Mateub 13 - Khoekhoegowab New Translation 2020 (KKG20)

Tsoro-aob di ǂkhōs*

1 ǁNā tsēs ǁkhās aib ge Jesuba omsa xu ǃgû tsî Galileahurirob amǃgâb sī ge ǂnû. 2 On ge ǂnubis di khoena ǁîb ǂnamipe ge ǀhao. ǁNātikōses nē ǂnubisa ǂgui tsîb ge Jesuba hurirob ai mâ ǂgaus ai ge ǂoa, khoen hurirob amǃgâ mâ hîa. 3 ǁÎb ge ǂkhōdi ǀkha ǂgui xūna ǁîna gere ǁkhāǁkhā tsî nēs ge ǁîb ǁkhāǁkhādi di ǀguisa:

“ǃGâ re! Tsoro-aob ge ge ǃgûǂoa ǃhoroba nî tsorose. 4 Tsî ǁnātib ra tsoro-aoba tsoro hîan ge ǀnî ǃkhomna daob xōǀkhā ǁnā tsî anin xa ge hapuhe. 5 ǀNîn ge ǁkhāti ǃhaoxa ǃkhaib ai ǁnā tsî ǃhaese ge ǃī, ǁnā ǃhūb ge kaise ǃgam tama hâ i amaga. 6 Xawe sores ge ǂoaxa on ge daoǃanhe tsî ge ǂnâ, ǁîn ge ǃnoma-e ūhâ tama hâ i xui-ao. 7 ǀNî ǃkhomn ge ǁkhāti ǁkhūn ǃnâ ge ǁnā, ǁîn ge ǀomkhain geo ǁkhūn xa ge ǀhomdomhe. Tsîn ge ǂûtani tama ge i.

8 “Xawen ge ǀnî ǃkhomna ǃgâi ǃhūb ai ǁnā tsî ǃgâise ge ǂûtani, ǀnîna ǃnonadisiǃnâguse, ǀnîna ǃnanidisiǃnâguse tsî ǀnîna kaidisiǃnâguse.”

9 ǁNās khaoǃgâb ge Jesuba ǁîna ge mîba: “ǂGaera ūhâ-e, a-i ǁnâu.”

ǂKhōdi di ǂâibasens

(Markub 4:10-12Lukab 8:9-10)

10 Tsî gu ge ǁkhāǁkhāsabega* Jesub tawa hā tsî ge dî: “Tare-i ǃaromats kha ǁîn ǀkha ǂkhōdi ǃnâ-u ra ǃhoa?” 11 Ob ge ge ǃeream: “Tita ge Gaosib ǀHommi dib di ǂganǃgâsiba sago go mîǃāba, xawe ta ge ǀnîn hîa ǃauga hân ǃaroma ǂkhōdi ǀguide a sîsenū ǁkhā. 12 ǁNān hîa ūhân ge ǀarobahe tsî ǃnāǂamsase nî ūhâ, xawe ūhâ taman ge ūn hâ ǂkhariro-i tsîna nî ūxūhe. 13 ǁNā-amaga ta ge ǂkhōdi ǃnâ-u ǁîn ǃoa ra ǃhoa, mû raǃân mû tama hâ tsî ǁnâu raǃân ǁnâu tsî xū-i xare-e ǁnâuǃā tama hâ amaga. 14 Tsî ǁîn ǃnâs ge Jesajab di kēbosisa ge ǀoa, nēti ra mîsa:

“ ‘Khoen ge ǃgâ tsî nî ǃgâ, xawen ge ǁnâuǃā tide;

ǁîn ge kō tsî nî kō, xawen ge tātsē mû tide.

15 ǁÎn ǂâidi a ǃnâudanaxa,

tsîn ǂgaedi âna ǂganam

tsî mûdi âna ǂganam hâ xui-ao.

ǁNā tamas ka io di ge mûdi âna mû,

ǂgaedi âna ǁnâu tsî

ǂâidi âna nî ǁnâuǃā.

On ge tita ǃoa nî ǃhobasen,

tsî ta ge tita ǁîna nî ǂgauǂgau, tib ge Eloba ra mî.’

16 “Xawe ǀkhaehe di ge hâ sago di mûde, mû di ra amaga tsî sago di ǂgaede, ǁnâu di ra amaga. 17 Amase ta ra mîba go: ǂGui kēbo-aogu tsî ǂhanu-ai khoen tsîn kom sago ra mûna mûsa ge turao, xawen ge mû tama ge i tsî ǁnâun nîse, sago ra ǁnâuna, xawen ge ǁnâu tama ge i.

Jesub ra tsoro-aob ǂkhōsa ǁguiǃā

(Markub 4:13-20Lukab 8:11-15)

18 “ǃGâ re nēsi, î ǁnāpa xu ǁkhāǁkhāsen nē ǂkhōs ra tare-e ǂâibasensa. 19 Mîs Gaosib disa ǁnâu tsî xawe ga ǁnâuǃā si tama in ge ǃkhomn, daob xōǀkhā ge ǁnān khami ī. Mîsan ga a ǁnâutoas khaoǃgâ ǂkhaba khoeb xa hā ra tsubuxūhena. 20 Tsî ǁnā ǃkhomn hîa ǃhaob ai ge a ǁnān ge ǁnā khoen hîa mîsan ra ǁnâu, o ǃgâiaǂgaob ǀkha ra ūbasenn ti ra ǂâibasen. 21 Xawen ge hūgan ǃnoma-e ūhâ tama amaga gaxuse hâhâ tama ra-i. Ûib ga a ǃgom tsî ǂgoms di ǃgûsa a ǃgari tsî mîs di ǃgôaǃgonde a hā on ge ra ǂkhabu. 22 ǁKhūn ǃnâ ra ǁnā ǃkhomn ge ǁnā khoen mîsa ra ǁnâuna. Xawes ge mîsa ǃhūbaib di ǂhansendi tsî ǃkhūsib di turagu xa ǀhomdomhe tsî ǂûtani tama ra i. 23 Xawe ǃgâi ǃhūb ai ǁnā hâ ǃkhomn ge ǁnā khoen hîa mîsa ǁnâu tsî ra ūbasenn xa ra ǂâibasen. ǁÎn ra ǃnonadisiǃnâguse, ǃnanidisiǃnâguse tsî kaidisiǃnâguse ǂûtani amaga.”

ǀOmatsân xa hâ ǂkhōs

24 Tsîb ge Jesuba ǁîna ǀnî ǂkhōsa ge ǁgamba: “Gaosib ǀHommi dib ge tsoro-aob ra ǃgâi ǃkhomna ǃhoroǃhanab ǃnâ tsoro ǃkhais ǁkhās khami ī. 25 Xawe ǁnā tsuxuba, khoen ǁom hâ hîab ge ǁîb khākhoeba hā tsî ǀomatsâna ǃhorob ǁaegu tsoro tsî ge bē. 26 Tsî ǃhorob ge ǀomkhâi, ǁhare tsî ǂûtanitsoatsoa, on ge ǀomatsân tsîna ge ǃī. 27 O gu ge ǀhonkhoeb di ǃgāga ǁîb ǃoa hā tsî ge mî: ‘ǀHonkhoetse, ǃgâi ǃkhomnats kha sa ǃhoroǃhanab ǃnâ tsoro tama ge i, on nē ǀomatsâna ǁnâi mâpa xu ra hā?’ 28 Ob ge ǁîgu ǃoa ‘Khākhoeb kom ǁnāsa ge dīo’ ti ge mî. O gu ge ǃgāga ǁîb ǃoa ge mî: ‘ǃGû tsî ge nî ǀomatsâna ǃhomǂui ǃkhaisats ǂhâba hâ?’ 29 Ob ge ge ǃeream: ‘Hî-î, ǀomatsâna ǃhomǂuis ǀkha go ge ǃhoron tsîna a ǃhomǂui ǁkhā, 30 xuige an hoana ǀomkhâiǀhao ǃgaos kōse; î ta tita ǃgaos ǁaeb ai ǃgao-aoga mîba, î gu ǂguro aibe ǀomatsâna ǀhaoǀhao tsî ǃgaeǀkhādi ǃnâ ǃgaeǀkhā, în ǂhubiǂuihe; xaweb ge ǃhoroba ti ǃhorosâuǃnâ-ommi ǃnâ nî ǀhaoǀhaohe.’ ”

Mostardǃkhomro-i* di ǂkhōs

(Markub 4:30-32Lukab 13:18-19)

31 Jesub ge ǀnî ǂkhōsa ǁîna ra ǁgui-aiǃâ: “Gaosib ǀHommi dib ge ǂkhari mostardǃkhomro-i hîa ǃhūb ǃnâ ra ǃhanahe-i khami ī. 32 ǁÎ-i ge ǃhūbaib ai hâ ǃkhomn hoan xa a ǂkhari, xawe i ge ǀomkhâitoa-i kao, nau ǃhanasa xūn hoan ǃgâ-ai ra kai. ǁKhāti i ge ǂhonagu, ǂâu hâ kaiba ūhâga ra ǀhōǂui tsîn ge ǀhomanirona ǁnā ǁnâugu ǃnâ ra om.”

Khūkhū-i xa hâ ǂkhōs

(Lukab 13:20-21)

33 Jesub ge ǁkhawa ǀnî ǂkhōsa ǁîna ge ǃhoaba: “Gaosib ǀHommi dib ge khūkhū-i, taras ū tsî ǃores di mel-i ǃnâ ra ǂgā tsî hoaraga pere-e ra khū kai i khami ī.”

Jesub ǂkhōde ra sîsenūba ǃaromas

(Markub 4:33-34)

34 Jesub ge khoen ǀkhab gere ǃhoao, ǂgui ǂkhōde gere sîsenū, ǁîn nî ǁnâuǃā ǁkhāse. 35 ǁÎb ge nēsa gere dī, kēbo-aob Jesajab di mîs nî dīǀoaǀoahese:

“Ti ams ǀkha ta ge ǂkhōde nî sîsenū

tsî ǃhūbaib di ǃgaoǃgaohesa xu

ǂganǃgâsana nî ǃhoaǂui.”

Jesub ge ǀomatsân xa hâ ǂkhōsa ra ǁguiǃā

36 Tsî Jesub ge ǂnubis khoena xu ǃgû tsî oms ǃnâ sī ge ǂgâ, o gu ge ǁkhāǁkhāsabega ǁîb ǃoa hā tsî ge mî: “ǃHanab ǃnâ hâ ǀomatsân di ǂkhōsa ǁguiǃāba ge re tare-es ra ǂâibasensa.” 37 Ob ge Jesuba ge ǃeream: “ǁNāb ǃgâi ǃkhomna ra tsorob ge Khoen Ôaba. 38 ǃHanab ge ǃhūbaiba; ǃgâi ǃkhomn ge Gaosib di ôana; tsî ǀomatsân ge Satanni di ôana. 39 Khākhoeb ǀomatsâna ge ǃhoron ǁaegu tsorob ge ǁgâuaba.* Tsî ǃgaoǁaeb ge ǃhūbaib di ǀunisa tsî ǃgao-aogu ge ǀhomǃgāga. 40 ǀOmatsân ra ǀhaoǀhaohe tsî ǀaes ǃnâ ǂhubiǂuihes ǁkhās khami i ge ǃhūbaib di ǀunis ai nî ī. 41 Khoen Ôab ge ǁîb ǀhomǃgāga nî sîǂui tsî gu ge ǁîb Gaosiba xu hoa khoen, ǁorena ra ǃaroman tsî ǁgauoǃnân tsîna nî ǀhaoǀhao. 42 Tsî gu ge ǁîna kaise ǀgamsa ǀaeb ǃnâ nî aoǂgā, ǁnāpab ge āb tsî ǁaninǁgûb tsîna nî hâ. 43 ǃNubain ge ǂhanu-aina sores khami Gaosib ǁîn Îb dib ǃnâ nî ǂkhai. ǂGaera ūhâ-e, a-i ǁnâu!

Sâusa ǁuib di ǂkhōs

44 “ǁKhātib ge Gaosib ǀHommi diba ǁuib, ǃhanab ǃnâ sâusab hîa khoeb xa hōhe tsî ra gaugauheb khami ī. ǁÎb ge kaise ǃgâiaǂgao tsî ǃgû tsî ūb hân hoana ǁamaxū tsî oa tsî ǁnā ǃhanaba ra ǁama.

Pereldi di ǂkhōs

45 “ǁKhawab ge Gaosib ǀHommi diba perelde ra ôa ǁama-aob khami ī, 46 tsîb ga ǀgui ǃgomǀgausa perelsa hō, ob ge ǃgû tsî ūb hân hoana ǁamaxū tsî ǁîsa ra ǁama.

ǀÛis xa hâ ǂkhōs

47 “Gaosib ǀHommi dib ge ǁkhāti ǁauǃkhō-aogu hoa ǁauǃnôana gu nî ǃkhōse hurib ǃnâ ra aoǂui ǀûis khami ī. 48 Tsî ǀoas kao gu ge hurirob ǀnomammi ai ǂgaeǂui si tsî ǂnû tsî ǃgâi ǁauna sāǂui tsî ǃgâina ǀharudi ǃnâ aoǂgā tsî ǂûheǁoasana ra aoxū. 49 ǁNāti i ge ǃhūbaib di ǀunis ai nî ī, ǀhomǃgāgu ge ǃgûǂoa tsî ǂkhaba khoena ǂhanu-ain ǁaeguba xu nî ūǂui 50 tsîn ge kaise ǀgamsa ǀaeb ǃnâ nî aoǂgāhe, ǁnāpab ge āb tsî ǁaninǁgûba nî hâ.

ǀAsa tsî ǀoro amab

51 “Nē ǂkhōde ǁnâuǃā go go?” tib ge Jesuba ge dî gu. O gu ge “Ā” ti ge ǃeream bi.

52 Ob ge Jesuba ǁîgu ǃoa ge mî: “ǁNā-amaga mâ ǁkhāǁkhā-aob Moseb ǂhanub* dib, Gaosib ǀHommi dib ǃnâ ǁkhāǁkhāsabeb ase ǁkhāǁkhāhe hâb hoab ge sâu-ommi ǀhonkhoeb hîa ǁîb ǁuiba xu ǀoron tsî ǀasana ra hā-ūb khami ī.”

Jesub ge Nasarets ǃnâ ra ǃharaxūhe

(Markub 6:1-6Lukab 4:16-30)

53 Tsî Jesub ge nē ǂkhōde ǃhoatoa, ob ge ǁnā ǃhūǃâsa xu ge ǃgû. 54 Tsî ǁgûsi ǃās ǃnâb ge sī, ob ge sinagogeb* ǃnâ ge ǁkhāǁkhātsoatsoa. ǂGuin ân ge nē ǁkhāǁkhāǀgaub ǁîb dib xa burugâ tsî ǁîǃnābe gere dîgu: “Mâpa xub kha ǁîba ǁnâi nē gā-aisib tsî ǁkhāsib tsîkha ra hō, nē buruxa dīna dīs ǃaroma? 55 ǃNaokuru-aob ôa tamaba? Nēba kha Marias ôa tamaba tsî Jakobub, Josefi, Simonni tsî Judab tsîgu ǃgâsa tamaba? 56 Tsî hoa ǃgâsade kha ganupe nēpa ǁan tama di hâ? Mâpa xub ǁnâi nēn hoana ra hō?” 57 Nē xūn xa ǃaromahe hâsen ge ǁîna Jesuba ge ǃharaxū. Ob ge Jesuba ge mî: “Hūs di ǃkhaib hîab kēbo-aoba ǃgôaoǃnâse ra ûi-ūheb ge ǁîb di aboxaǃhūb tsî ǁîb di ǂhunuma khoexakhoen tsî ǁîb oms ǂûs ǃnâsa.” 58 Tsîb ge ǁnāpa kai buruxa dīna ge dī ǁoa i, khoen di ǂgomoǃnâsib xa ǃaromahe hâse.