ǃKhūb di ǀgoraǃgâs Amonǁîn ǂama
1 Nētib ge ǃKhūba Amonǁîn ǂama ra mî: “Israela ǀgôaga ūhâ tama hâ? ǀUmi-ao-eb ūhâ tama? Tarexab Milkomma Gada ge ū tsîn ǁîb khoena Gadi ǃādi ǃnâ ǁan hâ? 2 ǁAeb ge nî hā, tib ge ǃKhūba ra mî, Amonǁîn di ǃās Rabas ǃoagu ta torob ǀō-e nî ǁnâu kaiba, os ge nî ǃū-aisa ǀuiǁkhobo kai. ǁÎs di ǃgoaǃnāgu ge nî khauǃkhūhe, on ge Israelǁîna ǁîna ge ūǀhana hâ i khoena nî doeǁgāǂui. 3 Hesbonse ā re Ais hîkākāhe hâ xuige. Ā re saso Rabas taraso. ǃOab sarana ana, î ǃgae tsî ǂnubiǂgoagu ǁaegu ǃkhoema, Milkommi ǁîb pristergu tsî ǂamkhoegu tsîn ǀkha ǃkhōsabese ūǃgûhe hâ xuige. 4 Tarexas sa ǃgoaǃnāgu xa ra koasen, sa ǂgomǃgâhe ǁoa ǁaese, ǃkhūsigu âs ai mûmâinǃgâ tsî ra mîse: ‘Tari-e tita nî ǁnāǂam?’ 5 Tita ge ǃaoba ǁnān sa ǂnamipe hâna xu sas ai nî hā kai, tib ge ǃKhūb Elob Hoaǀgaixaba ra mî. Sadu ge nî sauruǀgaruǀgaruhe, tsî i ge ǃhūsabena nî ǀhaoǀhao khoe-i xare-e hâ tide.
6 “Xawe ǁnās khaoǃgâ ta ge tita Amonni di mâsiba nî dī-unu,”
tib ge ǃKhūba ra mî.ǃKhūb ge Edomma nî ǁkhara
7 Nētib ge ǃKhūb Hoaǀgaixaba Edommi xa ra mî: Gā-aisi-i xare-e kha Temans ǃnâ a ǀkhai? ǀApemāsa kha ǁnâuǃāxana xu kā hâ? ǁÎn di gā-aisiba kha ge bē? 8 Dabasen î ǃhū, î ǃgam ǃkhaidi ǃnâ sī ǁan, sadu Dedans di ǁanǂgāsabedo. Tita ge ǂōǂōsiba Esaub ǂama nî hā-ū, ǁîn ǁkharab di ǁaeb ge go ǀgū. 9 Draiben di ǃora-aon ga sadu tawa hāo, xū-i xare-en ǃgauba du tide? ǃNari-aon ga tsuxuba hāo, ǂhâban hâs kōse ǀguin ǃnaribasen tide? 10 Xawe tita ge Esauba ge ǀkhaiǀkhā kai, tita ge ǁîb di sâusenǃkhaide ge ǂhaiǂhai, sâusen ǁkhāb tidese. ǁÎb ôananôagub, ǁîb ǃgâsan tsî ǁanǁare-aon tsîn ge hîkākāhe hâ, ǀgui-i tsîn a ǀkhai. 11 Sa ǃguniǀgôana ǁnāxū, tita ge ǁîn ûiba nî kōǃgâ. Sa ǃoataradi ge tita ai ǂgomaiǂnûi ǁkhā.
12 Nētib ge ǃKhūba ra mî: ǁNān hîa ǁnā ǀgabisa xu nî āse ī taman tsîn ǁîsa xu nî ās kao, satsa ǁnâi ǁkharahe tama nî i? Sats ge ǁkharahe tamase hâ tide, tsîts ge ǁîsa xu nî ā. 13 Tita ge tita ǂûta tawa ge nū, tib ge ǃKhūba ra mî, Bosras nî ǃhuriǃhurisa ǃkhai tsî ǃhōxū tsî ǃgaroǃhū tsî ǀâxarexū kai ǃkhaisa. Tsî ǁîs ǂnamipe ǂnôa ǃādi hoadi ge khôaǂkhūsase nî ǁgoe.
14 ǂHôasa ta ge ǃKhūba xu ge ǃkhōǃoa tsî sîsabeb ge ǁaedi ǃnâ ge sîmahe mîb nîse: “ǀHaoǀhaosen, î Edommi ǃoagu khâi tsî ǃkhammi ǃoa ǂhomisen. 15 Tita ge satsa ǁaedi ǃnâ ǂkhari ǁaese nî dī, ǃharaxūsa xūse khoen mûǁae. 16 Sa ǃaoǃaosasib tsî ǂnīǂnīsenni ge satsa ge ǂgaeǂhapu, sats ǃhaogu di ǁhāgu ǃnâ ǁan hâtsa. Sa omsats ga ǃariǃkhās khami ǀgapiga om, xawe ta ge ǁnāpa xu nî ūǁnâ tsi,”
tib ge ǃKhūba ra mî.17 “Edommi ge nî ǃhuriǃhurisaxū kai. ǁNāpa-u ga ǃkharu khoe-i hoa-i burugâ tsî nî ǃhō bi, ǁîb hâǃnâ ǂōǂōsigu xa. 18 Sodoms tsî Gomoras tsî ǁîra ǂnamipe ǂnôa ǃādi hîa ge hîkākāhedi ǃnâs ǁkhās khami i ge khoe-i xare-e ǁîdi ǃnâ ǁan tide, khoe-i xare-i ge ǁnāpa hâ tide, tib ge ǃKhūba ra mî. 19 Jordanni haiǀgomsa xu gūn ǃû-ais ǃoa ra ǂoaxa xammi khami ta ge tita ǁîba ǃnapetamase ǁîn ǃhūba xu nî ǃkhoeni kai. Tsî ta ge ǁhûiǂui ta ga khoe-e ǁîb ǂama nî mâi. Tari-e tita khami ī? Tari-e tita nî ǂgaoǀkhā? Mâ ǃûi-aoba tita nî mâǃoa ǁkhā? 20 ǁNā-amaga ǁnâu tare-eb ge ǃKhūba Edommi ǃoagu ǀapesa tsî tare-eb Temans ǁanǂgāsabenab nî dī-ūse ǂâibasen hâsa. ǁÎn di ǂkhamron tsîn ge nî ǃkharabēhe. Hâǃkhais ân ge ǁîn di ǂhunuma dīb ǃaroma nî hîkākāhe. 21 ǃHūb ge Edommi ǁnās di ǀōb xa nî ǂgubi tsî ǁîn huiǂgais ge ǂĀxahurib kōse nî ǁnâuhe. 22 Khākhoeb ge ǃariǃkhās khami ǁkhanakhâi tsî khoraǂuisa ǁgabokha ǀkha ǃhaese Bosrasa nî ǁnāǂam. ǁNātsē gu ge Edommi di toroǃkhamaoga, ǁoratsûb ǃnâ hâ taras khami ǃaob xa nî ǃkhōhe.”
ǃKhūb ge Damaskusa nî ǀgoraǃgâ
23 “Damaskus xasa. Hamats tsî Arpads tsîra ge burugâ hâ, tsū ǂhôasa ra ge ǁnâu amaga. ǁÎra ge a sâoǃnâ, ǁgaosa hurib khami, ǁîra ge a sâ ǁoa. 24 Damaskus ge ǂkhabu hâ, ǁîs ge ǁhâs nîse ra dabasen, ǃaob xa ǃkhōhe tsî. ǁÎs ge ǁoratsûb ǃnâ hâ taras khami ǃaob xa ǃkhōhe hâ. 25 Tarexas kha kaise ǂansa ǃāsa ǁnāxūǂuihe tama hâ, dâb di ǃāsa. 26 ǁÎb di ǂkham khoegu ge ǃgangu ǃnâ nî ǁnā, ǁîb di toroǃkhamaogu ge ǁnātsē nî hîkākāhe,”
tib ge ǃKhūb Hoaǀgaixaba ra mî.27 “Tita ge Damaskus ǂnubiǂgoab tawa ǀaesa nî khauri kai tsîs ge Benhadadi ǁkhui-omga nî khauǃkhū.”
Kedari tsî Hasors tsîra di ǀgoraǃgâhes
28 Kedari ǂama tsî Hasors gaosigu, Babilons gao-aob Nebukadnesari xa ge ǁnāǂamhegu ǂamab ge ǃKhūba nēti ra mî: “Khâi, î Kedarasa ǁnāǂam, î du aiǂoas di khoena hîkākā. 29 ǁÎn di tentomdi tsî ǀgoan tsîn ge nî ūhe. ǁÎn tentomdi ǂgāmâisagu, ǁîn di xūn tsî ǃnain tsîn hoan ge nî ūǃgûhe. Khoen ge ǁîn ǃoa ‘ǃAoǃaosasib hoa ǀkhāgu ai’ ti nî ǂgai.
30 “ǃHū, ǃnūse ǃkhoeni, î ǃgam ǃkhaidi ǃnâ sī hâ, sadu Hasors ǁanǂgāsabedo, tib ge ǃKhūba ra mî. Babilons gao-aob Nebukadnesari ge sadu ǃoagu ge ǀape, ǁîb ge mîǀgui-e sadu ǃoagu ge ū. 31 Khâi, î ǁnā ǁaes, sâsase hâsa ǁnāǂam, tib ge ǃKhūba ra mî. ǁÎs ǃādi ge daodi tsî ǂganam-ūǀuri-i tsîna ūhâ tama hâ, ǁîs ge ǀguri ǁan hâ.
32 “ǁÎn di ǃnain ge nî ǁkhâuǁnâhe tsî ǁîn di kai ǂgarib ge nî ǃnarihe. Tita ge ǁîna hoa ǂoadi ǃnâ nî ǀgaruǀgaru, ǁnān ǀûn âna ra ǂkhomǃnubuǃnubuna. Tita ge ǂōǂōsiba hoaǀkhāga xu ǁîn ai nî hā kai,”
tib ge ǃKhūba ra mî.33 “Hasors ge nî ǀgirin di hâǃkhai kai, ǁîs ge nî ǃū-aisa ǃkhai kai, ǀamos kōse. Khoe-i xare-i ge ǁnāpa hâ tide; ǀgui khoe-i tsîn ge ǁîs ǃnâ ǁan tide.”
ǃKhūb ge Elamma nî ǁkhara
34 Mîs ǃKhūb dis, Elammi ǂama hâs ge kēbo-aob Jeremiaba Judab gao-aob Sedekiab ǂgaeǂguis tsoatsoas ǃnâ ge hāba. 35 Nētib ge ǃKhūb Hoaǀgaixaba ra mî: “Tita ge Elammi di khāsa nî khôa, ǁîb toroǂnubis di ǀgaiba. 36 Tita ge haka ǂoaga, haka ǁhôadi ǀhommi dide xu Elammi ai nî hā kai. Tita ge ǁîb khoena hoa ǂoadi ǃnâ nî ǀgaruǀgaru tsî i ge Elammi khoen ǃhūsabese hâǃnâ tama ǃhū-i xare-e hâ tide. 37 Tita ge Elamma khākhoen ân aiǃâ nî ǂkhabuǂâi kai, ǁnān ǁîn ûiba ra ôan aiǃâ. Tita ge ǂōǂōsiba ǁîn ai nî hā-ū, ti ǀgamsa ǁaiba, tib ge ǃKhūba ra mî. Tita ge gôaba ǁîna nî sîǃgon, ǁîna ta hoaragase nî hîkākās kōse. 38 Tita ge ti tronsa Elammi ǃnâ nî mâi tsî ǁîn gao-aob tsî ǂamkhoegu tsîga nî hîkākā,”
tib ge ǃKhūba ra mî.39 “Xawe ǃgoaxa tsēdi ǃnâ ta ge tita Elammi mâsiba nî dī-unu,”
tib ge ǃKhūba ra mî.© Khoekhoegowab Elobmîs © Bible Society in Namibia, 2020.
