1 Jakobuta, Elob tsî ǃKhūb Jesub Xristub* di ǃgāta xu:
Elob di khoen ǃhūbaib hoaragab ǃnâ ǀgaruǀgaruhe hân ǃoa hâ tawedes.
ǂGoms tsî gā-aisib
2 Ti ǃgâsado, ǂguiǃnâgu ǃâitsâ-ain ga hāǂam duo, as nēsa ǃgâiaǂgaob ase ī re. 3 Sadu ǂgoms di ǃâitsâhes ge mâǁaposa ra ūhā. 4 ǁNā-amaga as sadu mâǁaposa dīǀoaǀoasa, î du dīǀoaǀoasase ī, xū-i xare-e tôasi tamase. 5 Xawe sadu di ǀgui-i ga gā-aisiba ǂhâbao, a i Elob hîa māǂgaoxase tsî ǀkhomxaǃnâse hoana ra māb ǃoa ǀgore, o i ge nî ǃkhōǃoa. 6 Xawe ǂgan bits kao, ǂgom î tā îganǀgē. Îganǀgē ra-i hurib di ǃgabigu, ǂoab xa ǃgomhe tsî ra aomahegu khami ī xuige. 7 ǁNāti ī khoe-i ge xū-i xare-e ǃKhūba xu a ǃâubasen ǁoa. 8 ǀGamǂâixa khoe-i ge dī-i ra xū-i hoa-i ǃnâ a mâǁapo ǁoa.
ǀGâsib tsî ǃkhūsib
9 ǁNā Xristeǁîn hîa ǀgâsan ge nî ǃgâiaǂgao, Elob ge ǁîna ǀgapiǀgapi xui-ao, 10 tsî ǁnān hîa ǃkhū hâna an ǂkhî, ǃKhūb xan ga ǃgamǃgamheo, ǁîn ǃaub di ǃkhā-i khami nî bē xui-ao. 11 Sores ge ǁhais ra khami ǁîs di ǁkhôasa ǀkhâugu ǀkha ǀgân hoana ra ǂnâ kai tsî ǃkhāna îsasib hoab ân ǀkha ra ǂhubiǃan. ǁKhā ǀgaus ain ge ǃkhū hâ khoen tsîna turagu hoagu ân ǀkha nî kā.
ǃÂitsâ-ain
12 ǀKhaehen ge hâ ǁnā khoen hîa, ǃâitsâgu ǃnâ ǀams kōse ra mâǁapona. ǁÎn ge ûib di kronsa nî hō, Elob ǁnān ǁîba ǀnam hân hoana mîmâiba hâsa. 13 Khoe-i xare-e a i tā ǃâitsâhe i kao, “Elob xa ta ra ǃâitsâhe” ti mî. Elob ge tātsēs tsîna ǁoreb nîse ǃâitsâhe ǁoa tsî ǁkhātib ge Elob ǂûba khoe-i xare-e ǃâitsâ tama hâ. 14 Xawe ra ǃâitsâ da gu ge sada di ǂkhaba turagu hîa ǂgaeǂhapu tsî ra nanabē daga. 15 ǁNās khaoǃgâ, turab ga ǃkhōǃoa, ob ra ǁoreba ǁora tsî ǁoreb ga dīǀoaǀoahe, ob ra ǁōba ǁora.
16 Ti ǀnam ǃgâsado, tā ǂgaeǂhapu kaisen re! 17 Mâ ǃgâi tsî dīǀoaǀoasa mās hoas ge ǀgapiseba xu, ǁGûb ǃnâba ge kuruba xu ra hā. ǁÎb tātsēs tsîna ǀkhara tsî ǁkhāti ǃkhaena-i xare-e ǃaroma tideba. 18 ǁÎb di ǃgâisiba xus ge sadab ge mîs amab dis ǃnâ-u kuru tsî ǁhûiǂuibasensa. ǁNā-amaga da ge sada ǁîb di ǂguro ǃkhōǂuisabe, kurusaben hoan ǃnâ.
ǁNâus tsî dīs
19 Ti ǀnam ǃgâsado, nēsa ǃgâise ǃkhōmâi! ǃGâs ǃnâ ǃhae, xawe ǃhoas ǃnâ ǂau, î ǁaib ǃnâ ǂau, 20 ǁaixasib Elob di ǂhanu-aisiba sîsenǂui tama xuige. 21 ǁNā-amaga ǀurixasib tsî ǂkhabasib hoaba xu ǀgora, î tsamtsiǃnâsib ǃnâ, mîs hîab ge Eloba sadu ǂgaogu ǃnâ ǃhanasa ǃkhōǃoa. ǁÎs ge sadu ǀomde oresa a ǁkhā.
22 Mîs di dī-ao kai re, î du tā ǁnâus ǀguisa hî, î du tā ǁî-aitsama ǂgaeǂhapu kaisen. 23 Khoe-i ga mîsa ǁnâus ǀguisa hî, xawe ûiǂui tama i, o i ge mûsenǃnâxūs ǃnâ ra kōsen khoe-i, 24 aitsama mûsen tsî ǃgûbē i kao, ī i a ǀgausa ra ǀuru-i khami ī. 25 Xawe i ga Elob di dīǀoaǀoasa ǂHanub hîa ra ǃnoraǃnorab ǃnâ kō tsî ǁîb ra mîn hoana dī tsî ǀuru tama i, ob ge Eloba ǁî-e ǁnās ǃaroma nî ǀkhae. 26 Tsîts ga gagasi khoese ǂgaisen tsî xawe sa namsa ǃkhōǀgara tama i, ots ge ǁî-aitsama ra gāsen tsîs ge sa ǂgomsa ǁau. 27 Elob ǁGûb ra ǃanu tsî ǃūmûse ǃgapaǀî ǂgoms ge a nē: ǃGuniǀgôan tsî ǃoataradi tsîna ǁîn di ǃgomsigu ǃnâ sari tsî mâxōǀkhās, tsî ǁî-aitsama ǃhūbaiba xu ǂnao-ose ūhâsensa.
© Khoekhoegowab Elobmîs © Bible Society in Namibia, 2020.
