ǃKhūb ge Koresa ra ǁgaumâi
1 Nētib ge ǃKhūba ǀnausabeb âb, Koresi,
ǁôab âba ta ge ǃkhōb, ǁîb aiǃâ ta ge ǁaede ǃgamǃgammi
tsî gao-aoga saragu âga ǀhanab, dao-amde ǁîb aiǃâ ǁkhowa-am
tsî di ǂganamhe tideba ra mî:
2 “Sa aiǃâ ī tsî ta ge ǃhomga nî ǂhauǂhau,
bronsdao-amde ta ge ǃârodi ǃnâ nî ǂnauǃā
tsî ǁîdi ǀuriga nî ǂnaukhôa.
3 ǃKhaenab ǃnâ hâ ǁuigu tsî ǀhôagaose sâusa ǃkhūsigu tsîga ta ge nî mā du;
tita ǃKhūta, Israeli Elota ǀons âdu ai ge ǂgai du ta
a ǃkhaisa du nî ǂanse.
4 Ti ǃgāb Jakob tsî ti ǁhûiǂuisabeb Israeli ǃaroma
ta ge ǀons âdu ai ge ǂgai du;
ǃgôasib ǂgaiǂamsa ta ge ge mā du,
ǂan te tama du ge hâ i xawe.
5 “Tita ge ǃKhūta, ǀkhara-i a ǀkhai;
ti xōǀkhā i ge ǀnî elo-e a ǀkhai.
Tita ge ǁâtani du ra ta,
ǂan te tama du ge hâ i xawe.
6 Î du soreǁhaisa xu huriǂoas kōse
ǂan ti xōǀkhā i ǀkhara elo-e a ǀkhaisa.
Tita ge ǃKhūta
tsî i ǀnî-e a ǀkhai.
7 Tita ge ǃnâba ǂnubi tsî ǃkhaenaba ge kuru,
tita ge ǃgâiǃgâba kuru tsî ǂōǂōsiba ge hā-ū.
Tita ǃKhūta ge nē xūn hoana ge dī.
8 ǀHomgo, ǀgapiseba xu ǀapi re,
î gu ǃāǂuisaga ǂhanu-aisiba ǀapiǁnâ.
Ab ǃhūbaiba ǁkhowa-amsen, îs oresa ǀkhī;
tsî as ǁîsa ǂhanu-aisiba ǃīǂoa kai,
tita ǃKhūta ge ǁîna kuru xuige.”
ǃKhūb kurus tsî ǃnaeǃkhaidi tsîra dib
9 Tsūba ǁnā khoe-i, ǁî-i Kuru-aob ǀkha ra ǂnoagu-e,
sūǃâro-e sūkuru-ao-i ǀkha!
ǂGoaba ǁîb kuru-aob ǃoa
“Tare-ets ra dī?” tamas ka io,
“Sa sîsenni ge ǃkhō-ūdaga ūhâ tama hâ,” ti mî ǁkhāb a?
10 Tsūba ǁnāb hîa ǁgûb ǃoa
“Tare-ets a ǁgûba? Tamas ka io, ǁgûs ǃoa
Tare-es ra ǁora?” ti ra mîba.
11 Nētib ge ǃKhūb Israeli di ǃAnub,
tsî ǁîb Kuru-aoba ra mî:
“Ti ôan ǃaroma du ra dîǃnâ te,
tamas ka io ti ǃomkha di sîsenni
ǃaroma du kha ra mîmā te?
12 Tita ge ǃhūbaiba ge kuru ta,
ti ǃomkha ge ǀhomma ge khoraǂuikha
tsî ta ge ǀhommi ǃnâdi hoade ge mîmā.
13 Tita ge Koresa ǂhanu-aisib ǃaroma ge ǂkhaiǂkhai
tsî daogu hoagu âba nî ǂhauǂhau.
ǁÎb ge ti ǃāsa omkhâi tsî ti ǃhūsabena nî ǃnoraǃnora,
matares tamas ka io mādawa-ams ǃaromas ose,”
tib ge ǃKhūb Hoaǀgaixaba ra mî.
14 Nētib ra ǃKhūba mî:
“Egipteb ǃkhūsib, Etiopiab marib,
tsî kaimâ hâ Sabeǁî khoegu tsîn hoan ge
sats tawa hā-ūhe tsî nî sa kai.
ǁÎgu ge khedesase satsa sao
tsî sa aiǃâ nî ǃhon.
ǁÎgu ge satsa ǀkhoma tsî nî mî:
‘Elob ge sats ǀkha hâ tsî ǀnî elo-i ge ǀkhai,
ǁîb xōǀkhā i ge ǀkhara elo-e ǀkhai.
15 Amase, sats ge ǂganǃgâsib ǃnâ ra ūhâsen,
Israeli Elo, Ore-aotse!
16 ǁGôa-elokuru-aon ge nî ǀgomaǂâi kaihe
tsî ǁîn hoan ge nî taotaohe.
17 Xawe ǃKhūb ge Israela
ǀamo ǃgâiǃōsib ǀkha nî ore.
ǁÎb ge ǀamosib kose tātsē taotaohe tide.’ ”
18 Nētib ra ǃKhūb ǀhomma ge kurub,
ǁîb ǀguib a Elob,
ǃhūbaiba ǂnubi tsî ge kurub,
ǁîba ge ǃgaoǃgaob,
xawe ǀhomaxase ǁîba kuru tamab,
xawe ǁîba ǁanǃnâs ǃaroma ge ǂnubiba mî xui-ao:
“Tita ge ǃKhūta
tsî ǀnîb xareb ge a ǀkhai.
19 Tita ge ǂganǃgâsib ǃnâ ǃhoa tama hâ,
tamas ka io ǃkhaenab ǃhūb ǃnâs tsîna.
Jakob surib ǃoas tsîna ta ge
‘ǁAuse ôa te,’ tis tsîna mî tama hâ.
Tita ǃKhūta ge amaba ra ǃhoa,
tita ge ǂhanu xū-e ra ǂanǂan.”
ǃHūbaib di ǃKhūb tsî Babilons elogu
20 “ǀHaoǀhaosen, î du ǀhûǀhao,
ûiǃgau ge ǁaeso, ǀgūǀgūsen!
Hai-eloga ra taniman
ge ǂan-i xare-e ūhâ tama hâ
tsî ore tama elo-e ǀû tamase ra ǀgoreǀî!
21 Hā, î sadu ǁhōba ǂanǂan;
an ǁîna ǀapeǀhao!
Tari-e nēsa ǀnai ge ǂanǂan?
Tita, ǃKhū tama ta?
ǀKhara elo-i ge ti xōǀkhā a ǀkhai,
ǂhanu-ai Elota, Ore-aota ǀgui ta;
ǀnî-i ti xōǀkhā a ǀkhai.
22 “Tita ǃoa oahā, î sâuhe,
hoaraga ǃhūbaib ǀkhâuǀamso hoaso!
Tita a ǃKhū
tsî ǀnî-i xare-i ǀkhai xuige.
23 Amase ta ge ge nū,
ti amsa xus ge ǂhanu-aisib mîs,
ǁkhawa oa tidesa ge ǂoa:
‘Mâ ǁgoas hoas ge ti aiǃâ nî ǃhon,
mâ nammi hoab ge nî ǁguiǁnâ.’
24 “ǃKhūb ǃnâ ǀgui-i ge tita xa nî mîhe,
ǁîb dikha ge ǂhanu-aisib tsî ǀgaib tsîkha.
ǁÎb ǃoagu ra khâikhâisenn hoan
ge ǁîb tawa hā tsî nî taotaohe.
25 ǃKhūb ǃnâb ge Israeli surib hoaba
ǁîb ǃnâ dan tsî ǁîba nî koa.
© Khoekhoegowab Elobmîs © Bible Society in Namibia, 2020.
