Jakobub 4 - Khoekhoegowab New Translation 2020 (KKG20)

ǃHūbaib ǀkha ǀhōgus

1 Tare-e sadu ǁaegu ǂnoagub tsî ǃkhams tsîna ra ǃaroma-e? Nēsa sadu ǂkhaba turagu hîa sadu ǃnâ ra ǃkhamgu xa ǃaromahe tama hâ? 2 Sadu ge tura du ra, xawe hō tama hâ tsî du ǃgam tsî du ra suri, xawe ǂhâba du hâ-e a hō ǁoa. ǃKham tsî ra torodī xawe du ge hō tama hâ, ǀgore tama du hâ amaga. 3 Tsî du ga ǀgore ǃnās ais ge sadu ǀgoresa ǁnâu-amhe tama hâ, tsū ǂâibasendi ǃaroma du ra ǂgan xui-ao, sadu turagu nî dīǀoaǀoahese ǀgui. 4 Sa ǃgamekhôa-aodo, mûǂan tama du kha hâ, ǃhūbaib ǀkha ǀhōgus ǀkha du ra Elob di khākhoe kai ǃkhaisa? Tsî ǁkhawa ta ra mî, nē ǃhūbaib di ǁkhoaba du nî saos karao, du ge ra Elob di khākhoe kai. 5 Tsî ǂâi du kha ra Xoas ǁause ra mî ǃkhaisa: “Gagas sada ǃnâ ǁan hâs ǂamab ge tauxase ra ǁkhore.” 6 Xawe ǁîb ge ǃnāsa ǀkhomma ra mā, Xoas ra mî khami: “Elob ge ǀgapiǂâixa khoena ra mâǃoa, xaweb ge ǃgamǃgamsen rana ǀkhomma ra mā.”

7 ǁNā-amaga du aitsama Elob ǃnâ māsen. Tsî ǁgâuaba* mâǃoa, ob ge sado xu nî ǃkhoeni. 8 Elob ǃoa du hā re, ob ge ǁîba sadu ǃoa nî hā. ǁĀnǃom sadu ǁore-aodo, î sadu ǀgamaixado ǂgaogu âdo ǃanuǃanu. 9 Tsū xūn hîa du ra dīn xa, an ǁgamron âdo ǂnâ, î ǃgamse ǃoa. Ab sadu di âiba āb ǃnâ ǀkharaǀkharahe tsî ǃgâiaǂgaob âdo ǃoab ǃnâ. 10 ǃKhūb aiǃâ ǃgamǃgamsen, ob ge nî ǀgapiǀgapi du.

Nau Xristeǁî-e ǀgoraǃgâs ǃoagu hâ ǃkhâikhoms

11 Ti ǀnam ǃgâsado, tā mîǁgaiǁgaigu. Mîǁgaiǁgaigu tsî du ga ǀgoraǃgâgu, o du ge Elob ǂhanub ǂûba mîǁgaiǁgai tsî ra ǀgoraǃgâ. Tsî du ga nē ǂhanuba ǀgoraǃgâ, o du ge ǃaruǀî ǁîba ǁnâuǀnam tama i tsî ra ǁîb di ǀgoraǃgâ-ao kai. 12 Elob ǀguib ge ǂhanuǂnûiǂgā-ao tsî ǀgoraǃgâ-ao. ǁÎb ǀguib ge huiǂuis tsî hîkākās di ǁkhāsiba ūhâ. Sada ge nau khoe-e ǀgoraǃgâs di ǂhanuba ūhâ tama hâ.

Koasens ǃoagu hâ ǃkhâikhoms

13 ǃGâise ǃgâ re, sadu hîa ǁnaeti hâdo nēti mîsa: “Nētsē tamas ka io ǁari ta ge ǀnî ǃā-i ǁga ǃgû, tsî kurib di ǁaeba ǁnāpa sī ǁan tsî ǂharugus ǃnâ-u ǂgui mari-e nî hōbasen.” 14 Xawe du ge ǁari nî īn xa a ǀū tsî mâtib sadu ûiba nî ī ǃkhais tsîna! Sadu ûib ge ǀanni ase ī, ǂkhari ǁaero-i ǀgui-e hâ tsî ǃhaese ra bēba. 15 ǁNā-amaga du ge nēti nî mî: “ǃKhūb di ǂâis ka tsî da nî ûis ka, o da ge nē-i tsî nau-i tsîna nî dī.” 16 Xawe du ge sado ǁîǃgôasens ǃnâ ra koasen tsî ǁnāti ī koasenǃnôas ge a ǂkhaba.

17 ǁNā-amagats ge ǂhanu a tits ǂan xū-ets ga dī tama i, o ra ǁore.