Jeremiab tsî ǃgaeǀhaos
1 ǃKhūb ge tita ǃoa ge mî: 2 “Mîdi nē ǃgaeǀhaos dide ǁnâu re, î Judab aogu tsî Jerusalems ǁanǂgāsaben ǀkha ǃhoa re. 3 Î ǁîna mîba re: ‘Nētib ge ǃKhūb, Israeli Eloba ra mî: “ǀAxarexūsab ge a ǁnā khoeb nē ǃgaeǀhaos di mîdi 4 sadu aboxaga ta ge mîmādi, ǁîna ta ge Egipteba xu, ǂhubi ra ǁganomsa xu ǂgaeǂguiǂui ǁaeb ǃnâde ǃgâ tamaga.” Ti domma ǃgâ î mîmā du ta ra xūn hoana dī. ǁNāti du ge sado nî ti ǁae tsî ta ge tita nî sadu di Elo, 5 ti nūs sadu îga ta ge dībasa ta nî dīǀoaǀoase, ǁîna daib tsî danib ra dâuǂam ǃhūba nē tsēs ai māsa.’ ” O ta ge “A-i ǁnāti ī re ǃKhūtse” ti ge ǃeream.
6 Ob ge ǃKhūba ge mîǀî te: “Nē mîdi hoade Judab ǃādi ǃnâ tsî Jerusalems ǃgangu ǃnâ ǂhôa re: Nē ǃgaeǀhaos di mîde ǁnâu î ǁîde dī re. 7 Sadu aboxaga ta ge ǁkhōse ge ǃkhâikhom Egipteǃhūba xu ta ge ǂgaeǂguiǂui du tsēsa xu nētsēs kōse. 8 Xawen ge ǃgâ tamas ka io ge ǁnâuǀnam tama i, tsî i ge mâ-i hoa-e ǁî-i ǂkhaba ǂgaob di ǃnâudanaxasiba ge sao. ǁNā-amaga ta ge ǁîn ai hoaraga mîdi ǃgaeǀhaos didi, ǁîna ta ge dīn nîse mîmāde ge hā-ū, xawen ge ǁnāsa dī tama ge i.”
9 ǁKhawab ge ǃKhūba tita ǃoa ge mî: “Judab khoen tsî Jerusalems din ge tita ǃoagu ge ǀapeǀhao. 10 ǁÎn ge ǁîn aboxagu, tita ǃgâsa ge ǂharagu di ǃûǂamdi ǃoa ge oa; ǁîn ge ǁgôa-elona nî ǃoabase ge ǃgû; Judab ôan tsî Israeli ôan ge ti ǃgaeǀhaos ǁîn îgu ǀkha ta ge dīsa ge khôa. 11 ǁNā-amagab ge ǃKhūba nēti ra mî: Mû tita ge ǂkhabab, ǁhâxūn tideba ǁîn ǂama ra hā-ū; tita ain ga ā, xawe ta ge ǁîna ǃgâ tide. 12 On ge Judab ǃādi tsî Jerusalems ǁanǂgāsabena ǁîgan ra ǃgâihamxūna ǂhubiba elogu ǁga ǃgû tsî sī nî ā, xawe gu ge ǁîga ǁîna ǃgommi ǁaeb ǃnâ a hui ǁoa. 13 Sadu elogu sadu ǃādi kōse ǂgui hâ xuige Judatse; Jerusalems ǃgangu ǂguis kōse du ge ǁnā taotaosiba altarde ge mâiba, Baala du nî ǀanǀanbase. 14 ǁNā-amaga tā nē khoena ǀgoreba tamas ka io ǁîn ǂama ā tsî ǀgorede sî, ǁîn ga ǃgommi ân ǃnâ ǂgaiǀî te, o ta ge ǁîna ǃgâ tide.”
15 Tsîb ge ǃKhūba ra mî: “Mâ aiǂhanu-es ti ǀnamsabesa ti ommi ǃnâ ūhâ, ǂkhaba xūnas ra dī hîa? Nūdi tsî ǁguibas ǁgan-i tsîna tsūǃōba ǁîna xu nî ūbē? ǂKhabase dīsa ǁîna dâb xa nî urikhâi kai? 16 ǃKhūb ge ‘ǃam ǀkherahaib, îsa ǂûn xa ǀoa hâb’ ti ge ǂgai tsi, xaweb ge ǃgurub di ǀōb ǀkha ǂnaregu âba khauǃkhū tsî ǁnâugu âba nî khôaǁnâ. 17 Tita ǃKhū, Hoaǀgaixata hîa ge satsa ǃhana ta ge ǂkhababa sa ǃoagu ge gowaǂui, Israeli ommi din tsî Judab ommi din ge dī ǂkhabab ǃaroma, titan ge ǁaixasib ǃoa a ǁgoaǂui, Baala ǃgâihamxūna ǂhubibas ǀkhao.”
Jeremiab ûib ǃoagu hâ ǀapeǀhaos
18 ǃKhūb ge ti khākhoen tita ǃoagu ra dī ǀapeǀhaode ge ǂanǂan te. 19 ǁKhao-i ǂāhe nîse garu-ūhe-i khami ta ge ge ī i. Tita ǃoagun ra ǂkhabase ǀapeǀhao ǃkhaisa ta ge ge ǀū i, ǁîn gere “A da haisa ganupes ǂûna ūhâ hîa ǁhāǁnâ; a da ǃgam bi, îs ǀons âba tā khoe-i xare-i xa ǂâihōhe” ti mîo.
20 O ta ge “ǃKhūtse, Hoaǀgaixatse, sats ge a ǂhanu-ai ǀgoraǃgâ-ao, ǂgaob tsî ǂâisa ra ǃâitsâtsa. Ti ǂhanuǂhanu ǃkhaisa ta go satsa ǂanǂan xuige a ta sa ǀkhaoba ǁîn tawa mû re.”
21 ǁNā-amagab ge ǃKhūba nēti Anatots khoen, sa ûiba ra ôan ǃoa ra mî: “Tā ǃKhūb ǀons ǃnâ kēbo, ǁnā tamas ka io da ge sida nî ǃgam tsi.” 22 Ob ge ǃKhūb Hoaǀgaixaba nēti ge mî: “Mû tita ge ǁîna nî ǁkhara. ǂKham khoegu ge gôab ǃnâ nî ǁō, ǁîgu ôagu tsî ôadi ge ǃâtsūǀkhāb xa nî ǁō, 23 tsî i ge ǀgui-i xare-i tsîna ǃgau tide. Anatots khoegu ǂama ta tita tsūǃōba nî hā-ū, kurib ǁîn ǁkharab diba xui-ao.”
© Khoekhoegowab Elobmîs © Bible Society in Namibia, 2020.
