Paulub di tawedes
1 Nēsi ta ge sada ǃgâsas Febes, Kenxreas ǃnâ hâ kerkheb di ǃoaba-aos tsîna ge ī isa sado ra ǂgomǃgâba. 2 ǁÎsa du Xristub* ǀons ǃnâ Elob di khoena ǃgâiba ǀgaub ai ǃkhōǃoa tsî ǁîsa hoa ǂhâgu âs ǃnâ mâǃgâ. ǁÎs ge tita tsî ǂguina kai huib ase ge ība i. 3 Priskilas tsî Akwilab hâra, Xristub Jesub ǃnâ a ti sîsenǁare-aora tawede re. 4 ǁÎra ûiba ra ge tita ǃaroma ge ǁguiba, xawe tita ǀguita tama i tsî ǁkhāti hoaraga kerkhegu Jodeǁî taman* digu ge ǁîra ra gangan. 5 ǁKhāti ǁîra ommi ǃnâ hâ kerkheb tsîna tawede.
Ti ǀnam ǀhōsab Epaenetusi, Xristub ǃnâ ge ǂguro ǂgommi, Asiab dib tsîna tawede re. 6 Marias hîa ge kaise sado sîsenbasa tawede re. 7 Andronikub tsî Juniab hâkha, ti ǀaokhoe tsî tita ǀkha ǃkhō-oms ǃnâ ge ǂnôa i kha tsîna tawede re. ǁÎkha ge apostelgu* ǃnâ ǃgâise a ǂansa tsî tita aiǃâ ge a Xristeǁî kai.
8 Ampliatub, ǃKhūb ǃnâ a ti ǀnam ǀhōsaba tawede re. 9 Urbanub, Xristub ǃnâ sida sîsenǁare-aob tsî Staxib, ti ǀnam ǀhōsab hâkha tsîna tawede re. 10 Apeleb, Xristub ǃnâ ūǃoahesab tsî Aristobulub omaris din tsîna tawede re. 11 Herodionni ti ǀaokhoeba tawede tsî Narsisub omaris ǃnâ hâ Xristeǁîn tsîna tawede re.
12 Trifenas tsî Trifosas tsîra hîa ǃKhūb di ǃoabas ǃnâ ra sîsen ra tawedeba te re. Tsî Persis, ti ǀnam ǀhōsas, ǃKhūb ǃnâ kaise ge sîsens tsîna tawede. 13 Rufub, ǃKhūb ǃnâ ǃkhōǂuisab tsî ǁîb îs tita ge ǁgûse iba is hâra tawedeba te. 14 Asinkritub, Flegonni, Hermeb, Patrobab, Hermab tsî ǁîgu ǀkha hâ Xristeǁî ǃgâsan tsîna tawede re. 15 Filologub tsî Julias hâra, Nereub tsî ǁîb di ǃgâsas hâra tsî Olimpab tsî Elob di khoen ǁîn ǀkha hân hoana tawede re. 16 Tawedegu re ǃanu ǁoa-i ǀkha. Xristub di kerkhegu hoagu ge ra tawede du.
Paulub di ǀuni ǁgui-aidi
17 ǀKhoma du ta ra ǃgâsado, ǁnān ǁhaiǃāgudi tsî ǃgomsigu tsîna ǃaroma tsî ǂuru ǁkhāǁkhās hîa du ge ǁkhāǁkhāhesa ǃnôa-aiǃnaose ībana du nî ǂanbasen ǃkhaisa. ǁÎna ǂgōsen. 18 ǁNāti ī khoen ge sada ǃKhūb Xristuba ǃoaba tama i tsî ǁîn di ǁkhoms kōse ǀgui ra kō; tsîn ge ǁîn di ǃgâi mîdi tsî ǂkhanu ǃhoadi ǀkha ǀhapio khoena ra ǂgaeǂhapu. 19 Mâ-i hoa-i ge sadu ǁnâuǀnamxasib, ǃGâiǂhôasa du ūba hâb xa ge ǁnâu, ǁnā-amaga ta ge ra ǃgâiaǂgao tsî ta ge ra ǁkhore ǃgâin ǃoa du nî gā-ai, xawe du ǂkhabab ǃoa nî ǀhapio ǃkhaisa. 20 Ob ge nēsi ǂkhîb di Eloba Satanna* ǃhaese sadu ǂaidi ǃnaka nî dāǂkhū.
Ab ǀkhommi sada ǃKhūb Jesub Xristuba diba sadu ǀkha hâ.
21 Timoteub, ti sîsenǁare-aob ge ra tawede du tsî ǁkhāti ti ǀaokhoegu Lusiub, Jasonni tsî Sosipateri hâga.
22 Tita Tertiuta, nē sîǂkhanis xoa-aota ge ǃKhūb ǃnâ ra tawede du.
23 Gajub, tita tsî ǁkhāti hoaraga kerkheb di ǃhaokhoeǃkhōǃoa-aob ge ra tawede du. Erastub, ǃās di marimûǂamaob tsî ǃgâsab Kwartub tsîkha ge ra tawede du. [24 Ab ǀkhommi sada ǃKhūb Jesub Xristub diba sadu hoadu ǀkha hâ! Amen.]
ǀUni ǀgores tsî koas Paulub dis
25 Nēsi ǁnāb sado ǁîb di ǃGâiǂhôas ǃoa ǀgaiǀgai ǁkhāb, Jesub Xristub xa hâ aoǁnâs ǀkha ǃgaoǃgao tsî ǂgui kuriga ǃkharu hâse ge sâuhe hâ i ǂganǃgâsiba ǂhaiǂhai ǁkhāb, 26 xawe ge nēsi kēbo-aogu xoadi ǃnâ-u ǀamo mîmās Elob disa hoaraga ǁaedi ǃoa ge ǂhaiǂhaiba, ǂgoms di ǁnâuǀnamxasiba hā-ūs ǃoa.
27 ǂKhaisiba ab ǁîb ǀguib a gā-ai Eloba ǀamos kōse Jesub Xristub ǃnâ-u māhe! Amen.*
© Khoekhoegowab Elobmîs © Bible Society in Namibia, 2020.
