ǃKhūb di ǂhanub
1 ǀKhaehen ge hâ ǁnān ûib ân a ūon,
ǃKhūb di ǂhanub ǃoa ra ûina.
2 ǀKhaehen ge hâ ǁnān ǁîb mîmāde ǃkhōǀgaipe
tsî ǂgaob hoab ǀkha ǁîba ra ôana;
3 ǁkhāti ǂhanuoǃnâsi-e dī tama
tsî ǃKhūb daogu ǃnâ ra ǃgûna.
4 Sats ge ge mîmā
sa ǂnûiǂgādi nî ǂgomǂgomsase ǁnâuǀnamhesa.
5 Î gu ga ti daoga ǁaposa hâ,
sa ǁguiǂamde ǁnâuǀnams ǃnâ.
6 O ta ge taotaohe tide,
sa mîmādi hoadi ai ta ga ǃgaoǃgâo.
7 Satsa ta ge ǂhauǃnâ ǂgaob ǀkha ra koa,
sa ǂhanu-ai ǀgoraǃgâde ra ǁkhāǁkhāsense.
8 Sa ǁguiǂamde ta ge nî ǃkhōǀgaipe;
tā hoaragase ǁnāxū te re.
ǃKhūb di ǂhanuba ǁnâuǀnams
9 Mâti i ǂkhamkhoe-e daob â-e ǃanuse nî ūhâ?
Sa mîs ǃoa i ga ûio.
10 Ti ǂgaob hoab ǀkha ta ge ra ôa tsi;
tā a ta sa mîmāde xu ǁnāǁgôa re.
11 Sa mîsa ta ge ti ǂgaob ǃnâ ra sâu,
sa ǃoagu ta ǁore tidese.
12 ǀKhaehets ge hâ ǃKhūtse
sa ǁguiǂamde ǁkhāǁkhā te re.
13 Ti amǁgaukha ǀkha ta ge
sa ams di ǀgoraǃgâdi hoade ra ǂanǂan.
14 Sa mîmādi di daob ǃnâ ta ge nî ǃgâiaǂgao,
ǃnāsa ǃkhūsiba ūhâs ǃgâ-ai.
15 Sa ǂnûiǂgādi ǂama ta ge nî ǂâiǂâisen
tsî sa daogu ai ti ǂâisa nî ǂnûi.
16 Sa ǂhanugu ǃnâ ta ge ra ǃgâiǃgâisen,
sa mîsa ta ge ǀuru tide.
ǃKhūb di ǂhanub ǃnâ hâ ǃgâiaǂgaob
17 Sa ǃgāta ǃgâidī re,
î ta ûi tsî sa mîsa ǃkhōǀgaipe re.
18 Ti mûra ǁkhowa-am re,
î ta sa ǂhanub ǃnâ hâ buruxana mûhō ǁkhā.
19 ǃHaokhoe ta ge ǃhūbaib ai;
sa mîmāde tā tita xu sâu re.
20 ǁKhoreb xa ta ge ra hapuhe
sa ǀgoraǃgâdi dib xa, hoaǁae.
21 Sats ge ǀâxaresa ǃguriǂgaoxana ra ǀau,
ǁnān sa mîmāde xu ra ǁnāǁgôana.
22 ǃHōb tsî ǃharaxūba tita xu ūbē re
sa mîmāde ta ra ǃkhōǀgaipe xuige.
23 ǂGaeǂgui-aon ga tita ǃoagu nî ǀapeǀhaose ǂnû,
xawe ta ge sa ǃgāta sa ǁguiǂamdi xa nî ǂâiǂâisen.
24 Sa mîmādi ge ti ǃgâiaǂgao;
ǁîn ge a ti ǀapemā-ao.
ǃKhūb di ǂhanuba ǁnâuǀnams
25 Ti ǀoms ge tsarab ai ra ǂae;
sa mîs ǃoa ǁkhawa ûi-ûi te re.
26 Ti daoga ta ge ǃhoaba tsi ots ge ge ǁnâu-am te;
sa ǁguiǂamde ǁkhāǁkhā te re.
27 Sa ǂnûiǂgādi di daoba ǁnâuǃās ǃoa hui te re,
sa buruxadīn xa ta nî ǂâiǂâisense.
28 Ti ǀoms ge ǃoab xa ra ǂkhabu,
sa mîs ǃoa ǀgaiǀgai te re.
29 Gāxaǃnâsib daoba tita xu ūbē
î sa ǂhanuga ǀkhomxase ǀkhae te re.
30 ǂHauǃnâsib daoba ta ge ge ǁhûi;
sa ǀgoraǃgâde ta ge ra ǃgaoǃgâ.
31 Sa mîmādi ai ta ge ǃkhōbasen hâ ǃKhūtse;
tā taotao te re.
32 Sa mîmādi di daob ai ta ge turaxase ra ǃgû;
sats ra ti ǂgaoba harahara xui-ao.
ǁNâuǃāb ǃaroma hâ ǀgores
33 ǃKhūtse sa ǁguiǂamde ǁkhāǁkhā te re;
ǀams kōse ta ǁîde nî dīǀoaǀoa ǁkhāse.
34 Sa ǂhanuba ta nî dīǀoaǀoase gā-aisiba mā te re,
î ta ti ǂgaob hoab ǀkha ǃkhōǀgaipe ǁkhā.
35 Sa mîmādi di daob ai ǂgaeǂgui te re,
ǁîb ǃnâ ta ra ǃgâiaǂgao xuige.
36 Sa mîmādi ǃoa ti ǂgaoba unu;
xūǃgunuxasib ǃoas ose.
37 Ti mûra ǁkhae, î ra tā harebeoǃnâ xūna kō;
sa daogu ai ûitsamase ūhâ te.
38 Sa ǃgātats ge dība mîmâisa dīǀoaǀoa re;
sats nî ǃaoǃgâhese.
39 ǁÎsa ta ra ǃao ǃhōhesa tita xu ūbē
sa ǀgoraǃgâdi a ǃgâi xuige.
40 Sa ǂnûiǂgāde ta ge ǁkhore hâ;
sa ǂhanu-aisib ǃnâ ûi-ûi te re.
ǃKhūb di ǂhanuba ǂgomǃgâs
41 Sa hâhâ ra ǀnamma tsâtsâ kai te re ǃKhūtse;
sa ǃgâiǃōsiba ǁgau te re sa mîmâis ǃoa,
42 î ta tita ra ǃhōna ǃeream ǁkhā,
sa mîs ai ta ra ǂgomǃgâ xui-ao.
43 Tā sa ǂgomǂgomsa mîsa hoaragase ti amsa xu ūbē re,
sa ǀgoraǃgâdi ai ta ti ǃâubasensa ra ǃammâi xuige.
44 Sa ǂhanuba da ge hugaǀgui ra ǃkhōǀgaipe ǂgao,
ǀamosiba xu ǀamosib kōse.
45 O ta ge ǃnorasase nî ǃgû,
sa ǂnûiǂgāde ta ge ôa amaga.
46 Sa mîmādi xa ta ge gao-aogu aiǃâ nî ǃhoa
tsî ta ge tao tide.
47 Tita ge ra ǃgâiaǂgao sa mîmādi
ǁîde ta a ǀnamdi ǃnâ.
48 Ti ǃomkha ta ge ra ǀhōǂui
sa mîmādi ǁîde ta a ǀnamdi ǃoa,
tsî ta ge sa ǁguiǂamdi xa ra ǂâiǂâisen.
ǃKhūb di ǂhanub ǃnâ hâ ǂgomǃgâs
49 Sa ǃgābats ge mîba mîsa ǂâihō re
ǁîs ǀkhats ge ǃâubasensa mā tesa.
50 Nēs ge ti tsâb ǃnâ ǁkhaeǂgaos ase ība te,
sa mîmâis ra ûi-ûi tesa.
51 ǀGapiǂâixan ge kaise ge ǃhō te,
xawe ta ge sa ǂhanuba xu dabasen tama ge i.
52 Sa ǀgoraǃgâdi ǃkharu ge ǁaeb dide ta ra ǂâi,
o ta ge ǃKhūtse, sats ǃnâ ra ǁkhaeǂgaosen.
53 ǁAixasib ge tita ge hāǂam,
ǂkhaba khoen, sa ǂhanuba ra ǁnāǃgân ǃaroma.
54 Sa ǁguiǂamdi ge tita ǁnaetsanase ge ība,
ǃhaokhoese ta ge hâ ipa.
55 ǃKhūtse sa ǀons xa ta tsuxuba ra ǂâihō,
o ta ge sa ǂhanuba ra ǃkhōǀgaipe.
56 Nēs ge tita ūhâsa:
Sa ǂnûiǂgāde ta ge ra ǃkhōǀgaipe.
ǃKhūb di ǂhanuba ǁnâuǀnams
57 ǃKhūtse sats ge a ti ǃâ
tita ge sa mîde ta nî ǃkhōǀgaipe ti ge mî.
58 Sa aisa ta ge ti ǂgaob hoab ǀkha ra ôa
mîmâis âts ǃoa ǀkhomxa te re.
59 Ti daogu xa ǂâi tsî ta ge
sa mîmādi ǃoa ti ǂaira ge unu.
60 Tita ge ge ǃnoeǃnoesen
tsî ta ge ǀhabe tama ge i, sa mîmāde ǁnâuǀnamsa.
61 Eloxoresan di ǃhâugu ge ge ǃgaeǃnon te,
xawe ta ge sa ǂhanuba ǀuru tama ge i.
62 Tsuxuǃgâb ai ta ge satsa nî koasa māse ra khâi,
sa ǂhanu-ai ǀgoraǃgâdi ǃaroma.
63 Satsa ǃaoǃgâba ūba hân hoan di ǀhōsa ta ge;
ǁnān sa ǂnûiǂgāde ra dīǀoaǀoana.
64 ǃKhūtse sa hâhâ ra ǀnammi ge ǃhūbaiba ra ǀoaǀoa;
sa ǁguiǂamde ǁkhāǁkhā te re.
ǃKhūb ǂhanub di ǁkhāsib
65 ǂHanusets ge sa ǃgāta ǀkha ge dī ǃKhūtse,
sa mîs ǃoa.
66 ǃGâi ǀgoraǃgâs tsî ǂansa ǁkhāǁkhā te re,
sa mîmādi ai ta ra ǂgomaiǂnûi xuige.
67 ǃGamǃgamhe ta nîs aiǃâ ta ge ge kā hâ i,
xawe ta ge nēsi sa mîsa ra ǃkhōǀgaipe.
68 Sats ge a ǃgâi, tsî ǃgâise ra dī;
sa ǁguiǂamde ǁkhāǁkhā te re.
69 ǀGapiǂâixan ge ǂhumib ǀkha ge ǀuriǀuri te,
xawe ta ge tita ti ǂgaob hoab ǀkha sa ǂnûiǂgāde ra ǃkhōǀgaipe.
70 ǂGaogu ân ge kaub kōse a hōǃâoǃnâ,
xawe ta ge sa ǂhanub ǃnâ ra ǃgâiǃgâisen.
71 Tita i ge a ǃgâiba ǃgamǃgamhe ta ge ǃkhaisa
sa ǁguiǂamde ta nî ǁkhāǁkhāsense.
72 Sa amsa xu hâ ǁkhāǁkhās ge a ǃgâiba te
ǀoadisi ǀhaiǀurib tsî ǃhuniǀurib xa.
ǃKhūb ǂhanub di ǂhanu-aisib
73 Sa ǃomkha ge ge kuru te, ge ǂnubi te
ǁnâuǃāba mā te, sa mîmāde nî ǁkhāǁkhāsense.
74 Satsa ra ǃaoǃgân ge tita mû tsî ra ǃgâiaǂgao,
sa mîs ai ta ra ǃâubasen xui-ao.
75 ǃKhūtse sa ǀgoraǃgâdi a ǂhanu-ai ǃkhaisa ta ge a ǂan
tsî ǂgomǂgomsasib ǃnâts ge ǃgamǃgam tesa.
76 Ab sa hâhâ ra ǀnamma tita ǁkhaeǂgaose ība re,
sa ǃgātats ge mîmâiba khami.
77 Ab sa ǀkhomxaǂgaosiba hāǂam te, ûi ta nîse;
sa ǂhanub a ti ǃgâiaǂgao xuige.
78 An ǀgapiǂâixan ǂhumib ǀkha ra tsûtsû tena taotaohe;
sa ǂnûiǂgādi xa ta ra ǂâiǂâisen hîa.
79 An ǁnān satsa ǃaoǃgâba ūba hâna tita ǃoa oahā,
ǁnān sa mîmāde ǂanna.
80 Ab ti ǂgaoba ūose sa ǁguiǂamde ǃnâ ī re,
taotaohe ta tidese.
Ores di ǀgores
81 Ti ǀoms ge sa oresa ǁgâ hâ;
sa mîs ai ta ge ra ǃâubasen.
82 Ti mûra ge sa mîmâidiǀî ǁgâ hâ;
tsî “Mâǁaets nî ǁkhaeǂgao te?” ti ra dî.
83 ǀAnni ǃnâ hâ khōǁhō-i khami ta go ī xui-ao;
sa ǁguiǂamde ta ge ǀuru tama hâ.
84 Mâtikō ǁaebab sa ǃgāba nî tsâ?
Mâǁaets tita ra ǃgôaǃgonna nî ǀgoraǃgâ?
85 ǀGapiǂâixan ge ǁnoade ge ǁguiba te
sa ǂhanuba ǁnâuǀnams di mâǃoas ase.
86 Sa mîmādi hoadi ge a ǂgomǂgomsa;
ǁîn ge ǂhumib ǀkha tita ra ǃgôaǃgon.
Hui te re!
87 ǁÎn ge ǃhūbaib ai ge hîkākā te ǁga;
xawe ta ge tita sa ǂnûiǂgāde ǁnāxū tama ge i.
88 Sa hâhâ ra ǀnammi ǃoa ǁkhawa ûi-ûi te re
sa ams di mîmāde ta nî ǃkhōǀgaipese.
ǃKhūb di ǂhanub ǃnâ ǂgoms
89 ǃKhūtse, sa mîs ge ǀamose
ǀhommi ǃnâ, ǁaposase hâ.
90 Sa ǂgomǂgomsasib ge ǃhaosa xu ǃhaos kōse hâ
sats ge ǃhūbaiba ge ǃgaoǃgao, tsîb ge ǁaposase mâ.
91 Sa ǀgoraǃgâdi ǃoa nētsēs kōse hâ
hoan a sa ǃgā xui-ao.
92 Sa ǂhanub ga ti ǃgâiaǂgao tama hâ,
o ta ge tsūǀkhāb ǃnâ ga kāǁō hâ.
93 ǀAmosib kōse ta ge sa ǂnûiǂgāde ǀuru tide
ǁîdi ǃnâ-uts ge ûi-ûi te amaga.
94 Tita ge a sa, ore te re;
sa ǂnûiǂgādi ǃoa ûisa ta ra ôa-am xuige.
95 Eloxoresan ge hîkākā ten nîse ǃâu te hâ;
sa mîmādi ai ta ge ra ǃgaoǃgâ.
96 Hoaraga xūn dīǀoaǀoasasiba ūhân ǀnōǁguisa ǃkhaisa ta ge ge mû,
xawe sa mîmādi ge kaise a ǂhaba.
ǃKhūb ǂhanuba ǀnams
97 Mâtikōse ta kha ǂhanuba ǀnam!
Hoaraga tsēsa ta ge ǁîb xa ra ǂâiǂâisen.
98 Sa mîmādi ge ti khākhoen ǃgâ-ai ra gā-ai kai te
hoaǁae di tita ǀkha hâ xui-ao.
99 Tita ge ti ǁgauǃnâ-aon hoan ǃgâ-ai a ǁnâuǃāxa
sa mîmādi tita ǂâiǂâisenxūse ība amaga.
100 Kairan xa ta ge ǃnāsa ǁnâuǃāba ūhâ
sa ǂnûiǂgāde ta ra dīǀoaǀoa amaga.
101 Ti ǂaira ta ge mâ ǂkhaba daob hoaba xu ge ūdaba;
sa mîsa ta nî ǃkhōǀgaipe ǁkhāse.
102 Sa ǀgoraǃgâde xu ta ge ǁnāǁgôa tama ge i;
sats ra ǁkhāǁkhā te xui-ao.
103 Mâtikōse di a ǂkhon sa mîde ti ǂkharub ai
danib ǃgâ-ai ti amǃnâ.
104 Sa ǂnûiǂgāde xu ta ge ǁnâuǃāba ra hō;
ǁnā-amaga ta ge mâ ǂhumi dao-i hoa-e ǁkhan hâ.
ǃKhūb ǂhanuba xu hâ ǃnâb
105 Sa mîs ge ti ǂaira ǃamǀaese ība
tsî ǃnâse, ti ûib di daob ai.ǃAmǀaes
106 Tita ge nūsa ge dī tsî ta ge ǁîs ai mâ:
Sa ǂhanu-ai ǀgoraǃgâde ta nî saosa.
107 Kaise ta ge ge tsâ
ǃKhūtse sa mîs ǃoa ûi-ûi te re.
108 Ti ams di māsenxa ǁguibade di sa aiǃâ ūǃoasa re ǃKhūtse,
î sa ǀgoraǃgâde ǁkhāǁkhā te re.
109 Ti ûib ge hugaǀgui ti ǃomǁae hâ;
sa ǂhanuba ta ge ǀuru tama hâ.
110 Eloxoresan ge ǁnoa-e ge ǁguiba te
xawe ta ge sa ǂnûiǂgāde xu ǁnāǁgôa tama ge i.
111 Sa mîmāde ta ge hâhâ ra ǀumis ase ge ǃkhōǃoa;
ǁîdi ge ti ǂgaob di ǃgâiaǂgaob ase ī.
112 Ti ǂgaoba ta ge sa ǁguiǂamde dīǀoaǀoas ai ra ǃammâi
ǀamosiba xu, ǀunis kōse.
ǃNorasasib, ǃKhūb di ǂhanub ǃnâ
113 ǀGamǂgaona ta ge ǁkhan hâ,
xawe ta ge sa ǂhanuba ǀnam.
114 Sats ge ti gauǃkhai tsî a ǁkhaukhō
sa mîs ai ta ra ǃâubasen xui-ao.
115 Tita xu bē, sa ǂkhabadī-aodo
î ta ti Elob di mîmāde ǁnâuǀnam ǁkhā.
116 Sa mîmâis ǃoa ǂkhâǃnâ te re, o ta ge nî ûi;
tā ti ǃâubasens ǃnâ taotao te re.
117 ǂKhâǃnâ te, î ta orehe re;
o ta ge hugaǀgui sa ǁguiǂamde nî ǃgaoǃgâ.
118 Sats ge sa ǁguiǂamde xu kāǁhapu hân hoana ra ǂhara;
gāxaǃnâsib ân ge a ǂhumi.
119 Sats ge ǃhūbaib di ǂkhaba khoen hoana ǀapob ase ra ǃgôa;
ǁnā-amaga ta ge sa mîmāde a ǀnam.
120 Ti soros ge satsa ǃaob xa ra ǀkhū
sa ǀgoraǃgâde ta ge ra ǃao.
ǃKhūb ǂhanuba ǁnâuǀnams
121 Tita ge ǂhanu tsî a ǂhanu-aina ge dī
tā ǁgâiǀā-aona māǁnâ te re.
122 Sa ǃgāta di ǃgâiba ǁapoǁapo re;
an ǀgapiǂâixana tā ǁgâiǀā te.
123 Ti mûra ge sa oresa ǃkhēs xa ǂkhabu hâ,
tsî sa ǂhanu-aisib mîmâis di dīǀoaǀoahes xa.
124 Sa hâhâ ra ǀnammi ǃoa sa ǃgāta dī-ū re,
î sa ǁguiǂamde ǁkhāǁkhā te.
125 Sa ǃgāta ge, xuige ǁnâuǃāba mā te re,
î ta sa mîmāde ǂan ǁkhā.
126 Nēb ge ǃKhūb di ǁaeb, sîsenni nîba;
khoen sa ǂhanuba ra khôa xui-ao.
127 ǁNā-amaga ta ge sa mîmāde a ǀnam,
ǃūmû ǃhuniǀurib ǃgâ-ai.
128 Tsî ta ge sa ǂnûiǂgāde ta ra ūǃoa xui-ao
hoa daogu ǂkhabab diga ǁkhan hâ.
ǃKhūb ǂhanuba ǁnâuǀnams ǃoa hâ turab
129 Sa mîmādi ge a buruxa
ǁnā-amaga ta ge tita ǁîde ra ǃkhōǀgaipe.
130 Sa mîdi ge ǁkhowa-amsen di kao,
ǃnâba ǁau khoena ra mā.
131 Ti amsa ta ge harase ge khoba
sa mîmāde ta ǁgâ hâ xui-ao.
132 Tiǀî dabasen î ǀkhomxa te re,
ǁnān sa ǀonsa ra hoaǁae ǂgaiǀîn ǀkhats ra dī khami.
133 Ti dāǃharode sa mîs ǀkha ǁapoǁapo re
î-i ǂkhaba-i xare-e tā tita ǂama ǀgaiba ūhâ.
134 Khoen di ǁgâiǀāba xu ore te re
î ta sa ǂnûiǂgāde ǃkhōǀgaipe ǁkhā.
135 Sa aisa sa ǃgāta aiǃâ ǃnâ kai re,
î sa ǁguiǂamde ǁkhāǁkhā te re.
136 Ti mûra xu gu ge ǁgamǃāroga ra dâuǁgôa,
khoen sa ǂhanuba ǃkhōǀgaipe tama ǃkhais ǃaroma.
ǃKhūb ǂhanub di ǂhanu-aisib
137 ǃKhūtse sats ge a ǂhanu-ai
tsî ǂhanu di a sa ǀgoraǃgâde.
138 Sats ge sa mîmāde ǂhanu-aise,
kai ǂgomǂgomsasib ǃnâ ge mîmā.
139 Ti ǀaexasib sa mîdi dib ge ra hapu te,
ti mâǃoasaben ga ǁîde ǀuruo.
140 Sa mîs ge ǀoasase a ǃanuǃanusa
tsî ta ge sa ǃgāta ǁîsa a ǀnam.
141 Tita ge ǂkhari tsî a ǃharaxūsa,
xawe ta ge sa ǂnûiǂgāde ǀuru tama hâ.
142 Sa ǂhanu-aisib ge ǀamose a ǂhanu-ai
tsî sa ǂhanub ge a ama.
143 ǂŌǂōsib tsî ǃaob ra hāǂam te
xawe ta ge sa mîmādi ǃnâ ra ǃgâiǃgâisen.
144 Sa mîmādi ge hoaǁae a ǂhanu-ai
ǁnâuǃāba mā te, î ta ûi ǁkhā re.
Ores di ǀgores
145 Ti ǂgaob hoab ǀkha ta ge ra ǂgai:
“ǃKhūtse ǁnâu-am te re
sa ǁguiǂamde ta ge nî ǃkhōǀgaipe.”
146 Sa ǃoa ta ge ra ǂgai:
Hui te re,
o ta ge sa mîmāde nî ǃkhōǀgaipe.
147 ǁGoaǃaroma khâi tsî ta ge ra huiǂgai,
sa mîs ai ta ra ǃâubasen xui-ao.
148 Ti mûra ge tsuxuǃûidi ai ra ǃâu
sa mîsa nî ǂâiǂâisense.
149 Sa hâhâ ra ǀnammi ǃaroma ti domma ǁnâu re;
sa mîmâis ǃoa ûi-ûi te re ǃKhūtse.
150 ǂKhaba ǀapede ra sauruǃgonn ge tita ra ǀgū;
ǁîn ge sa ǂhanuba xu ǃnūse ra hâ.
151 Xawe sats ǃKhūts ge ǀgūse hâ,
tsî di ge sa mîmādi hoade a ǂgomǂgomsa.
152 Sa mîmāde xu ta ge ǀnai a ǂan
ǀamosets ge ǁîde ǃgaoǃgaosa.
Huib ǃaroma hâ a ǀkhomas
153 Ti ǀkhomǀkhomsasiba mû, î ore te re;
sa ǂhanuba ta ǀuru tama hâ xuige.
154 Ti ǁhōba ǂnoaguba te, î ore te re,
sa mîmâis ǃoa ûib ǃnâ ūhâ te re.
155 Ores ge ǂkhaba khoena xu a ǃnū;
sa ǁguiǂamden ôa tama amaga.
156 ǃKhūtse sa ǀkhomxaǂgaosigu ge a kai
sa ǀgoraǃgâdi ǃoa ti ûiba sâu re.
157 ǁNān tita ra ǃgôaǃgonn ge a ǂgui
xawe ta ge sa mîmāde xu ǁnāǁgôa tama hâ.
158 ǂGomoǃnâna mû tsî ta ge ge ǀara
sa mîmâisan ǃkhōǀgaipe tama ǃkhais xa.
159 Sa ǂnûiǂgāde ta ǀnam ǃkhaisa ǃgaoǃgâ re ǃKhūtse
sa hâhâ ra ǀnammi ǃaroma ti ûiba sâu re.
160 Amab ge a sa mîs di dana ǃkhai,
tsîs ge mâ ǂhanu-ai ǀgoraǃgâs âts hoasa a ǀamo.
ǃKhūb di ǂhanub ǃoa a ǁgui-aisens
161 ǀGaib ǃharodi ǃnâ hân ge ǃaromaoǃnâse ra ǃgôaǃgon te,
xaweb ge ti ǂgaoba sa mîs ǀguisa ǃgôasiba ūba hâ.
162 Sa mîs ǃnâ ta ge ra ǃgâiaǂgao
kai ǁuiba go hō khoe-e khami.
163 Tita ge ǂhumiba ǁkhan hâ
xawe ta ge sa ǂhanuba a ǀnam.
164 Hû ǃnāde ta ge tsēs ǃnâ ra koa tsi
sa ǂhanu-ai ǀgoraǃgâdi ǃaroma.
165 Kai ǂkhîb ge ǁnān sa ǂhanuba ǀnamna hâba
ǁîn tawa i ge ǃnôa-aiǃnao-e a ǀkhai.
166 Sa ores ai ta ge ra ǃâu ǃKhūtse
sa mîmāde ta ge ra dīǀoaǀoa.
167 Sa mîmāde ta ge ra ǃkhōǀgaipe
tsî ta ge ǁîde kaise a ǀnam.
168 Sa ǂnûiǂgādi tsî mîmāde ta ge ra ǃkhōǀgaipe,
ti daogu hoagu sa aiǃâ hâ xui-ao.
Huib di ǀgores
169 As ti ǀkhomas di āsa sa tawa sī re ǃKhūtse,
sa mîs ǃoa ore te re.
170 As ti ǀkhomabasensa sa aiǃâ sī re
ore te re sa mîmâis ǃoa.
171 Ti amǁgaukha ge koasa ra ǀōǂoa kai;
sa ǁguiǂamdets ra ǁkhāǁkhā te amaga.
172 As ti namsa sa mîs xa ǁnae;
sa mîmādi hoadi ge a ǂhanu-aisi.
173 Ab sa ǃomma tita huise ība re,
sa ǂnûiǂgāde ta ǁhûiǂuibasen hâ xuige.
174 Sa oresa ta ge ǁkhore hâ ǃKhūtse,
sa ǂhanub ge a ti ǃgâiaǂgao.
175 Ûitsamase ūhâ te re, î ta koa tsi ǁkhā
îs sa ǀgoraǃgâsa hui te ǁkhā.
176 Kā hâ gū-i khami ta ge kā hâ,
sa ǃgāta ôa re, mîmādi âtsa ta ǀuru tama xuige.
© Khoekhoegowab Elobmîs © Bible Society in Namibia, 2020.
