Eksodus 40 - Khoekhoegowab New Translation 2020 (KKG20)

ǃKhūb di Tentommi ǂnaumâihes tsî ǀkhaehes

1 ǃKhūb ge Moseb ǃoa ge mî: 2 “ǂGuro ǁkhâb kurib dib di ǂguro tsēs ai ǃKhūb di Tentomma ǂnaumâi. 3 ǁÎb ǃnâ ǃGaeǀhaos ǂGaesa ǂgā, î ǂgāmâisab ǀkha mâiǁkhae. 4 Tāba ǂgâxa-ū, î ǁîb ai nî sîsenūhe xūn hoana ǂhomi tsî ǃamǀaekandelari tsîna ǂgâxa-ū, î ǃamǀaede ǁîb ai ǃamǂnûi. 5 ǃHuniǀuri-altars, ǃgâihamxūn ra ǂhubi-aihesa ǃGaeǀhaos ǂGaes aiǃâ mâi, î Tentommi di ǂgâ-ams tawa ǂgāmâisaba mâi. 6 ǃAuga, ǃKhūb di Tentommi ǂgâ-ams aiǃâ altars khauǁguibadi disa mâi. 7 ǃKhūb di Tentommi tsî altars tsîra ǁaegu ǁāsenǃnâǃoreba mâi, î ǁgam-i ǀkha ǀoaǀoa. 8 ǁGâuǂnamiba kurumâi, î ǁîb ǂgâ-ams tawa ǂgāmâisaba mâi.

9 “ǀNau-ū-oli-e ū, î Tentommi tsî ǁîb ǃnâ hâ xūn hoana ǀnau. Nēs ǀkha ǁîb tsî ǁîb ǃnâ hâ xūn hoana khai, on ge hoaragase nî ǃanu. 10 ǁKhāti altars khauǁguibadi dis tsî ǁîs di sîsenūxūn tsîna ǀnau, on ge hoaragase nî ǃanu. 11 ǁNās khaoǃgâ ǁāsenǃnâǃoreba ǁîb di ǂais hoas ǀkha ǁkhā ǀgaub ai ǀnau tsî khai.

12 “Aronni tsî ǁîb di ôagu tsîna ǃKhūb di Tentommi ǂgâ-ams tawa hā-ū, î ǁîga ǁāsenǃnâǃoreb ǃnâ ǁā. 13 Aronna ǃnâu pristersi sarana ana, î ǁîba ǀnau tsî ǀkhaeǂgā, pristerseb nî ǃoaba tese. 14 ǁÎb ôagu tsîna hā kai, î ǁîga anaǂamsaraga ana. 15 ǁÎgu îbats ge ǀnauǂgā khami ǁîgu tsîna ǀnau, î gu pristerse ǃoaba te ǁkhā. Nē ǀnaus ge ǁîga ǃgoaxaǁaeb hoab ǃnâ pristerse nî ūhâ.”

16 Moseb ge hoaraga xūna ǃKhūb ge mîmā bi khami ǀgui ge dī. 17 ǁNā-amaga, ǂguro tsēs ǀgamǁî kurib di ǂguro ǁkhâb dis ai, Egipteba xun ge ǃgûs khaoǃgâb ge ǃKhūb di Tentomma ge ǂnaumâihe. 18 Moseb ge Tentomma ǂnaumâis ǃaroma Tentommi ǂaide ǃammâi, ramde kurumâi, ǃnâǃkhâ ra ǁguihe haiga ǁgui tsî ǁîb ǂgurihaiga ge mâi kai. 19 ǁÎb ge ǃgū-aiba Tentommi ǂamai khoraǂui tsî ǁîb ǀgapise ǂguro ra ǁguihe ǃgū-aib ǀkha ge ǃgū-ai kai, ǃKhūb ge mîmā hâ i khami ǀgui. 20 ǁNās khaoǃgâb ge ǁîba ǀgam ǀuiǂgapakha ǃGaeǀhaos ǂGaes ǃnâ ge ǂgā kai. Tani-aihaikha râidi ǃnâ ǃkhāǃkharu tsîb ge ǂganais ǀkha ge ǂganam kai. 21 ǁÎb ge ǃGaeǀhaos ǂGaesa Tentommi ǃnâ ǂgâxa-ū kai tsî ǂgāmâisaba ǁîs aiǃâ ǂgāmâi, tsî ǁnā ǀgaus ai ǁîsa ge mâiǁkhae, ǃKhūb ge mîmā hâ i khami.

22 Moseb ge tāba ǃKhūb di Tentommi ǃnâ ǂgāmâisab ǀapasǀkhāb ai mâi kai 23 tsî tāb ai ǁguibaperena ge ǂnûi, ǃKhūb ge mîmā hâ i khami ǀgui. 24 ǁÎb ge ǃamǀaekandelara ǃKhūb di Tentommi ǃnâ ǃkhawagasǀkhāb ai, tāb ǃoagu ge mâi 25 tsî ǃamǀaede ge ǃamǂnûi, ǃKhūb ge mîmā hâ i khami ǀgui. 26 ǁÎb ge ǃhuniǀuri-altarsa ǃKhūb di Tentommi ǃnâ, ǂgāmâisab aiǃâ ge mâi 27 tsî ǃgâise ra ham ǃgâihamxūna ǁîs ai ge ǂhubi, ǃKhūb ge mîmā hâ i khami ǀgui. 28 ǁÎb ge Tentommi ǂgâ-ams tawa ǂgāmâisaba ǂgāmâi 29 tsî ǃKhūb di Tentommi ǃauga, ǂgāmâisab aiǃâ altars khauǁguibadi disa ge mâi. ǁÎs aib ge khauǁguibas tsî ǃhoroǁguibas tsîra gere ǁguiba, ǃKhūb ge mîmā hâ i khami ǀgui. 30 ǁÎb ge ǃKhūb di Tentommi tsî altars tsîra ǁaegu ǁāsenǃnâǃoreba mâi tsî ǁgam-i ǀkha ge ǀoaǀoa. 31 Moseb, Aronni tsî ǁîb di ôagu tsîgu ge ǁnāpa ǁîgu ǃomgu tsî ǂaidi tsîna gere ǁā, 32 ǃKhūb di Tentommi tamas ka io gu altars tawa nî sīs aiǃâ, ǃKhūb ge mîmā hâ i khami ǀgui. 33 Moseb ge Tentommi tsî altars ǂnamipe ǁgâuǂnamiba kurumâi tsî ǁîb ǂgâ-ams tawa ǂgāmâisaba ge ǂgāmâi. ǁNātib ge ǁîb sîsenna ge dītoa.

ǃÂus ge ǃKhūb di Tentommi ra ǃgū-ai

(Numeri 9:15-23)

34 ǁNātimîsis ge kai ǃâusa ǃKhūb di Tentomma ge ǃgū-ai tsî ǃKhūb di ǂkhaisib ge ǁîba ge ǀoaǀoa. 35 ǁNā-amagab ge Moseba ǃKhūb di Tentommi ǃnâ ge ǂgâ ǁoa i. 36 Israelǁîn di ǃgûdi hoadi ǃnân ge kai ǃâus ga ǃKhūb di Tentommi ǂamaiba xu a ūkhâihe, o ǀgui aiǃâb ǃoa ge ǃgû ǁkhā i. 37 ǁNā ǃâus ǁnāpa mâs kōsen ge ǁîna aiǃâb ǁga ge ǃgû ǁoa i. 38 ǁÎn di ǃgûdi hoadi ǃnân ge tsēa ǃKhūb di ǀgūse hâs di ǃâus tsî tsuxuba khau ra ǀaesa Tentommi ǂamai gere mû.