Davidi Filisteǁîn tawa
1 Davidi ge ǁîb ǂûb ǃnâ ge ǂâi: “Tsēdi ǀguis ai ta ge Sauli ǃomǁae nî ǁō. ǀNî ǀgau-i ge a ǀkhaiba te; ǃgâi ga ǃkhais ge Filisteǁîn ǃhūb ǃoa ta ga ǃkhoenibasensa. Ob ge Saula tita Israeli ǃnâ nî ôaǀû tsî ta ge ǁîb ǃomǁaeba xu nî ûiǂoa.” 2 Davidi ge ǁnātimîsi ǂhomisen tsî ǃnanikaidisi aogu ǁîb tawa hâgu ǀkha Maoki ôab Akisi, Gats gao-aob ǁga ge doeǃgâu. 3 Tsî gu ge Davidi tsî ǁîb aogu tsîga ǁîgu taradi tsî ǀgôan ǀkha Gats ǃnâ sī aibe ge ǁan. Davidi tarara, Ahinoams Jesreels dis tsî Abigails, Nabali ǃoataras, Karmels dis tsîra on ge ǁîb ǀkha ge hâ i. 4 Sauli ge Davidi go Gats ǃoa ǃhū ǃkhaisab ge ǁnâu, o ǃaruǀî ǁîba ôa tama ge i.
5 Ob ge Davida Akisi ǃoa ge mî: “ǃGâiba tsi i karao ǂkhari ǃādi ǀguisa mā te, î ta ǁîs ǃnâ ǁan. Tarexa ta kha sats ǀkha gao-aosi ǃās ǃnâ nî ǁan?” 6 Ob ge Akisa ǁnātsē Siklagsa ge mā bi, ǁnā ǃkhais ǃaromas ge Siklagsa nētsēs kōse a Judab gao-aogu di. 7 Davidi ge kurib tsî haka ǁkhâga Filisteǁîn ǃhūb ǃnâ ge ǁan.
8 ǁNā ǁaeb ǃnâ gu ge Davidi tsî ǁîb khoegu tsîga Gesurǁîn, Girsiǁîn tsî Amalekǁîn tsîn ǃoagu gere torodī. Nē khoen ge ǂomxase ǁnā ǀkharib ǃnâ, Sursa xu Egipteb kōse ge ǁan hâ i. 9 Davidi ga ǃhūb ǃoagu ǃkham tsî dan bio, ob ge hoa khoena gere ǃgam tsîb ge gūn, goman, dâukin, ǃnain tsî saran tsîn hoana ū tsî Akisi ǁga gere oa. 10 Tsî Akisi ga “Tari-i ǃoagu go nētsē goro ǃkham?” ti a dî bi, ob ge Davida “Judab ǃkhawagas ǃnâ” tamas ka io “Jeraxmeelǁîn ǃkhawagas ǃnâ” tamas ka io “Kenǁîn ǃkhawagas ǃnâ” ti gere ǃeream. 11 Davidi ge khoe-i xare-e ge ûiǂoa kai tama hâ i, î-i tā Gats tawa sī ǁîga ǀanaǃgâ tsî “Davidi ge nēti go dī” ti mî. Nētib ge Davida Filisteǁîn ǃhūb ǃnâb ge ǁan hâ i ǁaeb hoaba gere dī. 12 Akisi ge Davida ge ǂgomǃgâ hâ i tsî ǁîb ǂûb ǃnâ gere ǂâi: “ǁÎb ǁaes, Israels tawab ge go ǁkhan kaisen tsîb ge ǀamose tita nî ǃoaba.”
© Khoekhoegowab Elobmîs © Bible Society in Namibia, 2020.
