ǁGûna ǃgôasiba mās di ǁguiǂamdi
1 ǀGôado ǃgâ re; tita ge sadu îta. Tita ra mîba du xūna dī, o du ge nî sâuhe, 2 ǃKhūb ge ǁgûga, ǀgôan âgu ǂama ǁnā ǀgaiba ge mā tsî ǀgôana ra ǁguiǂam, în ǁîn îde ǁnâuǀnam. 3 Sa îbats ga ǃaoǃgâ, ots ge sa ǁorena nî ǀûbahe 4 tsî sa îsats ga ǃgôasiba mā, ots ge kaise nî ǃkhū. 5 Sa îbats ga ǃaoǃgâ, on ge sa ôan ǂûna ǀguitsē satsa nî ǃgâiaǂgao kai; ǃKhūb ge sa ǀgorede nî ǁnâu-am. 6 Sa îba ǃgôasiba mā tsî sa îsa ǃgâiaǂgao kais ǀkhats ga ǃKhūba ǁnâuǀnam, ots ge ǂomxase nî ûi. 7 Īse du a ǁîn di khobo, xū-i khami du ge sadu îna nî ǁnâuǀnam. 8 Dīts ra xūn tsî mîts ran tsîn hoan ǃnâ sa îba ǃgôasiba mā, îts ǁîb di ǀkhaeba ǃkhōǃoa ǁkhā. 9 ǁGûn ge ǁîn ǀkhaeban ga mā, o ǁîn ôan di omaride ra ǀgaiǀgai, xawe ǁîn ôanan ga ǀâxare, on ge ǁîn ǃgaoǃgaob ǂûba ra hîkākā.
10 Tā ǁî-aitsama ǃgôasiba sa îb di māǂuis tawa ôa; sa îb di ǃgôaoǃnâsib ge satsa ǂkhaisiba ūhâba tama hâ. 11 Sa ǃgôasib ǂûb ge sa îbats ūba hâ ǃaoǃgâba xu ra hā. ǀGôan ga ǁîn di îde ǃgôasiba ūhâba tama i, os ge ǁnāsa ǁîn ǂûn di taosib ase i. 12 Ti ôatse, sa îba kairab kao ǃkhōǂhomi, î tā ǁîba nî ǂâiǂhansen kai xū-e, ûib hâs kōse dī. 13 ǁÎb di ǁnâuǃāb ga garu khao-oa, xawe taniǀnamxa, î tā sats ǀgaisa tsî a ǂuru ǃkhais ǃaroma ǁîba ǃharaxū. 14 ǃKhūb ge sa îbats ra dība ǃgâiba ǀuru tide tsî nēs ge sa ǁoren di ǀûbas ǃaroma nî sîsenūhe. 15 ǃGomsib ǃnâts ga ǂgâ, ob ge ǃKhūba sa ǃgâisib xa ǂâi tsî nî hui tsi, tsîn ge sa ǁorena sores di ǀgammi ǃnâ ǁgoe ǃkhoab khami nî tsunibē. 16 Sa îba ǃharaxūs tsî sa îsa ǁaiǁais ge ǃKhūba ǃkhāǃkhās khami ī tsî ǁnāsats ga dī, ob ge ǃKhūb di ǀâxareba ǀnai sats ai hâ.
ǃGamǃgamsens
17 Ti ôatse, dīts ra xūn hoana ǃgamǃgamsens ǀkha dī, on ge ǁnān Elob xa ǃkhōǃoahe hâna nî ǀnam tsi. 18 ǀGapi ǃharodi ǃnâts ra sī kōsets ge ǃaruǀîǀgui nî ǃgamǃgamsen, ob ge ǃKhūba sats ǀkha nî ǂkhîǂâixa. 20 ǃKhūb ge kai ǀgaiba ūhâ, tsîb ge ǁnān hîa ǃgamǃgamsen hân xa ǃgôasiba ra māhe. 21 Tā ǁnâuǃā ǁoats a xūnats nî ǁnâuǃā ǃkhaisa dītsâ, tamas ka io sa ǁnâuǃāb a sīǃnâ ǁoa xūna ôaǃnâtsâ. 22 ǃKhūb ge mā tsi ǂhanub ai ǂâisa ǂnûi, î tā ǃKhūb xats mîbahe tama xūn ai ǂâisa ǂnûi 23 tsî ǁîn ǀkha ǁaeǁaesen. Sats ge ǁgauhen hoan ge ǁnâuǃāhes ǃaroma, khoesi ǀgaib ǂamai hâ. 24 ǂGui khoen ge ǁîn di ǂâidi xa ge ǂgaeǂhapuhe; ǁîn di tsū ǂâiǀgaugu ge ǁîn di ǀgoraǃgâsa ge tsūtsū.
26 ǃNâudanaxasib ge ǀams ai ǃgomsib ǃnâ nî ǂgā tsi. ǃNâudanaxasibats ga ǀnam, ob ge ǀguitsē nî ǃgam tsi. 27 ǃNâudanaxa khoe-i ge ǃgomsigu ǃnâ nî ǃkharu. ǁOre-aon ge nē ǁoreba xu nau ǁoreba ǃnao-aisens ǀkha ra aiǃgû. 28 ǂKhabab ge ǀgapiǂâixan ǃnâ ge ǃnomaǃkhō tsîn ge tsūǀkhāb ga ǁîna ǁnāǂam, o huihe ǁoa. 29 ǁNâuǃāxa khoen ge ǂkhoamîdi tsî ǂkhōde xu nî ǁkhāǁkhāsen. ǁKhāǁkhāsen ǂgaon ra xui-aon ge ǃgâise ra ǃgâ.
ǀGâsana mās
30 ǀGâsana mās ge ǁgam-i ra ǀaesa ǀaris ǁkhās khami, ǁoren ǀûbasa hā-ū ǁkhā. 31 ǁÎ-i huiba ǃgomsib ǃnâ iga ǂgâo, nauna xu ra ǃkhōǃoa ǂgao amaga i ge naun ǃoagu a ǃgâi tsî hānîǁaeb ǃaroma ra aiǂhomi.
© Khoekhoegowab Elobmîs © Bible Society in Namibia, 2020.
