Judab Makabaeub di ǃkhamdi
(1 Makabergu 3:1-26)1 Judab Makabaeub tsî ǁîb di ǀhōsagu ge ǂganǃgâsib ǃnâ ǃāsa xu ǃās ǃoa ǃgû tsî ǁaubexa ǃnaniǀoadisi ǂgomsabe Jodeǁîga ge ǀhaoǀhao. 2 ǁÎgu ge ǃKhūba ge ǀkhoma, îb ǁîgu khoen hîa hoa ǃhaodi xa ge ǁgâiǀāhena hui tsî Tempeli, ǀūben xa ge ǀuriǀuriheba ǀkhom 3 tsî Jerusalems nēsi ǃhūb kōse hîkākāhe hâs tsîna ǀkhomxa. 4 ǁKhāti gu ge ǀkhaos ǀkhab nî ǃKhūba ǂkhababab ǁkhan hâ ǃkhaisa ǁnān hîa ge ǁîb ôana ǃgam tsî ǀkhomoǃnâse ǀhapio ǀgôarona hîkākān tsî Eloba ǃkhāǃkhān ai ǁîb di ǁaib ǀkha ǁgau ǃkhaisa ge ǂgan.
5 Judab ge ǁîb di toroǃkhamaoga ǂhomitoas khaoǃgân ge Jodeǁî tamana ǁîba ge mâǃoa ǁoa i, ǃKhūb di ǁaib Israelǁîn ǃoagub ge ūhâ ib ge ǀkhommi ǃnâ dabasen xui-ao. 6-7 Judab ge ǂanǂan tamase ǁnāǂamde ǃādi tsî ǃārodi ai dī tsî ǁîde gere ǃkhāǂhubi. ǁÎb ge ǁkhāti ǃgâi toroǃkhaiga ge ǁkhâuǁnâ, tsîn ge ǁnā ǀgaub ai ǂgui khākhoena ge hîkākā. Nēti ī ǁnāǂamdeb ge tsuxuba gere dī tsîn ge khoena ǁîb di ǁkhoaǂgaoxasib xa mâ ǃkhai-i hoa-i ai gere ǃhoa.
Ptolemib ge Nikanora Judabab nî ǁnāǂamse ra sî
(1 Makabergu 3:38-41)8 Jerusalems di ǂgaeǂgui-aob Filipub ge Judab ra ǃhūba ǂkhariǂkharibese hōbasen tsî ǃnuriǃnāde dan ǃkhaisab ge mû, o sîǂkhanisa Kai Siriab di ǂgaeǂgui-aob Ptolemib ǃoa xoa tsî huiba gao-aob ǂhanub nî ǁkhaubahese ge ǂgan. 9 Ptolemib ge ǁnātimîsi Patroxub ôab Nikanori, ǁkhāti Gao-aob di ǀHōsagu ǀguiba ǁhûi tsî ǁîba ǀgamdisiǀoadisis xa ǃnāsa toroǃkhamaogu ǀkha hoaraga Jodeǁî ǁaesa nî ǃgamǂuise ge sî. Ptolemib ge ǁkhāti Gorgiab, torodīs xa hara ǂansa ūhâba ǁîb ǀkha nî ǃgûse ge ǁgaumâi. 10 Gao-aob Antioxub ge Romeǁîna ǃnanidisiǁkhaisaǀaǀoadisi kiloxramgu ǀhaiǀuriba ge surude hâ i. Nikanori ge nē surudebab nî Jodeǁîn, hîa ge torob ǃnâ ǃkhōhena khobose ǁamaxū tsî matare ti ge ǀape. 11 ǁÎb ge haisi-amsa sîǂui tsî hoaraga khoen huri-amǃādi ǃnâ hâna Jodeǁîn ra khobose, ǀgui kiloxram ǀhaiǀurib xa ǀorose ǁamaxūhe ǃkhaisa ge ǂanǂan. Xaweb ge Hoaǀgaixa Elob di ǀgoraǃgâs tare-e ǁîba ǃkhōǂgāba hâ ǃkhaisa ge ǀū i.
Judab ge Nikanori ǀapedi xa ra ǁkhāǁkhāsen
(1 Makabergu 3:42-54)12 Judab ge Nikanori ra ǁîb toroǂnubis ǀkha Judeab ǃoa aiǃgû ǃkhaisa ǂan tsî ǁîb khoega ge ǂanǂan. 13 ǀNîgu ge ǃaoǃnâ tsî Elob di ǂhanu-aisib ǃnâ ǂgom tama i tsî ǃhaese ge ǃkhoeni. 14 Xawe naugu ge ū gu ge hâ i xūn hoana ǁamaxū tsî ǁkhā ǁaeb ai, ǃKhūb nî ǁîna anuse ǃgapaǀî tsî eloxoresa Nikanori hîa ge torob nî tsoatsoas aiǃâ ǁîna ǀnai khobose ǁamaxū hâ iba xu orehese gere ǀgore. 15 ǁÎn ǃaroma tamas ka i, xawe ǁîn aboxagu ǀkha ge dīhe ǃgaeǀhaodi ǃaroma tsî ǁîb ge ǁîna ǁîb di ǃanu tsî ǂkhaisa ǀons ǀkha ǂgai xui-ao. 16 Judab ge ǃnaniǀoadisi toroǃkhamaoga ǀhaoǀhao tsî khākhoen xa gu ǃaoǃaohe tsî ǂguiǀnōb Jodeǁî taman ra hā ǃnâb xa ǃao tidesa ge ǂgaoǂgaoǃnâ. ǁNās ǃās ǃnâ gu ge ǁkhoaǂgaoxase nî ǃkham 17 tsî Jodeǁî taman ge ǃanu ǃkhaib ǃoagu dī xūn, Jerusalemsa hîkākā ǀgaub tsî Jodeǁîn ǁnaetiga dībē ǃkhais tsîna ǂâis ǃnâ nî ūhâ. 18 “ǁÎn ge ǁîn di ǁâtanin tsî ǁēsib tsîn ai ra ǂgomǃgâ, xawe sada ge Hoaǀgaixa Elob, hîa ǁnā toroǂnubis ǀguis ose, hoa xūn tamas ka io hoaraga ǃhūbaiba hîkākā ǁkhāb ǃnâ ra ǂgom” tib ge Judaba ge mî.
19 ǁNās khaoǃgâb ge Judaba Elob ge ǁîn di aboxaga hui ǀgaugu xa ge ǂâiǂâiǃnâ: Sanherib di ǁaeb ǃnân ge ǀguikaidisi tsî ǁkhaisadisikoroǀaǀoadisi khākhoena ge hîkākāhe; 20 tsî ǀgui ǃnās ain ge ǁkhaisaǀoadisi Jodeǁîna hakaǀoadisi Masedoniaǁîna Babilonias ǃnâ nî huise ge hā, tsî ǀguikaidisi tsî ǀgamdisiǀoadisi Galateǁîna Elob di huib ǀkha dan tsî ǃnāsa ǁkhâuǁnâ xūna ge ūbasen.
Judab ge Nikanora ra dan
(1 Makabergu 3:55—4:27)21 Nē mîdi ǀkhab ge ǁîga ge ǂgaoǂgaoǃnâ tsî ǁîgu di ǂhanugu tsî ǃhūb ǃaroma ǁōsa ǃoa ǁîga ǂhomi tsî ǁnās khaoǃgâ ǁîb di toroǂnubisa haka ǃâdi ǃnâ ge ǀgoraǂgā. 22 ǁÎb ge ǁîb di ǃgâsagu, Simonni, Josefi tsî Jonatanni tsîga, mâb hoaba ǀguiǀoadisi tsî korokaidisi khoegu ǂama ǂgaeǂgui-aose ge ǁgaumâi. 23 Eleasarab ge ǃgariseb nî ǃanu ǂkhanisa xu khomai ǃkhaisa mîmās khaoǃgâb ge ǁîb khoega toroǁnaeba ge mā. “Elob xa ge nî huihe” tsîs nî Nikanori ǃoagu hâ ǁnāǂamsa ǁîb ǂûb xa ǂgaeǂguihe.
24 Hoaǀgaixa Elob ge ǁîgu ǀkhāba xu gere ǃkham tsî gu ge khoeseǀoadisis xa ǃnāsa khākhoega ge ǃgam. ǂGuiga gu ge ge tsui tsîs ge hoaraga toroǂnubisa ge ǃkhoeni. 25 ǁÎgu ge ǁînan nî khobose ǁamase ge hā khoena mari-e ge ūǀhana. ǁÎgu ge khākhoena gu ge gaxu daoba ǃgôaǃgon, 26 xawe ega Sabbattsēs ǁaeb di tsoatsoas ge ǀgūtoa hâ i xui-ao ge oa. 27 Khākhoen di ǁâtanin tsî ǁkhâuǁnâhe ge xūna gu ge ǀhaoǀhaos khaoǃgâ gu ge Sabbattsēsa ge ǁâudī, tsî ǁnā tsēs kōseb ge ǃnorasase ǁîna hā-ū tsî ǂguro saos ǀkhommi disa ǁgau xui-ao ǃKhūba koa tsî ge gangan. 28 Sabbattsēs ge ǃkharu, o gu ge ǃgôaǃgonhe ge khoen, ǃoataradi tsî ǃguniǀgôana ǁkhâuǁnâhe ge xūna xu ge mā tsî ǃgau gena ǁîgu di omaridi ǃnâ ge ǀgora. 29 ǁNās khaoǃgân ge ǀhûpe ǀkhomxaǂgao ǃKhūb ǃoa ǀgore tsî ǂkhîǂgaoxaseb nî ǁîb ǃoaba-aon ai kō ǃkhaisa ge ǂgan.
Judab ge Timoteub tsî Baxideb hâkha ra dan
30 Jodeǁîgu ge ega Timoteub tsî Baxideb hâkha di toroǂnubira ǃoagu ǃkham tsî ǀgamdisiǀoadisigu ǁîgu diga ge ǃgam. ǁÎgu ge ǀgaisa hâǃkhaide ǁkhâuǁnâ tsî ǂgui ǁkhâuǁnâhe ge xūna ge ūbasen tsî ǀguitikōse ǁîgu, ǃoataradi, ǃguniǀgôan, kaira aogu tsî ǃgôaǃgonhe geren tsîn ǁaegu ge ǀgora. 31 Hoaraga ǁâtanin khākhoen din ge ǀhaoǀhaohe tsî ǂōrisase ge sâuhe, xawen ge ǁkhâuǁnâhe ge xūn hîa ge ǃgauna Jerusalems ǃoa ge ūhe. 32 ǁÎgu ge Timoteub toroǃkhamaogu di danakhoeb, eloxoresa aob, Jodeǁîna ge kaise tsâ kaib tsîna ge ǃgam. 33 Dansa gu ra aboxagu di ǃās ǃnâ ǁâudī hîa gu ge ǁnā khoegu Tempeli di dao-amde ge ǂhubi ga, ûitsamase ge ǂhubiǂui. Nē khoegu ǁaegub ge Kalisteneb hîa ge ǂkhari omro-i ǃnâ gau hâ ib tsîna ge hâ i. ǁNātib ge ǁîb tsîna ǁîb di ǂkhabadīgu ǃaroma anub hâ ǁkharaba ge ǃkhōǃoa.
34 Nē ǀgaub aib ge nē tsū Nikanori hîa ge ǀoadisi ǂharugu-aoga Jodeǁîna nî ǁamase hā-ūba, 35 ǃKhūb di huib ǀkha, ǁkhā khoen hîab ge kaise ǃharaxūn xa ge danhe. ǁÎb ge ǁîb di ǂoaǂamsa saraba ǁhû tsî ǃkhoeni ra khobo-i khami ǀguri Antioxs kōse ge ǁhâ. ǁÎb ge ǁîb di hoaraga toroǂnubis ǀguisa ge hîkākā. 36 Nē khoeb, hîa gere Romeǁîn di surudeba Jerusalems di khoena khobose ǁamaxū tsî matare ǂgaob ge Jodeǁîn danhe ǁoa ǃkhaisa ge ǁgau. ǁÎn ge Elob xan ge māhe ǂhanuga ǁnâuǀnam hâ i xui-aob ge ǁîba ge ǁîn di ǀgaisa ǁkhauba-ao i.
© Khoekhoegowab Elobmîs © Bible Society in Namibia, 2020.
