Eksodus 23 - Khoekhoegowab New Translation 2020 (KKG20)

ǂHanu-aisib tsî ǀguitikōsib

1 “Tā ǂhumi ǂhôana ǃhoama, tā ǀhapixa khoe-e ǂhumi ǀhûǀguitimîsa mās ǀkha hui. 2 Tā ǂkhaba, î ǃnāsa khoen, ǂkhababa ra dīn tamas ka io ǂhanu-aisiba ra māǃoana ǂkhâǃnâ. 3 Tā ǀgâsa khoe-i di ǁnâuǃgâs tawa ǁî-i ǀkhāb aits mâ ǃkhaisa ǁgau.

4 “Sa khākhoe-i di goma-i tamas ka io dâuki-ets ga kāma i ra hîa mû, o ǁî-e sa khākhoe-e oasī-ūba. 5 Satsa ǁkhan hâ khoe-i di dâuki-i ga tani i hâ ǃgommi xa ǁnāǂnû, o tā mû tsî ǃkharu ǂgao, xawe ǁî-e hui î-i i ǁnā dâuki-e ūǁnâǀkhā tsî huikhâi.

6 “Tātsēs tsîna tā ǂhanu-ai ǀgoraǃgâsa ǀgâsa khoe-e ǀgoraǃgâǃkhaib ǃnâ ǀhana. 7 Tā khoe-e ǂhumiǂgā-am, tā ǀhapio tsî ǂhanu-ai khoe-e ǁōb ǁkharaba ǁgui-ai. ǁNāti ī ǂkhaba xū-e ra dī khoe-i hoa-e ta ge ǀûba tide. 8 Tā ǀhôagao xū-i tamas ka io ǃnarimari-i ǀkha ǁamaǃkhunihe, nēs ra mâisana ǂhanu-aisib ǃoa ǂgī kai tsî ǂhanu-aisib ǀhapio khoen diba ǀhana xui-ao.

9 “Tā ǃhaokhoe-e ǁgaise ûi-ū; ǃhaokhoesis tsâ ǀgausa du ge ǀnai a ǂan, Egipteb ǃnâ du ge ǃhaokhoe i xui-ao.

Hûǁî kurib tsî hûǁî tsēs

10 “ǃNani kuriga du ge sadu ǃhanaga ǂgā tsî ǂûna nî ǃgaobasen. 11 Xawe hûǁî kurib ai ǁîga ǁnāxūǁgui, î tā ǁhai ra ǂûna ǃgao, xawe ǀgâsa khoenan ǁnāpa xu ǂû, tsî ǃgau ra ǂûn ge xamarin xa nî hapuhe. ǁNās ǁkhāsa sadu draibeǃhanagu tsî ǀkherahaidi ǀkha dī re.

12 “Wekheb ǃnâ ǃnani tsēde sîsen, xawe hûǁî tsēs ai tā sîsen-i xare-e dī, în sa ǃgān tsî satsa ra sîsenba ǃhaokhoen tsî ǁkhāti sa goman tsî dâukin tsîna sâ ǁkhā.

13 “Hoaraga xūn hîa ta go tita ǃKhūta mîn xa ǂanbasen. Tātsēs tsîna tā ǀnî eloga ǂgaiǀî tamas ka io a gu tā sadu amǁgaugu ais tsîna ǁnâuhe.

Kurikorobe hâ ǃnona kai ǁâudīgu xa hâ ǁgaragu

(Eksodus 34:18-26Deuteronomium 16:1-17)

14 “Kurib ǃnâ ǃnona ǁaudīga ti ǃgôasib ǃoa dī. 15 Egipteba xu du gere ǃnoraǃnorahe ǁkhâb, Abib ǃnâ du ge khūkhū-e ūhâ tama Pere-i ǁÂudība tita ge mîmā khami nî tsēdī. Hû tsēdi ǁâudīb didi ǃnâ tā khūkhū-e ūhâ pere-e ǂû. Tātsēs tsîna tā ǁguiba-e ǃomǃkhō tamase tita hā ǀgoreǀî.

16 “ǃGaos ǁaeb ga ǀoao, o ǃGaos ǁÂudība ǁâudī.

“Kurib di ǀams ai ǀHaoǀhaos ǁÂudība tsēdī. Nēb ge ǁaeba ǀuni ǂûn sadu sîsenni diba du draibeǃhanaga xu ra ǀhaoǀhaoba. 17 Nēgu ge ǃnona ǁâudīgu, hoaraga aorekhoegu kurib hoaba ǃKhūb sa Eloba nî ǀgoreǀîǃnâga.

18 “Tā ǀgoa-i hîats ra ǁguiba-i di ǀaoba khūkhū-e ūhâ pere-i ǀkha ǁguibaǁare. Tsî nē ǁguibadi ǁaeb ai ra ǁguibahe ǀgoan di kauba tā sao ra ǁgoas kōse ūhâ.

19 “Kurikorobe sadu ǂguro ǂoaǂamsa ǃhanaǂûn hîa du ra ǃgaona ǃKhūb sadu Elob ommi tawa hā-ū.

“Tā ǁkhao-i tamas ka io piriro-e ǁî-i îs di dai-i ǃnâ sâi.

Mîmâidi tsî ǁgui-aidi

20 “Mû, tita ge satsa aimâba tsî nî ǁkhaeba tsi ǀhomǃgāb, mîmâisa ǃkhaib ǃoa nî ǂgaeǂgui tsiba sa daob ai nî sî. 21 ǁÎba ǃgâ, î du hoaraga ǁgui-aidi hîab ǁîba ra mā dude ǁnâuǀnam. Tā ǁîb ǃoagu khâikhâisen, ǁîb ti ǁkhāsib hoaba ūhâ tsî sadu dīsādi tsîna ǀkhomxa du tide xuige. 22 Xawe du ga ǁîba ǁnâuǀnam tsî tita ra mîmā du xūn hoana dīo, o ta ge sadu khākhoen hoan ǃoagu nî ǃkham. 23 Ti ǀhomǃgāb ge sado aimâba tsî Amorǁîn, Hetǁîn, Perisǁîn, Kanaanǁîn, Hivǁîn tsî Jebusǁîn tsîn di ǃhūb tawa nî sī-ū tsî ta ge tita ǁîna nî hîkākā. 24 Tā ǁîn di eloga ǃhonǁgoaba tsî ǀgoreǀî, tsî tā ǁîn di ǃoabaǁnaetiga ūbasen, xawe du ge ǁîn di eloga hîkākā tsî ǁîn di ǃanu ǃoaba-ai ǀuiǂgurihaiga nî khôaǃā. 25 Tita ǃKhūta sadu Elota ǀguita du ga ǀgoreǀîo, o ta ge ǂâu hâ ǂûn tsî ǁgam-i ǀkha ǀkhae du tsî hoaraga ǀaesenain âdo nî ūbē. 26 Sadu ǃhūb ǃnâs ge ǀgui tarekhoes tsîna ǁgôa-aǃnâ tide. ǂOmxa kurigu di ûiba ta ge nî mā du.

27 “Sado ra mâǃoa khoena ta ge kai ǃaob ǀkha nî ǃnamiǂgā; tsî sadu xa ra ǃkhamhe ǁaes hoasa nî ǀgommaǂâi kai, în dabasen tsî ǃkhoeni. 28 Tita ge sadu khākhoen, Hivǁîn, Kanaanǁîn tsî Hetǁîn tsîna ǁkhapisa aba kai tsî sadu nî sīs aiǃâ nî sauruǂui. 29 Xawe ta ge ǁîna ǂguro kurib ǃnâ sauruǂui tide; ǁnāsa ta ga dī, ob ǃhūba nî ǃgaroǃgaro tsî ega xamarin tsî ǀgurun xa ǀgui gaohe xui-ao. 30 ǁNā-amaga tita ra ǁîna ǂkhariǂkharibese sauruǂui hîa du ge sado ǂâu hâ ǃgôab ǃnâ ǂgâxa tsî ǃhūba hā nî ǁanǃnâ. 31 Sadu ǃhūb di ǃhūǀgorade ta ge ǀApahuriba xu Mediteraneahurib kōse tsî Sinaiǃgaroǃhūba xu Eufratǃāb kōse nî khoraǂui. Tita ge ǁnā ǃhūb di ǁanǂgāsabena sadu ǃomgu ǃnâ nî māǁnâ, aitsama du ǁîna nî sauruǂuise. 32 Tātsēs tsîna tā ǁîn tamas ka io ǁîn di elogu ǀkha ǀhûǀgui-e dī. 33 Tā ǁnā khoena mā-am sadu ǃhūb ǃnâ ǁansa; ǁnāsa du ga dī, on ge ǁîna sado ti ǃoagu ǁore kai tsî sado ǁîn di eloga du nî ǀgoreǀîse nî ǃnui.”