Elob ra Israelsa ǁaposasiba mā
1 Elob ge ra mî:
“ǃNū ǃhūb dido, ǃnō î ǃgâ te!
A di ǁaede ǀasa ǀgaiba ǁkhawa hōbasen;
an ǃgûǀgū tsî ǃhoa;
a da ǀgoraǃgâs ǃaroma ǀhao.
2 “Tari-e aiǂoas danaoba ge khâikhâiǃnâ-e,
ǁîba ǁîb ǃoabas ǃoa ge ǂgaihā-e?
ǁÎb ge ǁaede ǁîb ǃoa ra ǁkhaeǁnâ
tsî gao-aoga ra ǃgamǃgam.
ǁÎb ge ǁîna gôab âb ǀkha tsarab khami ra dī,
khās âb ǀkha ǃgommahe ra ǀhōb khami.
3 ǁÎb ge ǁîna sauruǃgon tsî ǂhanihe tamase,
ǁîb ǂaira ra ǁaubexa ǃhūba tsâǀkhāse ra ǃkharu.
4 Tariba nēsa ī kai tsî ge dība,
ôananôaguga tsoatsoasa xu ge ǂgaiba?
Tita ǃKhūta ge ǂguro ta,
tsî ǀuniga nî hâ ta.
5 “ǃNū ǃhūgu khoen ge nēsa mû tsî ge ǃao,
ǃhūbaib ǀkhâuǀamdi ge ǃaob xa ge ǀkhū.
ǁÎn ge ǀgūǀgūsen tsî ge hā.
6 Mâ-i hoa-i ge nau-e ra hui,
tsî ǁîǃnābe ra mî ‘ǀGaiba ūhâ!’ ti.
7 Sîsenaob ge ǃhuniǀurikuru-aoba ra ǂgaoǂgaoǃnâ,
tsî ǁnāb hamers ǀkha ra ǂnauǂhanuǂhanub
ge ǃgâuǁare raba ra ǂgaoǂgaoǃnâ.
Nēti ra mîse ‘Nēs ge a ǃgâi,’ ti;
tsî ǁî-e gon-i tidese spaikern ǀkha ra ǃgâuǁapoǁapo.
8 “Xawe sats Israeltse, ti ǃgātse,
Jakotse, tita xa ge ǁhûiǂuihetse,
ti horesab Abrahammi suritse.
9 Satsa ta ge ǃhūbaib ǀkhâuǀamde xu ge hā-ū
tsî ǁîdi a ǃnū ǁhôade xu ge ǂgaihā,
tsî sats ǃoa ge mî: ‘Sats ge ti ǃgātsa,
tita ge ge ǁhûi tsi tsî ǂhara tsi tama hâ.
10 Tā ǃao, tita sats ǀkha hâ xuige,
tā ǃaoǃaohe, tita a sa Elo xuige!
Tita ge ǀgaiǀgai tsî nî hui tsi,
tita ge ti ore ra amǀkhāb ǁôab ǀkha nî ǁkhauba tsi.’
11 “Mû, sa ǃoagu ge ǁaixa hâ in
ge taotaohe tsî nî ǁauxūdīhe.
Sa ǃoagu ra ǃkhamn hoan
ge xū tamase dīhe tsî nî ǁō.
12 Sa mâǃoasabenats ge nî ôa,
xawets ge ǁîna hō tide;
sats ǃoagu ra torodīn
ge hoaragase nî ǁauxū kai.
13 Tita ǃKhūta sa Elota,
amǀkhāb ǃommi âtsa nî ǃkhō xui-ao;
Tita ge sats ǃoa ra mî ta
‘Tā ǃao, tita ge nî hui tsi,’ ” ti.
14 Tā ǃao re Jakotse, sa ǂunirots, Israelǁîtse!
ǃKhūb ge ra mî: “Tita ge nî hui tsi,
sa Ore-aob ge Israeli di ǃAnuba.
15 Mû, tita ge ǃgao-ūdas gôab khami nî ǀāǀā tsi,
ǀasa ǀā gôaga ūhâ ǁgûgu ǀkha;
ǃhomga ǃgao tsîts ge ǁîga nî ǂkhūǂkhū
tsî ǃnâuga ǀhōb khami nî tsautsau.
16 Sats ge ǁîna ǂoab ǃnâ nî aokhâi,
on ge ǂoab xa nî ǃgombēhe;
ǁgaoǂoas ge ǁîna nî ǃgomǀgaruǀgaru.
Ots ge ǃKhūb ǃnâ nî ǃgâiaǂgao;
Israeli di ǃAnub ǃnâts ge nî dâ.
17 “ǀGâsan tsî ǂhâsib ǃnâ hân ge ǁgam-e ra ôa,
xawe i ge nî ǀkhai tsî gu ga namga ǁgâs xa ǂnâ,
o ta ge tita ǃKhūta ǁîna nî ǃeream;
tita Israeli Elota ge ǁîna ǁnāxūǃgâ tide.
18 Tita ge ǃgora-ai ǃnâugu ai ǃāga nî dâu kai
tsî ǀaude ǃgoaǃnāgu ǁaegu;
ǃgaroǃhūba ta ge ǃkhubis ase nî dī
tsî ǂnâsa ǃhūba ǁgamǀause.
19 Sederhaisa ta ge ǃgaroǃhūb ǃnâ nî ǁhai kai,
tsî ǁkhāti akasiahais, mirtehais tsî ǀkherahais tsîde;
ǃam haiǀgoms ge ǃgaroǃhūb ai nî ǁhai,
denehais, siprehais tsî bushais tsîdi hoade.
20 Hoan ge mû tsî nî ǂan,
hoan ge ǂâiǃgâ tsî nî ǁnâuǃā,
ǃKhūb ǃommi ge nēsa dī ǃkhaisa,
Israeli di ǃAnub ge ǁîsa ge kuru.”
ǃKhūb ra ǁgôa-elogu xa ǁgoaǂuihe
21 ǃKhūb ge ra mî: “Sadu ǁhōba ǀkhī-ū.”
Jakob Gao-aob ge ra mî: “Sadu ǂnoagu-aide hā-ū.
22 An ǁîna ǀkhī-ūhe tsî tare-i nî īsa mîba ge.
ǃKharu ge xūn xa ǁgamba ge,
taren a ǁîna ǃkhaisa, ǁîn xa da nî ǂâiǃgâse.
Mâti i go ǁîn ǀkha hāsa da nî ǂan,
tamas ka io hā nîse ī xūn xa ǂansa.
23 Tare-i nēs khaoǃgâ nî īsa mîba da,
elogo asa da nî ǂanǂuiga;
ā, ǃgâi tamas ka io tsūse dī,
î da ǀkhūb tsî ǃaob xa xāǂgāhe.
24 Amase, sadu ge xūtama tsî sadu sîsenni hoab tsîn;
sado ge ǁhûiǂui-i ge a taotaosa!
25 “Tita ge ǀguib ǀapasǀkhāb diba ge khâikhâiǃnâ, tsîb ge ge hā;
soreǁhaisǀkhāba xub ge ti ǀons xa ge ǂgaihāhe.
ǁÎb ge ǂgoab ais khami ǂgaeǂgui-aoga nî dā-ai,
sūǂnubi-aob ra ǂgoaba dī-ū khami.
26 Tari-e tsoatsoasa xu ǁnāsa ge mîǁgui-e,
ǁîsa da nî ǂan tsî mî ǁkhāse: ‘ǁÎb ge a ǂhanu.’
Khoe-i xare-i ǁnāsa mîǁgui tama,
khoe-i xare-i aoǁnâ tamas ka io sa mîde ǁnâu tama.
27 Tita ǃKhūta ge ǂgurose Sionsa ge ǂanǂan ta
tsî Jerusalemsa ta ge ǀgui ǃgâiǂhôasa ra mā.
28 Xawe kō ta ge, o ta ge khoe-i xare-e mû tama ge i;
ǁîgu ǃnâ i ge ǀapemā-ao-i xare-e ge ǀkhai i,
dî ta ra xū-i xare-e ge ǃeream ǁkhā i-e.
29 Ā, hoan ge xū tama hâ;
ǁîn sîsengu ge a ǁau;
ǁîn īgu ge ǂoab khami a ǀkhaiǃnâ.
© Khoekhoegowab Elobmîs © Bible Society in Namibia, 2020.
