Gā-aisib 1 - Khoekhoegowab New Translation 2020 (KKG20)

ǂHanu-aisiba ôaǃnâs

1 ǂHanu-aisiba go ǀnam re, sago ǃhūbaib di ǂgaeǂgui-aogo. Amab ǃnâ ǃKhūb xa ǂâi, î hoa ǃgôasib ǀkha ôa bi re. 2 ǁNān hîa ǁîba ǃâitsâ ǂgao taman ge ǁîba nî hō tsîb ge ǁî-aitsama ǁnān, ǁîba ra ǂgomǃgân ai nî ǁgausen. 3 ǀHôagao ǂâidi ge khoena Eloba xu ra ǀgora tsî da ga ǁnātikōse gâ tsî ǁîba ǃâitsâ, ob ge ǁîb di ǀgaiba nî taotao da. 4 Gā-aisib ge gāxaǃnâ khoe-i tamas ka io ǁoreb di khobo-i ǀkha ǁanǁare tide. 5 ǃAnu khoe-i hoa-i ge gāxaǃnâ khoena xu i nî hâbē ǃkhaisa ge ǁkhāǁkhāsen. ǁÎ-i ge gâ ǂâidi ga gowaǂuihe, o ǁnāpa hâ tide tsî ǂhanuoǃnâsib ga dīhe, o ǃgâise tsâ tide.

Elob ge sada ra ǃhoana a ǂan

6 Gā-aisib ge khoen ǃoa khoexaǃnâ gagaba, xaweb ge Elob ǃoagu ra ǃhoa khoe-e ǀûba tide, Elob sada tsâsigu tsî ǂâide ǂan tsî mâ mîs sada dis hoasa ra ǁnâu xui-ao. 7 ǃKhūb di gagab ge hoaraga ǃhūbaiba ra ǀoaǀoa tsîb ge ǁîb ǃnâ hâ xūn hoana ǃkhōǁare tsî khoen ra mî xūn hoana a ǂan. 8 ǁNā-amagab ge Eloba khoe-i ga ǂkhaba xū-e mîo, hoaǁae a ǂan. Nēsi tamas ka i, xaweb ge Eloba nē khoena nî ǁkhara. 9 Xorexūsa khoen di ǂâibasendi ge ǂōrisase nî ôaǃnâhe; ǁîn di mîdi ge ǃKhūba nî mîbahe tsîn ge ǁîn ǂkhabasib ǃoaǂui hâ ǁkharaba nî ǃkhōǃoa. 10 Elob ge ǁgoaǂui-i xare-e taniǀnam tide tsî mâ xū-i hoa-eb ra ǁnâu xui-ao du ge sadu mâǃoaxasiba ǁîba xu a sâu ǁoa. 11 ǁNā-amaga Elob xa ǃgaesens ge ǃgâi-e hā-ū tama tsî ui-uisa ǃhoan ǃnâ ǃkhana tama hâ. Hoan ǃgâ-aits ǂganǃgâsib ǃnâ ra mî xūn ge ǁîn tsū ǃaromade nî ūhâ tsî ǂhumib ge sa ǀomsa nî hîkākā.

Elob ge ǁōba ǂnûiǂgā tama hâ

12 Tā sa ǁorexa dīgu ǀkha sa ǂhunuma ǁōba ǃaroma. 13 Elob ge ǁōba ǂnûiǂgā tama tsî ûitsaman di ǁōb ǃnâ ǃgâiǃgâibasen-e ūhâ tama hâ. 14 ǁÎb ge mâ xū-i hoa-e hâhâ i nîse ge kuru tsî ǁîb ge kuru xū-i hoa-i ge ǀoasa tsî a ǃgâi. ǁŌǁōsa ǃgā-i ge ǁî-i ǃnâ hâ tama hâ. Hî-î, ǁōb ge nē ǃhūbaiba gaoǂam tama hâ, 15 Elob di ǂhanu-aisib a ǁōǁoasa xui-ao.

16 Eloxoresa khoen ge ǁîn di mîdi tsî dīgu ǀkha, ǁōba aitsama ǁîn ai ge hā-ū. ǁÎn ge ǁōba ǀnamsabe-i khami ra ǁkhore. ǁÎn ge ǁōb ǀkha ǃgaeǀhaosa ge dī tsî ǁnāsan ge ǁîna ǃoaǂui hâ.