Jeremia 17 - Khoekhoegowab New Translation 2020 (KKG20)

Judab di ǁoreb tsî ǁkharab

1 “Judab di ǁoreb ge ǀuripenni ǀkha, diamants ǂaob ǀkha, ǁîn ǂgaob di xoaǂgapab ai tsî ǁîn altardi ǁnâgu ai xoaǂgāhe hâ. 2 ǁÎn ôan ra ǁîn altardi tsî ǁîn khaihesa ǃkhain, ǁîn ǁgôa-elos Aseras di ǁgauǁgaun ase mâ ǃam hais tawa, ǃnâugu ai ge mâihen xa ǂâiǂâisen hîa, 3 ǃhomgu ai, ǃaub ǃnâ. Sa ǃkhūsib tsî ǁuiba ta ge sa ǁoreb mādawa-ams ase ǁkhâuǁnâxūse nî mā, sa hoaraga ǁanǀkharib ǃnâ. 4 ǃHūb mā du ta geba du ge nî māxū, tsî ta ge tita sadu khākhoena du ǀū du a ǃhū-i ǃnâ nî sī ǃoabase nî dī du, ti ǁaixasib ǃnâs ǀamose nî khau ǀaesa khauhe hâ amaga.”

ǃKharaga gowaǂuisendi

5 Nētib ge ǃKhūba ra mî:

“ǀÂxarexūsab ge ǁnā khoeb

tita xu dabasen

tsî khoen ai ra ǂgomaiǂnûib,

ǀgaib âba ǁō nî khoen ai ra mâiba.

6 “ǁÎb ge ǃgaroǃhūb ǃnâ hâ hai-i khami ī,

ǃgâi xū-i tsîna mû tama-e.

ǁÎb ge ǃū-aisa ǃkhaidi ǃgaroǃhūb didi ǃnâ nî ǁan,

ǀū tsî ǁanǃnâhe tama ǃhūb ǃnâ.

7 “ǀKhaeheb ge hâ ǁnā khoeb ǃKhūba ra ǂgomǃgâba,

ǃKhūb ge a ǁîb di ǂgomǃgâ.

8 ǁÎb ge ǁgammi amǃgâ ǂgāsa hai-i khami ī,

ǃnomagu â-i ǃāb ǃnâ mâ-i,

ǀgammi ga hāo ǃao tama-i,

ǂgaegu â-i ǃamse ra hâhâ;

tsî ǀkhurub kurib ǃnâ ǂâiǂhansen tama hâ;

tsî ra ǂûtanihâhâ-e.

9 “ǂGaob ge hoa xūn ǃgâ-ai gāxaǃnâ

tsî a ǁōǁōsa.

Tari-e ǁîba a ǁnâuǃā ǁkhā?

10 Tita ǃKhūta ge ǂâide ôaǃnâ

tsî ǂgaoga ra ǃâitsâ,

mâ-i hoa-e ta ǁî-i daogu ǃoa nî māse,

ǁî-i dīgu ǂûtanib ǃoa.”

11 Anis hîa ǁîs ǁgoe tama ǃupuna ra ǂnû-ais ǁkhās

khamib ge ǂhanuoǃnâse ra ǃkhūsiba hōba ī;

ǁîb tsēdi ǁaegub ǃnân ge ǁîba nî ǁnāxū

tsî ǀams âb aib ge gâse nî ī.

12 ǂKhaisib di trons, tsoatsoasa xu ǀgapise hâs

ge a sada di ǃanu ǃkhai.

13 ǃKhūtse sats ge a Israelǁaes di ǃâubasen;

satsa ga ǁnāxūn hoan ge nî taotaohe.

Satsa xu ga ǂgōn ge ǃhūbaib ǃnâ nî xoahe;

ǃKhūb, ûitsama ǁgam-i di ǀauban ge ǁnāxū amaga.

Jeremiab ge ǃKhūb ai huiba ra ǂgan

14 ǂGauǂgau te re ǃKhūtse, o ta ge nî ǂgau; sâu te re, o ta ge nî sâuhe, sats a ti ǃkhōǀkhā amaga.

15 Khoen ge tita ǃoa ra mî: “Mâpas ǃKhūb di mîsa hâ? Ab nēsi ǁîsa sida ai sîsenǂui re.”

16 Tita ge sadu ǃûi-aoba xu ǃkhoe tama hâ, ǁkhāti ta ǂkhôab tsē-e ge ǁkhore tama hâ i. Sats ge a ǂan, ti amǁgaukha xu ge ǂoaxan sa aiǃâ ge hâ isa. 17 Tā ǃaoǃaoxūse ība te re; sats ge tita ǁhaiǁhâǃkhaise ība, ǂkhabab di tsēs ai. 18 ǁNān tita ra ǃgôaǃgonna an taotaohe; an ǁîna ǃhuri kaihe, xawe ta tita tā ǃhuri. ǂKhabab tsēsa ǁîn ai hā kai, î ǁîna ǃhonarisase hîkākā!

Sabbattsēs xa

19 Nētib ge ǃKhūba tita ǃoa ge mî: “ǃGû, î ǁAes ǂGâ-ams, ǁîs ǃnâ-u gu Judab gao-aoga ra ǂgâ ka ǂoas, tsî hoa ǂgâ-amdi Jerusalems didi tawa sī mâ, 20 î nēti mî: ‘ǁNâu re mîs ǃKhūb disa sago Judab gao-aogo, tsî hoadu Judab didu tsî hoaraga ǁanǂgāsaben Jerusalems din, nē ǂgâ-amde ra sîsenūdo. 21 Nētib ge ǃKhūba ra mî: “ǁÎn ûigu ǃaroma an sabattsēs ai tā ǃgom xū-e tani tamas ka io Jerusalems ǃnâ ǂgâxa-ū. 22 Tamas ka ion tā omdi âna xu ǃgom xū-e taniǂui tamas ka io sîsen-i xare-e tā dī, tsî sabattsēsa khai, sadu aboxaga ta ge mîmā khami.” 23 Xawe gu ge ǃgâ tamas ka io ǂgaes âga ǂō tama i tsî ge ǂnîǃaoxa, ǁnâu tsî gu ǁguiǂamsa ǃkhōǃoa tidese.

24 “ ‘Xawe du ga tita ǃgâ tsî ǃgom xū-e ǃās ǂgâ-amdi tawa sabattsēs ai ǂgâxa-ū tama i, tsî du ga sabattsēsa khai tsî sîsen-i xare-e ǁîs ai dī tama i, 25 o gu ge nē gao-aogu tsî gaoǀgôagu, Davidi trons ai ǂnôagu, torokunidi ai ǂnû tsî hāga ǃgapi hâga ǃādi di ǂgâ-amdi ǃnâ-u nî ǂgâxa, tsî Judab tsî Jerusalems ge ǀamose nî ǁanǃnâhe. 26 Tsîn ge khoena Judab ǃādi tsî Jerusalems ǂnamipe hâ ǃkhaina xu nî hā, Benjaminni ǃhūba xu, Sefelaba xu, ǃhomxa ǀkhariba xu tsî Judab ǃkhawagasa xu, khauǁguibadi tsî ǁguibadi, ǃhoroǁguibadi tsî ǃgâihamxūn, ǁkhāti ganganǁguibadi ona ǃKhūb ommi ǁga ra hā-ū. 27 Xawe du ga tita ǃgâ tama i, sabattsēsa khai tsî ǃgom xū-e ǁîs ai sîsen tama is tsî ǃgom xū-e Jerusalems ǂgâ-amdi tawa sabattsēs ai taniǂgâxa tama is ǀkha, o ta ge ǁîs ǂgâ-amdi tawa ǀaesa nî ǃamam tsîs ge ǁîsa gao-omgu Jerusalems diga nî hapu, tsî ǀarihe tide.’ ”