde ǀguri hâ ǃkhai-i ai nî ūhâ. 51 Hûǁî tsēs aib ge ǁîba ǁî-e kō tsî ǂnaos ga ǃaruǀî khoraǂuisen, o-i ge ǁnāti ī sara-i tamas ka io khō-e a ǃanuoǃnâ. 52 Pristeri ge khōǀaesenna ra ǃaroma ǂnaos ra khoraǂuisen xui-ao ǁnā sara-i tamas ka io khō-e nî ǂhubiǂui, ǀaes ǀguis ǁnāti ī ǀaeba a hîkākā ǁkhā xui-ao.

53 Xaweb ga pristera kō tsî mû, khōǀaesenni di ǂnaos sara-i tamas ka io khō-i ai hâs ǃaruǀî khoraǂuisen tama ǃkhaisa, 54 ob ge ǁîba ǁnā sara-i tamas ka io khō-e ǁā kai tsî ǁkhawa hû tsēde ǀguri nî ūhâ. 55 ǁNās khaoǃgâb ge ǁkhawa pristera ǁnā sara-i tamas ka io khō-e nî kō tsîb ga ǂnaos di ǀûba ǀkhara tama i, nēsis ga ǂnaosa khoraǂuisen tama i xawe, i ge ǁnā sara-i tamas ka io khō-e a ǃanuoǃnâ; nēsis ga ǂnaosa aisǀkhāb ai tamas ka io ǂganagab ai hâs hoasa i ge nî ǂhubiǂuihe. 56 Xaweb ga pristera sara-i tamas ka io khō-i go ǁāhes khaoǃgâ ǁkhawa kō tsî mû, ǂnaos go bē ǃkhaisa, ob ge ǂnaos go ǂnôa i ǃkhaisa ǁnā sara-i tamas ka io khō-e xu nî ǀkhauǂui. 57 Xawes ga ǂnaosa bē tama i, ob ge khōǀaesenna ǁnā sara-i tamas ka io khō-i ai noxopa hâ, xui-ao i ge ǁnā sara-i tamas ka io khō-e nî ǂhubiǂuihe. 58 Xawe i ga sara-i tamas ka io khō-e ǁāhe tsî ǂnaosa bēo, o-i ge ǁnāti ī sara-i tamas ka io khō-e ǁkhawa nî ǁāǃgâhe, o-i ge ǁî-e a ǃanu.

59 Nēgu ge ǁgaragu khōǀaesenna ra ǃaroma ǂnaona ūhâ sara-i, nēsi i ga ǃapi tamas ka io, tsaura lapi xawe, tamas ka io i ga tsaura lapi ǃâro-i tamas ka io, ǀûxa sara-i tamas ka io, khō-i tamas ka io, khō-i ǀkha kuruhe hâ xū-i ai hâga; nē ǁgaragu ge sara-i tamas ka io khō-i a ǃanu tamas ka io ǃanuoǃnâ ǃkhaisa ra mîǁgui.