Danieli ge ǁîb aide ra xoaǃgāǃgā
Danieli di ai-i haka ǀgurugu di i
1 ǂGuro ǂgaeǂguis kurib Babilons gao-aob Belsasari dib ǃnâ ta ge tita Danielta, tsuxuba ǁhapos ǃnâ ai-e ge mû. Tita ge ǁhaposa ge xoamâi tsî nēb ge xoaǁguib, 2 ǁnā tsuxub ǃnâ ta ge mû xūn diba:
Haka ǂoagu ge hoa ǀkhāga xu kai hurib ai ǃgom tsî ǁîba ge ǁgao kai. 3 Tsî gu ge haka, kai ǀguruga huriba xu ge ǂoaxa, mâb hoab ge nauba xu ǀkharati ge ī i. 4 ǂGurob ge xammi khami gere mûsen tsî ǃariǃkhā-i di ǁgabogu khami i ǁgabokha ge ūhâ i. Kō ta ra hîa kha ge ǁgabokha âba ge ǃhomǁnâhe, tsîb ge ǃhūba xu ūkhâihe tsî khoe-i khami ǀgam ǂaira ai mâihe tsî khoe-i ǁnâuǃāba ge māhe.
5 ǀGamǁî ǀgurub ge bēri khami gere mûsen. ǁÎb ge ǀgam ǀnūkha ai ge mâ i tsî ǃnona ǀaraga amǃnâb âb ǃnâ ge nâmâi hâ i, tsîb ge ge mîbahe: “ǂÛ, kaise ǁgan-e ǂû.”
6 Kō ta ra hîab ge ǀnî ǀgurub, ǀgarub khami gere mûsenna ge hā. ǁÎb ge haka ǁgabogu, ani-i digu khami īga ǁâb âb ai ge ūhâ i. ǁÎb ge haka danade ge ūhâ i tsîb ge ǂgaeǂguis ǀgaiba ge māhe.
7 Kō ta ra hîab ge hakaǁî ǀguruba ge ǂhai. ǁÎb ge ǃhuriǃhurisa, ǃaoǃaosa tsî kaise ge ǀgaisa i. Tsîb ge ǁîb di kai, ǀuri ǁgûgu ǀkha khākhoen âba ǃopoǃā tsî ge haraǂgā tsî ǃgau gena ǂaigu âb ǀkha ge dāǂkhūǂkhū. ǁÎb ge nau ǀgurugu hoaga xu ge ǀkhara i tsî disi ǁnâga ge ūhâ i. 8 Tsî ǁnâga ta ra kō hîab ge ǂkhari ǁnâroba ǁîgu ǁaegu ge ǂoaxa tsî gu ge nau ǁnâga xu ǃnonaga ǁîb ǃaroma ge ǃhomǁnâhe. Nē ǁnâb ge khoe-i mûra khami i mûra tsî kaise ra koasen ams tsîna ge ūhâ i.
Elob di ǀgoraǃgâs
9 Kō ta ra hîa di ge tronde ge mâihe tsîb ge ǁnāb, ǀamos kōse ûi hâba, ǁîb di trons ai ge ǂnû. ǁÎb di saran ge tsamaros khami ge ǃuri i tsî ǀûn âba ǃapin khami. Trons âb ge ge ǀaeǁhabu i tsî ǀnūdi âs ge ge ǂhubi ra ǀae i. 10 ǀAes ge tronsa xu gere dâuǂoaxa. ǂGui ǀoadisidi khoen ge ǁîba gere ǃoaba tsî ǃgôaheǁoasase ǂgui khoen di ǂnubis ge ǁîb aiǃâ ge mâ i. ǀGoraǃgâs ge ge tsoatsoa tsîdi ge ǂkhanide ge ǁkhowa-amhe.
11 Kō ta ra hîa ta ge ǂkhari ǁnârob di koasenǃhoa-aiba ge ǁnâu. Noxopa ta ra kō hîab ge ǀguruba ge ǃgamhe, tsîs ge ǁîb di sorosa ǀaes ǃnâ aoǂgāhe tsî ge hîkākāhe. 12 Nau ǀgurugu ge ǁîgu di gaosisa ge ūxūhe, xawe gu ge mîmâisa ǁaeb kōse ûisa ge mā-amhe.
13 ǃAruǀî ta ge ti tsuxu-aidi ǃnâ ǀguib, khoe-i khami ra mûsenni ǃâudi ǃnâ ra hā ǃkhaisa ge mû. ǁÎb ge ǁnāb ǀamos kōse ûi hâb ǀgūse ge sī tsî ǁîb aiǃâ sī ge mâihe. 14 Tsîb ge ǁkhāsib tsî ǃgôasib tsî gao-aosi ǀgaib tsîna ge māhe, în hoa ǁaedi, ǃhaodi tsî gowagu di khoena ǁîba ǃoaba. ǁÎb di ǂgaeǂguis ge ǀamos kōse ra hâ tsî gaosib âb ge tātse ǀam tide.
ǂGuro ais di ǁguiǃāhes
15 Tita ge nē ta ge mû ais xa kaise ǃaoǃaohe tsî ge ǃhuriǃhurihe. 16 O ta ge ǁnāpa ge mâ igu di ǀguib tawa sī tsî ǁîba ge ǂgan, îb nēn hoana ǁguiǃāba te. Ob ge nēti ge ǁguiǃāba te: 17 “Haka, kai ǀgurugu hîats go mû gu ge haka gaosigu ǃhūbaib ǃnâ nî hāga. 18 Xawe Hoan xa ǀGapi Elob di khoen ge gao-aosi ǂgaeǂguisa nî ǃkhōǃoa tsî ǁîsa ǀamos kōse nî ūhâ.”
19 O ta ge hakaǁî ǀgurub, naugu hoagu xa ge ǀkharati ī ib, ǃaoǃaosa ge ib, ǁîb di ǀuri ǁgûgu ǀkha khākhoena ǃopoǃā tsî hāraǂgā tsî ge ǃgau gena bronsǂaigu âb ǀkha gere dāǂkhūǂkhūb xa ge ǂan ǂgao. 20 ǁKhāti ta ge ǁîb di danas ai ge hâ i disi ǁnâgu tsî ega ge ǂoaxa ǀguib, ǁîb ǃaroma gu ge ǃnona ǁnâga ǃhomǁnâheb xa ge ǂan ǂgao. ǁÎb ge mûra tsî kaise ra koasen ams tsîna ge ūhâ i tsî naugu hoagu xa ge ǃaoǃaosa i.
21 Kō ta ra hîab ge ǁnā ǁnâba Elob di khoen ǃoagu torodī tsî ǁîna ge dan. 22 Ob ge ǁnāb, ǀamos kōse ûi hâba hā tsî Hoan xa ǀGapi Elob khoen di ǃgâib ǃoa ǀgoraǃgâsa ge gowaǂui. Hoan xa ǀGapi Elob di khoen gao-aosi ǂgaeǂguisa nî ǃkhōǃoa ǁaeb ge go hā.
23 O ta ge nēti ge ǁguiǃābahe: “Hakaǁî ǀgurub ge hakaǁî gaosib, ǃhūbaib ai nî hāb tsî nau gaosigu hoaga xu nî ǀkharaba. ǁÎb ge hoaraga ǃhūbaiba haraǂgā, hîkākā tsî nî dāǂkhūǂkhū. 24 Disi ǁnâgu ge disi gao-aogu, ǁnā gaosiba saogubes ǃnâ nî gaoǂamga. ǁÎgu khaoǃgâb ge ǀnî gao-aob, ǁîgu hoaga xu nî ǀkharaba hā tsî ǃnona gao-aoga nî ūǁnâ. 25 ǁÎb ge Hoan xa ǀGapi Elob ǃoagu nî ǃhoa tsî Elob khoena nî ǁgâiǀā. Tsîb ge ǁîn di ǂhanub tsî ǁâudīgu tsîna ǀkharaǀkharasa nî dītsâ, tsîn ge Elob khoena ǃnona tsî ǃkhare kurigu di ǁaeba ǁîb xa nî gaoǂamhe. 26 ǁNās khaoǃgâs ge ǀhomsi ǀgoraǃgâs ǂnûsa nî hâ tsîb ge ǁnā gao-aoba gaosis âba nî ūxūhe tsîs ge hoaragase nî hîkākāhe. 27 ǀGaib tsî kaisib, ǃhūbaib gaosigu hoagu diban ge Hoan xa ǀGapi Elob di khoena nî māhe. ǁÎn di gaosib ge ǀamos kōse nî hâ tsî gu ge ǃhūbaib di ǂgaeǂgui-aogu hoaga ǁîna ǃoaba tsî nî ǁnâuǀnam.”
28 Nēpas ge nē ǃkhaisa ra ǀam. Tita, Danielta ge kaise ǃhuri tsî ge ǀhai, xawe ta ge nēn hoana tita ǃnâ ǀgui ge ūhâ.
© Khoekhoegowab Elobmîs © Bible Society in Namibia, 2020.
