ǁGôa-elogu ra ǁguibahe ǂûn xa hâ dîs
1 Tsî ǁgôa-eloǁguibadi xa da ge hoada xūna ǀgoras di ǂansa da ūhâ ǃkhaisa a ǂan. Nē ǂans ge ǀgapiǂâixasiba ra mā, xawe ǀnammi ge ra omkhâi. 2 Khoe-i ga xū-e i a ǂan ti ǂâi, xawe-i ge noxopa ǂan i nî khami ǂan tama hâ. 3 Xawe Eloba ga ǀnam khoe-i ge ǁîb xa a ǂanhe.
4 Tsî ǁgôa-elogu ra ǁguibahe ǂû-i xa ǂûs xa da a ǂans ge, ǁgôa-elo-i ǃhūbaib ǃnâ xū tama tsî i ǀnî elo-e hâ tamasa, ǀgui Elob ǀguib. 5 Tsî elose ra ǂgaihen ga ǀhommi ǃnâ tamas ka io ǃhūbaib ai hâ, tsî ǂgui elogu tsî ǂgui ǃkhūgu ga hâ, xawes tsîna 6 da ge sada ǀgui Elob ǀguiba ūhâ, ǁGûb, ǁîba xun hoa xūna hâb tsî ǁîb ǃnâ da sada hâba tsî ǀgui ǃKhūb Jesub Xristub,* ǁîb ǃnâ-un hoa xūna hâb tsî sada ǁîb ǃnâ hâba.
7 Xawe nē ǂans ge hoan ǃnâ hâ tama hâ. ǀNîn ge ǁnātikōse ǁgôa-eloga ǃoabasa ǁnaeti tsî nētsēs kōse ǁnāti ī ǁgan-en ga ǂûo, ǁgôa-elogu ǁguibahe hâ ti ra ǂâi tsî ǁîn ǂgaoǂans a ǂkhabusa xui-ao ra ǀhapitsâsen. 8 ǂÛn hîa da ra ǂûn ge Elob tawa ǀgūǀgū da tama hâ. ǂÛ tama da ka io, xū-e tôasi tama i tsî ǂû da ka, xawe da xū-e hō-oa tama.
9 Xawe ǂanbasen, îb tā ǃnorasasib âdo ǂgoms ǃnâ ǂkhabusana ǃnôa-aiǃnaose ība. 10 Khoe-i ga sats ǂansa ūhâtsa ǁgôa-elotempeli ǃnâ ǂûts rase mûo, xares kha ǁî-i hîa ǂkhabusa ǂgaoǂansa ūhâ-e ǂgaoǂgaoǃnâ tide, ǁgôa-elogu ǁguibahe hân xa ǂûsa? 11 Tsî-i kom sa ǂkhabusa ǃgâsa-i, Xristub xa ge ǁōbahe-e sa ǂans xa ǃaromabahe hâse nî kāǁō-o. 12 ǁNāti du ga ǃgâsan ǃoagu ǁore tsî ǁîn di ǂkhabusa ǂgaoǂansa tsûtsû, o du ge Xristub ǃoagu ra ǁore. 13 ǁNā-amaga, ǂû-i ga ti ǃgâsa-i di ǁnāǁgôasa ǃaroma, o ta tātsē ǁkhawa ǁgan-e ǂû tide, ti ǃgâsa-e ta ǁnāǁgôa kai tidega.
© Khoekhoegowab Elobmîs © Bible Society in Namibia, 2020.
