ǃKhūb ge Egipteba nî ǁkhara
1 ǃKhūb di mîs ge ǁkhawa tita ǃoa ge hā. 2 “Khoenôa ǀgôatse, kēbo î mî re: Nētib ge ǃKhūb Eloba ra mî.
“ ‘Ā re ǁnā tsēs ǂama!
3 Tsēs go ǀgū xuige,
ǃKhūb di tsēs go ǀgū xuige.
Tsēs ǃâudi dis
tsî ǃkhaenas ǁaeba ǁaedi ǃaroma.
4 Torob ge Egipteba nî hāǂam,
ǂōǂōsiba Etiopiaba,
ǂguin ga Egipteb ǃnâ ǃgamhe
tsî ǁîb ǃkhūsiba tanibēhe
tsî ǃgaoǃgaogu âba khôaǁnâheo.’
5 “ǁNā torob ǃnâ gu ge ǁkhāti Etiopiab, Puti, Ludi, hoaraga Arabiab, Libiab, Kubi tsî ǁîgu ǀkha ǃgaeǁaresen hâ ǃhūgu di toroǃkhamaogu hoaga nî ǃgamhe.”
6 Nētib ge ǃKhūba ra mî: “ǁNān, Egipteba ra ǂkhâǃnân ge nî ǁnā tsî ǁîb di ǀgapiǂâixasib ge nî ǃgamǃgamhe. Migdolsa xu Sienes kōsen ge ǁîna gôab ǃnâ nî ǁnā,”
tib ge ǃKhūba Eloba ra mî.7 “Tsîb ge hîkākāsa ǃhūgu ǁaegu hîkākāsase nî i tsî ǁîb ǃādi ge khôaǂkhūsa ǃādi ǁaegu khôaǂkhūsase nî ǁgoe. 8 Egipteba ta ga ǀaes ǀkha ǂhubi tsî ǁîb di ǂkhâǃnâ-aon hoana ǃgam, on ge nî ǂan tita a ǃKhū ǃkhaisa.
9 “ǁNātsē gu ge sîsabega tita xu doe-omdi ǀkha nî ǃnariǂoa, ǁūse ǁgoe Etiopiaǁîna gu sī nî ǃhuriǃhuriǃnâse tsîn ge ǃaob xa nî hāǂamhe, Egipteb di tsēs ai i ge ī khami. ǁNā tsēs ge ra hā.”
10 Nētib ge ǃKhūb Eloba ra mî: “Tita ge Egipteb di ǃkhūsiba Babilons gao-aob Nebukadnesari di ǃommi ǀkha nî ǀamǀam. 11 ǁÎb tsî ǁîb di ǁaes, ǁaedi hoadi ǃnâ ǃaoǃaosa ǁaes ge Egiptebas nî hîkākāse nî hā-ūhe, tsîb ge ǃhūba ǃgamhe hân xa nî ǀoa. 12 Tita ge Nylǃāba nî ǂnâ kai tsî ǃhūba ǂkhaba khoen ai nî ǁamaxū. ǃHaokhoen ge ǃhūb di xūn hoana nî hîǀhuru. Tita ǃKhūta ge ǁîsa go mî.”
13 Nētib ge ǃKhūb Eloba ra mî: “Tita ge ǁgôa-elo īga nî hîkākā tsî Memfis di īga nî ǀamǀam. ǂGaeǂgui-ao-i ge ǃaruǀî Egipteb ǃnâ hâ tide tsî ta ge ǃaoba Egipteb ǃnâ nî hā-ū. 14 Tita ge Patrosa nî ǃū-aisa kai, Soans ǃnâ ta ge ǀaeǂhubiba nî hā kai tsî ǀgoraǃgâde Tebes ǃnâ. 15 Tita ge ti ǁaiba Egipteb di omǂnamisa ǃās Pelusiums ǂama nî ǁhōǂui tsî Tebes di ǂguiba nî hîkākā. 16 Tita ge Egipteb ǂama ǀae-e nî ǂhubi tsîs ge Pelusiumsa kai ǃaob ǃnâ nî hâ. Tebes ge nî khôaǃāhe tsî gu ge ǂnubiǂgoagu âsa nî khôaǃkhopahe. 17 Ons tsî Pibesets tsîra di ǂkham khoegu ge torob ǃnâ nî ǁō tsî nau khoen ge ǃkhōsabese nî ǃgû-ūhe. 18 Taxpanhes ǃnâs ge tsēsa nî ǃkhae, Egipteb di ǀgaiba ta ga ǀam kai tsîb ga ǁîb di ǂnīsa ǀgaiba toao. ǃÂu-i ge ǁîsa nî ǃgū-ai tsî ǁîb ǃādi ge ǃkhōsabese nî ūhe. 19 ǁNāti ta ge Egipteba nî ǁkhara, on ge tita a ǃKhū ǃkhaisa nî ǂan.”
Hîkākāsa ǀgaib Egipteb gao-aob dib
20 Disiǀguiǀaǁî kurib di ǂguro ǁkhâb di hûǁî tsēs ais ge ǃKhūb di mîsa tita ǃoa ge hā. 21 “Khoenôa ǀgôatse, tita ge Egipteb gao-aob, Faraob di ǁôaba go khôa, tsî mû ǁîb ge ǂgamūlapigu ǀkha ǂgamǀkhāhe tama hâ ǂgau tsî ǀgai tsîb gôaba nî ǃkhō ǁkhāse. 22 ǁNā-amagab ge ǃKhūb Eloba nēti ra mî. Tita ge Egipteb gao-aob ǃoagu hâ. Tita ge ǁîb di ǁôakha nî khôa, ǂurub tsî khôa hâb tsîkha hoakha, tsî ta ge gôaba ǁîb ǃomǁaeba xu nî ǁnā kai. 23 Tsî ta ge Egipteǁîna ǃhaodi tsî ǃhūgu ǃnâ nî ǀgaruǀgaru. 24 Tita ge Babilons gao-aob ǁôakha nî ǀgaiǀgai tsî ti gôaba ǁîb ǃommi ǃnâ nî mā, xawe Faraob di ǁôakha ta ge nî khôa tsîb ge ǁîb khākhoeb aiǃâ nî ǃgae, ǁōǁōsase tsuihe hâ khoeb khami. 25 Babilons gao-aob ǁôakha ta ge nî ǀgaiǀgai, xawe Faraob ǁôakha ge nî ǁnā; on ge tita a ǃKhū ǃkhaisa nî ǂan, gôaba ta ga Babilons gao-aob ǃommi ǃnâ mā, tsîb ga ǁîba Egipteb ǃoagu ǀhōǂuio. 26 Tsî ta ge Egipteǁîna ǃhaodi tsî ǃhūgu ǃnâ nî ǀgaruǀgaru, on ge tita a ǃKhū ǃkhaisa nî ǂan.”
© Khoekhoegowab Elobmîs © Bible Society in Namibia, 2020.
