1 Korinteǁîn 7 - Khoekhoegowab New Translation 2020 (KKG20)

ǃGameb xa hâ dîdi

1 Tsî xoa du ge xūn xa ta ra ǃeream.

Khoeba i ge a ǃgâiba, tarekhoe-i ǀkha ǁgoe tama isa. 2 ǀAib di ǃaorosasib ǃaromab ge mâ aob hoaba ǁîb di ǂhunuma tarasa nî ūhâ tsî mâ taras hoasa ǁîs di ǂhunuma aoba. 3 A ra aob tsî taras hâra ǁîra sorosi ǂhâga dīǀoaǀoabagu, ǃgamesi-aiǂhanuga i a anuba khami. 4 Taras ra ǁîs aoba ǁîs di soros ǂama ǀgaiba mās ǁkhās khamib ge aoba ǁîb tarasa soros âb ai ǀgaiba nî mā. 5 Tā saro ǁnâugusa xu ro ǁaeroba ǀgores ǃnâ nî hâs ǃaroma tamas ka io, ǁîǃnābe ǃgamesi-aiǂhanuga xu ūdabasen, îb Satanna* saro ǁkhaesenǁoasib xa ǃaromahe hâse tā ǃâitsâ ro.

6 Nēsa ta ge ǀapemās ase ra mî tsî mîmās ases ose. 7 Xawe ta ra ǁkhores ge hoa khoen nî tita khami īsa, xawe i ge mâ-i hoa-e ǀō-aisa mās, khoe-e xu khoe-i ǁga ra ǃkharagasa Eloba xu ge ǃkhōǃoa.

8 Xawe ta ge ǃgame taman tsî ǃoataradi tsîna ra mîba tita khamin nî ǃgame tamase hâ ǃkhais a ǃgâisa. 9 Xawe ǁkhaesen ǁoan kao, an ǃgame. ǃGames ge turab xats nî khaus ǃgâ-ai a ǃgâi.

10 ǃGame hâna ta ge tita mîmā tama hâ, xawe ǃKhūb ge ra mîmā, taras aoba xu ǀgora tidesa. 11 Tsîs ga aoba xu ǀgora, os ge ǃgame tamase nî hâ, ǁnā tamas ka ios ge aob ǀkha nî ǂkhîbagu; tsîb ge aoba taras âba ǀgoraxū tide.

12 Tsî nauna ta ge tita ra mîba, ǃKhūb mî tama. ǂGomsabeb ga ǂgomoǃnâ tarasa ūhâ tsîs ga ǁîsa ǁîb ǀkha ǁanǀhaosa māsenxao, ab ǁîba tā ǁîsa ǀgoraxū. 13 ǂGomsabes ga ǂgomoǃnâ aoba ūhâ tsîb ga ǁîba ǁîs ǀkha ǁanǀhaosa māsenxao, as ǁîsa tā ǁîba ǀgoraxū. 14 ǂGomoǃnâ aob taras ǃnâ-u ǃanuǃanuhe hâ tsî ǂgomoǃnâ taras aob ǃnâ-u ǃanuǃanuhe hâ amaga. ǁNāti i ga ī tama io, on ga sadu ôana ǃanuoǃnâ hâ, xawen ge nēsi a ǃanu. 15 ǂGomoǃnâ-i ga ǀgora ǂgao-o, a i ǀgora. ǂGom ra-i ge ǁnās ka īo, ǀguipa hâsa ǁgui-aihe tama hâ. Xaweb ge Eloba ǂkhîb ǃnâ ûis ǃoa ge ǂgai da. 16 Sas tarasa, mâtis a ǂan, sa aobas nî ǃgâiǃō kai ǃkhaisa? Tsî sats, aotsa, mâtits a ǂan, sa tarasats nî ǃgâiǃō kai ǃkhaisa?

Elob ge ǂgai du khami ûi

17 A i mâ-i hoa-e ǃKhūb ge ǂgaiǃnâ-i ǀgaub ǃnâ ûihâhâ, tsî Elob xa i ge ǂgaihe ǀgaub ai tanisen. Nēs ge hoa kerkhegu ǃnâ ta ra mîmā ǃkhaisa. 18 ǃGaohe hâse ga Elob xa ǂgaihe khoe-e, a i tā ǁî-i ǃgaosa* ǀkharaǀkhara ǂgao. ǃGaohe tamase ga ǂgaihe-e, a i tā ǃgao kaisen. 19 ǃGaohes tamas ka io ǃgaohe tama is ge xū tama, xawe Elob mîmāde ǁnâuǀnams ge a ǂhâǂhâsa. 20 A i mâ-i hoa-e ǁîs ǃnâ i ge ǂgaihe ǂgais ǃnâ hâhâ. 21 Khobosets ga ǂgaiheo, tā ǁîs xa ǂâiǂhansen tsî ǃnora ǁkhāts kao, ǁnā soasa sîsenū. 22 ǃKhūb ǃnâ khobose ǂgaihe hâ-i, ǃKhūb ǃnâ a ǃnorasa xuige. ǁNās ǁkhās xase i ge ǃnorasase ǂgaihe hâ-e a Xristub* di khobo. 23 ǃGomǀgausase du ge ǁamahe hâ, xuige tā khoen di khobo kai re. 24 ǁNā-amaga ǃgâsado, mâ ǀgaub ǀguib ai du ga ǂgaihe hâ, xawe Elob xa du ge ǂgaiǃnâhe mâsib ǃnâ hâhâ.

ǃGame taman tsî ǃoataradi xa hâ dîdi

25 Tsî oaxaedi ǂama ta ǃKhūb di mîmā-e ūhâ tama, xawe ta ti ǂâiǀgauba ra mā, tita ǃKhūb xa ǂgomǂgomsa ta nîse ǀkhomxahe hâta.

26 Nēsi hâ ǃgomsigu ǃaroma ta ge ǃgame tamase hâs a ǃgâi, ti ra ǂâi. 27 ǃGamets ga hâo, tā ǀgora ǂgao tsî ǃgame tamats ka io, tā tara-e ôa. 28 Tsî ǃgamets ka, ob ge ǁnāba ǁore tama hâ tsî oaxaes ga ǃgame os ge ǁore tama hâ, xawen ge ǁnān ǃgame rana ǃgomsiga nē ûib ǃnâ nî tsâ tsî ta ge sado ǁnāsa xu ra sâu ǂgao.

29 Ti ǃgâsado, nēn ǀkha ta ra ǂâibasens ge ǁaeb a ǃnubusa. ǁNā-amaga gu aogu hîa tarade ūhâga, ūhâ tamagu ase ûi 30 în ā rana ā taman ase, ǃgâiaǂgao rana ǃgâiaǂgao taman ase tsî ǁama rana ūhâ taman ase ī. 31 ǁNān hîa nē ǃhūbaib di xūn ǀkha ǁae hân ge ǁîn ǀkha ǁae tama khami nî ûi, nē ǃhūbaib sada xab nēsi ǂanhe khami gaxuse hâhâ tide tsî nî ǃgû-ī xui-ao.

32 Xawe ta ge ǂhansens ose du nî hâ ǃkhaisa ra ǁkhoreba du. ǃGame tama hâb ge ǃKhūb din xa ra ǂhansen, mâtib nî ǃKhūba ǂkhîǂkhî ǃkhais xa. 33 Xawe ǁnāb hîa ǃgame hâb ge ǃhūbaib din tsî mâtib nî taras âba ǂkhîǂkhî ǃkhais xa ra ǂhansen. 34 Tsîs ge ǁîb di ǂâisa ǀgam ǃkharaga ǃâra ǃnâ ǀgorasa.

ǃGame tama tarekhoes tamas ka io oaxaes ge ǃKhūb din xa ra ǂhansen, mâtis nî soros tsî gagas ǃnâ ǃanu ǃkhais xa, xawes ge ǃgame hâsa ǃhūbaib din tsî mâtis nî aob âsa ǂkhîǂkhî ǃkhais xa ra ǂhansen.

35 Tsî ta ge nēsa sadu di ǃgâiba ǃoa ra mî. Sado ta ra ǁkhae-amo tama, xawe sadu nî ǃgâi tsî ǂhanu xūna dī tsî ǂhanixū-i ose ǃKhūba ǃoabas ǃnâ ǀoasase mâisense.

36 Khoeb ga ǃgamebab mîmâiba hâ oaxaes ǃoagub ra anu tamase tanisen ti ǂâi tsîb ga turab âba kaise ǀgaisa tsîb ga kurin âs ra ǀgapi ǃkhaisa mûo, a ra ǃgame ǁore tamab xuige. 37 Xawe khoeb ga ǂgaob âb ǃnâ mâǁapo, ǂhâsi-i xare-e ūhâ tama i tsî turab âb ǃnâ ǃkhōdabasen tsî ǂgaob âb ǃnâ ǃgamebab mîmâiba hâs nî oaxaese hâ ǃkhaisa mîǁguio, ǁnāb ge ǃgâise ra dī. 38 ǁNā-amaga, ǁnāb oaxaes ǀkha ra ǃgameb ge ǃgâise ra dī, xawe ǁnāb ǁîs ǀkha ǃgame tamab ge ǁnās ǃgâ-ai ǃgâise ra dī.

39 Taras ge ǁîs aob ǀkha ǁîb a ûitsamas kōse ǃgaeǁarehe hâ, xawe aob âs ga ǁō, os ge a ǃnorasa ǂgaos ra khoeb ǀkha ǃgamesa, xaweb ge ǃKhūb ǃnâ nî ǂgom. 40 Xawe ti ǂâiǀgaub ǃoas ge ǃnāǂamsase ǃgâiǃgâxa, ǃgame tamases ga hâo. Tsî ta ge tita tsîn Elob di Gagaba ūhâ ti ra ǂâi.