ǂKhoamîdi 7 - Khoekhoegowab New Translation 2020 (KKG20)

1 Ti ôatse, ti mîde ǃkhōǀgaipe, î ti mîmāde ǁuib ase ūbasen. 2 Ti mîmādets ga ǃkhōǀgaipe, ots ge nî ûi, î ti ǁkhāǁkhāde sats ǂûts a ǀnamsen khami ūhâbasen. 3 ǁÎde sa ǀkhunugu ai ǃgae; ǁîde sa ǂgaob ai xoamâi. 4 Gā-aisib ǃoa mî re: “Sats ge a ti ǃgâsa,” î ǁnâuǃāba sa ǀgū ǀaokhoeb ase ǀonǂgai. 5 Nēs ge ǁgoeǃnâ tarasa xu nî sâu tsi tsî ǂgaeǂhapuxa ǀai-aos di ǂkhanu mîde xu.

ǂGaeǂhapu-aos

6 Ti oms mûǂuidaosa xu ta ge kō, 7 o ta ge ǂan-e ūhâ tama ǂkham khoegu ǁaegu, ǁnâuǃāoǃnâ ǂkham khoeba ge mû. 8 ǁÎb ge tarekhoes ra hâ ǁhôas ǀgūse ǃkharu tsî ǁîs hâǃkhaisǀî garu daob ai ge ǃgû. 9 Nēs ge ǃuikarab aisa, tsuxuǃkhaenab ra tsēsa ǃgū-ai ǁaeb ai. 10 Tsî mû, tarekhoes ge ǁîba ra ǀhao-ū, ǀai-aos khami ana tsî ǂgaeǂhapus ǀapede ūhâsa. 11 ǁÎs ge ǂkhupixa tsî a mâǃoaxa; ǁîs ǂaira ge oms âs ǃnâ a hâ ǁoa; 12 nēsi ǃganni ǃnâ, nēsi ǂharuguǃkhaib ai tsî mâ ǁhôas ǃganni dis hoas tawas ge ra ǃâuǁgoe. 13 ǁÎs ge ǁîba ǁnamǂgā tsî ra ǁoa, tsî ǁîba tao-oǃnâse mûra ǃnâ kō tsî ra mî: 14 “Ti ǁguibade ta ge nî ǁguiba, tsî ta ge nētse ti mîmâide go dīǀoaǀoa. 15 ǁNā-amaga ta ge satsa ta nî ǀhao-ūse go hā, ǁkhorexase ta ge goro ôa tsi tsî go ǀhao-ū tsi. 16 Ti kharoba ta ge Egipteb di tsaura lapib, ǂguiǃnâgu ǀûga ūhâb ǀkha go ǀgâi-ai. 17 Ti kharoba ta ge mire-i, aukore-i tsî kanel-i tsîn ǀkha go tsoro-ai, ǃgâiseb nî hamse. 18 Hā îm ǁgoas kōse ǀnamma ǀhuru; am ǀnammi ǃnâ ǁgoe-ūgu tsî ǃgâiǃgâisen, 19 ti aob oms tawa a ǀkhai xuige; ǁîb ge ǃnū daoba ǃgû hâ. 20 ǁÎb ge ǁgarubǀoa mariba go ūsao tsî ǀoasa ǁkhâb khaoǃgâ ǀgui nî oahā.” 21 ǁÎs di ǂgaeǂhapuxa mîdi ǀkhas ge ǁîb ǂâisa ra ūǁnâ; ǁîs ǂkhanu nams ǀkhas ge ra ǂgaeǂhapu bi. 22 ǁNātimîsib ge ǁîsa ra sao, ǂāheb nîse garu gomab khami tamas ka io, ǁkhamab hîa ǃnuis ǃnâ ra ǃgûǂgâb khami. 23 ǁNāpab ge ǂāba ǂgaob âba ra ǁhâiǃganu; aniro-i hîa ǁnoas ǃnâ ra ǁkhanaǂgâ-i khami, nēs ǁîb di ûiba nî ū ǃkhaisa ǀūse.

24 Ti ôago, nēsi ǃgâ te, î ti mîde ǂōrisase ǃgaoǃgâ. 25 Tāb sa ǂgaoba ǁîsa ǁnāba; tā ǁîs daogu ǃnâ kāǁhapu. 26 ǁÎs ge ǂgui khoega ge ǂgaeǂhapu, ǂgui ǀgaisa aogas ge ge hîkākā. 27 ǁÎs oms tawa sīs ge ǁŌhân Hâǃkhaib tawa sīs khami ī; nēs ge ǃhaese ǁōǃgûs khami ī.