Elihub ra ǃhoa
(32:1—37:24)1 Nē ǃnona khoegu ge ǃaruǀî Joba ge ǃeream ǁoa, Jobi ge ǀû tamase ǀhapiob a ǃkhaisa ǁapoǁapoo. 2 Ob ge Busǁîb Barakeli, Rammi omaris dib ôab Elihuba ge ǁaixa. ǁÎb ge Jobi ge ǀû tamase ǀhapiob a ti gere mî, xawe Eloba tama ǃkhais xa ge ǁaixa. 3 Jobi di ǃnona ǀhōsagu ǀkhas tsînab ge ge ǁaixa, Joba gu ge ǂhanuse ǃeream tama hâ i xui-ao, xawe gu Jobi a ǀhapixa ti gere mî hîa. 4 Elihub ge ǁîb ǀhōsagu xab ge ǂkham i xui-ao ge ǃâu, î gu ǁîga ǂgurose Jobi ǀkha ǃhoa. 5 Xawe Elihub ge mû ǁîgu ǃaruǀî a ǃeream ǁoa ǃkhaisa, ob ge kaise ǁaixa 6 tsî ge ǃhoatsoatsoa:
“Tita ge ǂkham tsî sago ge kai,
ǁnā-amaga ta ge tita ra ǂâi xūna, mîba gosa gere ǃao.
7 Tita ge ge ǂâi: ‘Ûitsēde, a di ǃhoa
tsî ûikuriga, a gu gā-aisiba ǁkhāǁkhā.’
8 Xawe khoe-i ǃnâ hâ gagas,
Hoaǀgaixab di ǀoms ge khoe-e ǁnâuǃāba ra māsa.
9 ǂGui ûikuri tamagu ge gā-ai kai ra ga
tamas ka io kairasis ǀgui tamas ge ǁnâuǃāba ra māsa.
10 ǁNā-amaga ta ge ra mî: ‘ǃGâ te;
a ta tita tsîna ti ǂâiǀgauba ǃhoaǂui.’
11 “Mû, sago nî ǃhoasa ta ge gere ǃâu,
sago gā-ai ǃhoa-aina ta ge gere ǃgâ,
tare-e go nî ǃhoasa go mâ ra ǂâiǂâisen hîa.
12 ǂŌrisase ta ge sago ai ge ǂâi-aiǂnûi,
xaweb ge ǀguib âgo tsîna Joba
ǃgabe tamas ka io ǃeream tama ge i.
13 ǁNā-amaga tā mî: ‘Gā-aisiba ge go hō, ti;
Elob ge aitsama Joba nî ǀhao-ū tsî khoe-e tama.’
14 Jobi ge tita ǀkha ge ǂgaenamǃgâgu tama hâ i,
tsî ta ge ǁnā-amaga sago mîde tātsēs tsîna sîsenū ǁkhā tide.
15 “ǁÎgu ge burugâ tsî ǃaruǀî mîxū-e ūhâ tama ge i;
ǁîgu ge mî-i xare-e ge ūhâ tama hâ i.
16 Noxopa ta nî ǃâu, ǃhoa tama gu hâ,
ǁnāpa gu xū-i xare-e ǃeream tamase mâ xui-ao?
17 Tita tsîn ti ǃnāsa nî ǃeream;
tita tsîn tita a ǂan-e nî mî.
18 Kaise ta ǂgui xūna ūhâ, mî ǂgao ta rana;
ti gagas ge ǃhoa ta nîsa ra ǁgari te.
19 Ti ǃnākhoesib ge ǀasa ǂauxûi-i khami ra ǀgû;
ǂari ǁga ra ǀasa ǂauxûiǃgapagu khami.
20 ǃGâise ta nî tsâga ta ge nî ǃhoa;
ti amǁgaukha ǁkhowa-am tsî ta ge nî ǃeream.
21 ǀKhāǁhûi-i xare-e ta dī tide,
tamas ka io ǀnî khoen ǀguina ǃkhōǂui tide.
22 ǀNî khoen ǀguina ta nî ǃkhōǂuis ka,
ob ge ti Kuru-aoba ǁnātimîsi nî ūbē te.
© Khoekhoegowab Elobmîs © Bible Society in Namibia, 2020.
