Hosea 4 - Khoekhoegowab New Translation 2020 (KKG20)

ǃKhūb di ǀhapiǂnûiǀkhās, Israeli ǃoagu

1 Israelǁaese ǁnâu re ǃKhūb di mîsa, ǂnoagu-eb ǃhūb di ǁanǂgāsaben ǀkha ūhâ xuige. “ǂGomǂgomsasib, hâhâ ra ǀnammi tsî Eloba ǂans ge ǃhūb ǃnâ a ǀkhai. 2 Nūs, ǂhumib, ǃgams, ǃnarib, ǃgamekhôas; nēn ge ī ra xūna, tsîb ǀaoba ǀaob xa ra saohe. 3 ǁNā-amagab ge ǃhūba nî ǂnâ tsîn ge ǁîb ǃnâ hân hoana nî ǁō; ǃgarob di xamarin tsî ǀgurun, ǀhommi di anin tsî ǁkhāti hoaraga ǁaun hurib din ge nî ūbēhe.”

ǃKhūb ge pristera ra ǀhapiǂnûiǀkhā

4 Xawe a-i tā khoe-e nau khoe-e ǀhapiǂnûiǀkhā, sadu on ǁnān hîa pristera ra ǀhapiǂnûiǀkhān khami ī xuige. 5 Sats ge tsēa nî ǃnôa tsîb ge kēbo-aob ona tsuxuba nî ǃnôa tsî ta ge tita sa îsa nî hîkākā. 6 Ti ǁaes ge ra hîkākāhe, ǂans ǃnubusib xa. ǂAnsats ǂhara hâ xui-ao ta ge tita nî ǂhara tsi pristersets tita ǃoaba tidese. Tsî Elob ǂhanubats ǀuru hâ ǃkhais ǃaroma ta ge sa ôana nî ǀuru.

7 “ǀArosen gu ra khami gu ge pristerga ti ǃoagu ra ǁore; ǂkhaisib âga ta ge taosib ǃnâ nî ǀkharaǀkhara. 8 ǁÎgu ge ti ǁaes di ǁoren ai ra ǂû; tsî gu ge ǃûǂamdi âna ra tura. 9 ǁAes ī khamib ge pristeri ona nî ī tsî ta ge daogu âb ai sari bi tsî dīgu âb ama nî mādawa-am bi. 10 ǁÎn ge nî ǂû, xawen ge ǁâ tide, ǀain nî xawen ge ǀarosen tide, ǃKhūba ǃkhōǀgaipesan ge ǁnāǃgâ amaga.”

ǃKhūb ge ǀūbe eloǃoabasa ra ǂhara

11 ǃKhūb ge ra mî: “ǂAuxûi-i ge, nēsi i ga ǀasas, ǀoro i kas hoasa ti khoen ǁnâuǃāba ra ūbē. 12 Ti ǁaes ra hais ân ai dî tsîs ǁgâibasenhais âna ǃereamsa ra mā. ǀAigagas ge ǁîna ge ǂgaeǂhapu tsîn ge ǀai-aosis ǃaroma ǁîn Eloba ge ǁnāxū. 13 ǃHomgu ǂamǃnân ra ǁguibade dī, ǃnâugu ai ǀanna, aikehaidi ǃnaka, populirhaidi ǃnaka tsî terpentinhaidi ǃnakab ge ǃgâi somma hâ.

“ǁNā-amaga di ge sadu ôade ra ǀai tsî di ge ǃgametarade ra ǃgamekhôa. 14 Sadu ôade ta ge ǀai-aosis ǃaroma tsî ǃgametarade ǃgamekhôas ǃaroma ǀgoraǃgâ tide. Aorekhoegu ǂûgu ra ǀai-aodi ǀkha ūǂuisen tsî tempelǀai-aodi ǀkha ǁguiba; ‘ǁaes ǁnâuǃā tamas ge nî hîkākāhe.’

15 “Sadu Israeli didu ga ǀai xawen tā Judab dina ǀhapixa; î tā Gilgals ǁga ǃgû tsî Bet-Avens ǁga ǃgûǃapa tsî ‘ǃKhūb ûitsama ǃkhais ao’ ti nū. 16 Israeli ge ǃnâudanaxa tsâu-i khami a ǃnâudanaxa. Mâtib ǃKhūba nî ǃû kai, ǁkhao-i hara ǃkhai-i ai hâ-i khami? 17 Efraimmi ge ǁgôa-elogu ǀkha ǃgaeǁaresen hâ; ǁîba ǁnāxū re! 18 Ātoan ga on ge ra ǀai; ǁîn ge ǃgôaoǃnâsiba ǂkhaisib xa a ǀnam. 19 ǂOab ge ǁîna ǁgabogu âb ǃnâ ǁgaboǂgā hâ tsîn ge ǁguibadi ân xa ra tao.