ǃNaeǃkhaidi di ǀunis
1 “ǁNā ǁaeb ǃnâb ge kai ǀhomǃgāb Mixaeli, sa ǁaes ǂama ǃûisa ūhâba nî ǂhai. ǁNā ǁaeb ge kaise nî ǃgom, ǃhaodi ge hâ isa xu i ge tātsēs tsîna ī tama hâ i khami. ǁNā ǁaeb ǃnân ge sa ǁaes din hoan hîa Elob di ǂkhanis ǃnâ xoamâisana nî sâuhe. 2 ǂGuin, ǀnai ge ǁōn din ge ǁkhawa nî khâimâ; ǀnîna ǀamo ûib ǃoa tsî ǀnîna ǀamo taosib tsî ǃharaxūb ǃoa. 3 ǁNâuǃāxa ǂgaeǂgui-aogu ge ǀhommi di ǂkhaib ǀkha nî ǂkhai. Tsî ǁnāgu, ǂgui khoena ge ǂhanu daob ai a ǂgaeǂguigu ge ǀamos kōse ǀgamirodi khami nî ǂkhai.”
4 “Sats Danieltsa, ǂkhanisa ǂganam, îts ǁîsa ǂaoǂgan ǃhūbaib di ǀams nî hās kōse. ǂGuin ge nēna nî ǂanǂui ǂgao tsîs ge ǂansa nî ǀarosen.”
5 ǁNās khaoǃgâ ta ge tita Danielta ǀgam khoekha ǃāb amǃgâ ge mûma, ǀguiba nēǀkhāb ǃāb dib ai tsî ǀguiba nauǀkhāb ai. 6 Ob ge ǁîkha di ǀguiba, ǁgammi ǂamai mâ ǀhomǃgāba ge dî: “Mâ ǁaeb ain kha nē buruxa xūna nî ǀam?”
7 Ob ge ǁgammi ǂamai ge mâ i ǀhomǃgāba ǁôakha âba ǀhommiǀî ūkhâi tsî Elob, ǀamose ûi hâb tawa ge nū: “Nēn ge ǃnona tsî ǃkhare kurigu ǁaeba nî ū. ǃAnu ǁaes di ǀgaib ga hoaragase hîkākāhe, on ge nēn hoana nî ǀam.”
8 ǁNâu ta ge, xawe ta ge ǁnâuǃā tama ge hâ i. ǁNā-amaga ta ge ge dî: “ǃGôahesatse, mâtin kha nē xūna sī nî ǀam?”
9 Ob ge ǁîba ge ǃeream: “Danieltse satsa nēsi ǃgû re, nē mîdi ge a ǂganamsa tsî ǀams nî hās kōse ǂganǃgâsase nî hâ xuige. 10 ǂGui khoen ge ǃanuǃanuhe tsî nî ǃuriǃurihe. Eloxoresan ge ǁnâuǃā tide tsî ǃaruǀî eloxoresase nî tanisen. ǁNâuǃāxan ǀguin ge nî ǁnâuǃā.
11 “Tsēkorobe ǁguibadi ga ǀûhe tsî i ui-uisa xū-e nî mâihe ǁaeba xu di ge ǀguiǀoadisiǀgamkaidisi tsî khoesedisi tsēde nî ǃkharu. 12 ǀKhaehesan ge ǁnān, ǀguiǀoadisiǃnonakaidisi tsî ǃnonadisikoroǀa tsēdi nî ǃkharus kōse ǂgomǂgomsase nî hâna.
13 “Xawe satsa ǀams kōse ǂgomǂgomsase hâ. Sats ge nî ǁō, xawets ge ǁkhawa nî khâi tsî ǂnûiǂuibahets hâ amǃnâsa ǀuni ǁaeb ai nî ǃkhōǃoa.”
© Khoekhoegowab Elobmîs © Bible Society in Namibia, 2020.
