Hamanni ge Jodeǁînab nî hîkākā ǃkhaisa ra ǀapeǀape
1 ǁAe-i khaoǃgâb ge gao-aob Ahasverosa, Hamedatab ôab, Haman ti ǀon hâ Agagǁîba hoadi xa ǀgapi ǃharosa gao-ommi ǃnâ ge mā. 2 Gao-aob ge ǁîb ǃoabas ǃnâ mâ ǂamsagu hoaga ge mîmā, Hamanni aiǃâ gu nî ǃgamǃgâsa, ǃgôasiba gu ǁîba nî ǁgause. ǁÎgu ge Mordekaib, Hamanni aiǃâb nî ǃgamǃgâ ǃkhaisa ge ǂkhāb ǀguib ose, hoatsama ǁnāti ge dī. 3 Nau ǂamkhoegu gao-aob ǃoabas ǃnâ ge mâ i gu ge Mordekaiba ge dî: “Tare-i ǃaromats gao-aob mîmāsa ra ǃûǂam?” 4 Tsēsa xu tsēs ǁga gu ge ǁîba gere ǃhoaǁnâdana ǂgao, xaweb ge ǁîga ge ǃgâ ǂgao tama hâ i. Tsîb ge “Tita ge a Jodeǁî tsî ta ge Hamanni aiǃâ a ǃgamǃgâ ǁoa” ti ge ǃeream. ǁNā-amaga gu ge Hamanna, Mordekaib ge gao-aob mîmāsa ǁnâuǀnamoǃnâ ǃkhaisa ge mîba, î gu kō iseb Mordekaiba nē ǃkhais ǀkha nî aiǃgû ǃkhaisa. 5 Mordekaib ǁîb aiǃâ ǃgamǃgâ tsîb ǃgôasiba mā bi tama ǃkhaisab ge mû, ob ge Hamanna kaise ge ǁaixa. 6 Tsîb ge Mordekaib a Jodeǁî ǃkhaisab ge ǂano, ǁîb ǀguiba tama i tsîb Jodeǁîn hoana gao-aob Ahasverosi di gaosib hoab ǃnâ nî ǃgamǂui ǃkhaisa gere ǀapeǀape.
7 Disiǀgamǀaǁî kurib gao-aob Ahasverosi ǂgaeǂguis dib ǃnâ, ǂguro ǁkhâb Nisanni ǃnâb ge Hamanna ge mîmā, îs Pursa aohe, ǁnās ge ǀkhūsa, îb ǂhunuma tsēs tsî ǁkhâb tsîra, ǁîra aib Jodeǁîna nî ǃgamǂuira ǂanǂui. Disiǃnonaǀaǁî tsēs disiǀgamǀaǁî ǁkhâb, Adari dis ge ǂhanu tsēs ase ge mîǁguihe.
8 Ob ge Hamanna gao-aob Ahasverosa ge mîba: “ǂAnǂansa ǁaes di khoen ge hoa ǀkharigu sa gaosib hoab digu ǃnâ ǀgarusase hâ, xawen ge nau khoena xu ra ǀgorasen. ǁÎn ǂhanugu ge nau khoen diga xu a ǀkhara. ǁNās ǀgui tamas, ǁîn ge gaosib ǂhanugu tsîna ǁnâuǀnam tama hâ tsî sats ge ǁnāsa mā-am tide. 9 ǃGôahesatse, ǁnās xats ga ǃgâibahe, o mîmā-e māǂui în ǁîna ǃgamǂuihe. O ta ge tita ǃnonakaidisi tsî hakadisiǀoadisi kiloxramgu ǀhaiǀuriba gao-aosi ǁuiǂgaes ǃnâ gaosib sîsengu di aiǃgûs ǃaroma nî ǂgā.”
10 Gao-aob ge ǁîb ǀkhunuǂnûidas, xoasa ǂanǂandi gere ǁapoǁapo-ūhesa ǀkhunub âba xu ūǁnâ tsî Jodeǁîn di khākhoeb, Hamanni, Hamedatab ôab, Agagǁîba ge mā. 11 Tsîb ge gao-aoba “ǁNā ǀhaiǀuriba ūhâ, îts ǂgaots ra khami ǁnā ǁaes ǀkha dī” ti Hamanna ǃoa ge mî.
12 Disiǃnonaǀaǁî tsēs ǂguro ǁkhâb dis aib ge Hamanna gao-aob xoa-aoga ǂgaiǀhao tsî ǂanǂansa, gaosib ǃnâ ǂansa gowa-i hoa-i tsî xoa-ai-i hoa-i ǃnâs nî ǂnûiǃkhunihese ge khomaiba; ǂgaeǂgui-aogu tsî ǃhūǃkhōmâi-aogu ǃoas nî sîǂuihese. Nēs ge gao-aob Ahasverosi ǀons ǃnâ māǂuihe tsî gao-aob di ǀkhunuǂnûidas ǀkha ge ǂganamǀgaiǀgaihe. 13 Sîǂkhanitani-aogu ge mâ ǀkharib gaosib dib hoab ǃoa nē ǂanǂansa ge ǃgû-ū. Nē ǂanǂans ge ǀgui mîǀguisa tsēs, disiǃnonaǀaǁî tsēs disiǀgamǀaǁî ǁkhâb, Adari dis ain hoaraga Jodeǁîn ǂkhamn tsî kairan, aoregu, taredi tsî ǀgôan tsîn hoana nî ǃgamǂuihe tsîn ǁîn xūna nî ūhe ǃkhaisa ge ǃkhōǂgā hâ i.
14 ǃKhōǂgāb nē ǂhanub dib ge mâ ǀkharib hoab ǃnâ nî ǂanǂanhe în hoaraga khoena ǂan, î-i mâ-i hoa-e ǁnā tsēs ǃaroma ǂhomisen hâse hâ.
15 Nē mîmās gao-aob dis ge ǁkhāti ǃhaese ǂhôa-aogu xa kai ǃās Susas ǃnâ ge ǂanǂanhe. Gao-aob tsî Hamanni tsîkha ge ǂauxûi-e ǂnôa gere ā, xawe kai ǃās Susas di khoen ge kaise ge burugâ hâ i.
© Khoekhoegowab Elobmîs © Bible Society in Namibia, 2020.
