2 Kroniks 3 - Khoekhoegowab New Translation 2020 (KKG20)

1 Salomob di îb, gao-aob Davidi ge ǀnai Tempela ǃkhai-e ge ǂhomiba hâ i. ǁNās ge Jerusalems ǃnâ, Moriaǃhommi ǁîb aib ge ǃKhūba Davida a ǂhaib aisa; ǁnās ge Jebusǁîb Araunab di ǃhorodāǃnâǃkhai ge isa. 2 Gao-aob Salomob ge hakaǁî kurib ǁîb ǂgaeǂguis dib di ǀgamǁî ǁkhâb ǃnâ omma ge ǂnubitsoatsoa. 3 Gao-aob Salomob ge om Tempeli ge ǀgamdisihûǀa meterga gaxu tsî khoese meterga ge ǂhaba i. 4 ǂGâ-ams di ai-ommi ge Tempeli ǁkhāb khami khoese meterga ǂhaba tsî korodisihakaǀa meterga ge ǀgapi i. Ommi ge ǃnāb ǃnâ ǃūmû ǃhuniǀurib ǀkha ge ǃkhûǂuisa i. 5 Kai ǃnā-ommab ge denehain ǀkha ǁguiǂuiǃnâ tsî ǃūmû ǃhuniǀurib ǀkha ge ǃkhûǀkhā hâ i; tsîb ge ǃhuniǀurib ai palmhaidi tsî khedegu tsîna ge xoaǂgā hâ i. 6 Gao-aob ge Tempela îsa, ǃgomǀgausa ǀuidi tsî Parvaimǃhūba xu hâ ǃhuniǀurib ǀkha ge anan hâ i. 7 ǁÎb ge ǂnubiǂgoagu, ǃnaogu, dao-amǃnaogu tsî dao-amdi tsîna ǃhuniǀurib ǀkha ge ǃkhûǀkhā hâ i. Tsî gu ge sîsenaoga ǂnubiǂgoagu ai xerukha ge ǃgaoǂui hâ i. 8 ǂGanagab ǃnā-oms, Hoan xa ǃAnuǃkhais ti gere ǀonǂgaihes ge khoese meterga gaxu tsî khoese meterga ge ǂhaba i, Tempeli di ǂhabab ǁkhāb khami. ǀGamdisi tongu xa ǃnāsa ǃhuniǀurib ge Hoan xa ǃAnuǃkhais di ǂnubiǂgoaga ǃkhûǀkhās ǃaroma ge sîsenūhe. 9 Korokaidisi tsî hûdisi xramgu ǃhuniǀurib ge spaikerga kurus ǃaroma ge sîsenūhe tsî ǀgapiga hâ ǃnā-omdi di ǂnubiǂgoagu tsîn ge ǃhuniǀurib ǀkha ge ǃkhûǀkhāhe.

10 Gao-aob ge ǁkhāti ǁîb di sîsenaoga ge mîmā, î gu ǀgam xerukha ǀurina xu kuru, ǃhuniǀurib ǀkha ǃkhûǀkhā tsî Hoan xa ǃAnuǃkhais ǃnâ mâi. 11-13 ǁNāpa kha ge dao-amsǀkhāb ǃoa kō hâse, ǀguiba naub xōǀkhā ge mâ i. Mâ xerub hoab ge ǀgam ǁgabokha, mâb hoab ǀgams xa ǃnāsa metergu kōse gaxukha ge ūhâ i. ǀGuiǀkhāb khoraǂuisa ǁgabokha âkha dib ge ǃnā-oms ǁaegub ǃnâ gere tsâǀkhāgu tsî nauǀkhāb ǁgabokha ge ǂnubiǂgoakha gere tsâǀkhā. ǁÎkha di ǁgabogu ge ǀguiǀkhāb oms diba xu nauǀkhāb kōse gere sī. 14 Hoan xa ǃAnuǃkhais di ǂgāmâisab ge ǂhoa, ǂhoaǀapa tsî ǀapa tsaura lapigu ǀkha ge dīsa i tsî gu ge xeruga ǁîgu ai ge ǂomǂuisa i.

ǀGam brons ǂkhâǃnâkha

(1 Gao-aogu 7:15-22)

15 Gao-aob ge ǀgam ǂkhâǃnâkha, disikoroǀa tsî ǃkhare metergu kōse ǀgapikha Tempeli aisǀkhāb ai ge kuru. Mâb hoab ge ǀgam meterkha ǀgapi danara ge ūhâ i. 16 ǂKhâǃnâkha ge ǀgapikab ai ǂgapusa khedegu tsî kaidisi brons xranatdi tsîn ǀkha ge anansa i. 17 ǂKhâǃnâkha ge Tempeli dao-ams di ǃnamkha ai ge mâisa i. ǃKhawagasǀkhāb ai mâb ge Jakin ti ge ǀonǂgaihe tsî ǀapasǀkhāb ai mâb ge ge Boas i.