Jeremiab ge gomajokhoesa ra ǂgaeǂgā
1 Sedekiab, Josiab ôab, Judab gao-aob gaosis di tsoatsoas ǃnâs ge mîs ǃKhūb disa Jeremiaba ge hāba, mî rase:
2 Nētib ge ǃKhūba tita ǁga ge mî: “ǃGae-ūdan tsî ǃnaogu tsîna dībasen îts ǁîna sa ǃaos ai ǁgui. 3 Îts haisi-amsa Edommi gao-aob, Moab gao-aob, Amonni ôagu di gao-aob, Tirus gao-aob tsî Sidonni gao-aob ǃoa, Jerusalems tawa ge hāgu ǀkha, Sedekiab, Judab gao-aob ǃoa sî. 4 Îts ǁîga mîmā, î gu ǀhonkhoegu âga mîba: ‘Nētib ra ǃKhūb Hoaǀgaixab, Israeli Eloba mî: Nēti go ge sago ǀhonkhoegu ǃoa nî mî: 5 Tita ge ǁî ta ti kai ǀgaib ǀkha ǃhūbaib, khoesib tsî hoaraga ǀgurun tsî xamarin ǃhūbaib ai hâna ge kuru ta, tsî ta ge ǁîna ǂgao ta ra-i hoa-e ge mā. 6 Tsî tita ge ǁîta nē hoaraga ǁaede ti ǃgāb, gao-aob Nebukadnesari Babiloniab dib ǃomǁae ge mā ta; ǁkhāti ta ge ǃgarob ǀgurun tsî xamarin ona ǁîba nî ǃoabase ge dī.’ 7 ǁAedi hoadi ge ǁîb tsî ǁîb ôab tsî ǀgôab âb di ôaba nîra ǃoaba, ǁîb ǃhūb on di ǁaeb nîra hās kōse; ǃnubain ge ǀgaisa ǁaedi tsî kai gao-aogu tsîna ǁîba nîra ǃoabakaisen.”
8 “Tsî i ge nîra ī, ǁnā ǁaes tsî ǁnā gaosis, hîa Nebukadnesari, Babilons gao-aoba ǃoaba ǂgao tama nî is tsî ǃaob âsa Babilons gao-aob ǃnaob ǃnaka mā ǂgao tama nî is, ǁnā ǁaes ǂama ta ge tita, tib ra ǃKhūba mî, ôaǃnâsa nîra dī gôab ǀkha tsî ǃâtsūǀkhāb ǀkha tsî ǂhīǁōb ǀkha, ǁîna ta nî hîkākās kōse ǃomǁaeb âba xu.
9 “Î du ǁnâi sado tā ǃgâ sadu di kēbo-aoga tsî sadu aimûǀgaru-aoga tsî sadu ǁhapo-aoga tsî sadu ǃgai-aogu, sadu ǃoa ra ǃhoa tsî: Sadu ge Babilons gao-aoba ǃoaba tide ti ra mî ga.
10 “ǁÎgu sado ǂkhabase ra kēboba xui-ao, ǃnūse gu nî sadu ǃhūba xu ūbē duse, tsî tita nî ǂhāǂui duse, kā du nîga.
11 “Xawe ǁnā ǁaes, ǃaob âsa Babilons gao-aob di ǃnaob ǃnaka ǃgamǃgam tsî ga ǁîba ǃoabas, ǁîsa ta ge tita ǁîs di ǃhūb ǃnâ nîra hâ kai, tsîn ge ǁîb ǃnâ nîra sîsen tsî ǁîb ǃnâ nîra ǁan”
tib ge ǃKhūba ra mî.12 ǁNās khaoǃgâ ta ge Sedekiab Judab gao-aob ǃoa nē mîde ǃoa ǃhoa tsî ge mî: Ūhā sadu ǃaoga Babilons gao-aob ǃnaob ǃnaka, î du ǁîb tsî ǁîb ǁaesa ǃoaba, o du ge nîra ûi.
13 Tarexa du kha ǁnâi nî ǁō, sats tsî sa ǁaes tsîdo, gôaba xu tsî ǃâtsūǀkhāba xu tsî ǂhīǁōba xu? ǃKhūb ge ǃhoa xase, ǁnā ǁaes, hîa Babilons gao-aoba ǃoaba tides xa.
14 “ǁNâi tā ǃgâ ǁnā mîdi kēbo-aogu sado ǃoa ra ǃhoagu dide, mî raǃâ: Sadu ge Babilons gao-aoba ǃoaba tide ti, ǁîgu ǂkhabase ra kēboba du xui-ao.
15 “Tita ǁîga sî tama xuige,”
tib ge ǃKhūba ra mî.Tsî gu ge ti ǀons ǃnâ ǂkhabase ra kēbo, tita sado nî ǂhāǂuiga, tsî sadu nî kāse, sadu tsî ǁnā kēbo-aogu sado ra kēboba gu tsîdo.
16 ǁKhāti ta ge pristergu tsî nē ǁaes hoas ǃoa ǃhoa tsî ge mî: Nētib ra ǃKhūba mî: Tā ǃgâ ǁnā kēbo-aogu, sado ra kēboba gu di mîde, mî rase: Mû, xapan ǃKhūb ommi din ge nēsi ǃhaese Babilonsa xu ǁkhawa nîra ūhāhe. ǁÎgu ǂkhabase ra kēboba du xui-ao.
17 Tā ǁîna ǃgâ, î du Babilons gao-aoba ǃoaba, o du ge nîra ûi. Tarexas kha ǁnâi nē ǃāsa nî ǃū-aisa ǃā kai?
18 Tsî kēbo-aogu ka io tsî ǃKhūb mîs ga ǁîgu ǀkha hâo, a gu ǁnâi nēsi ǃKhūb Hoaǀgaixab ǃoa ǀgore, în ǁnā xapan, ǃKhūb ommi ǃnâ tsî Judab gao-aob ommi ǃnâ tsî Jerusalems tawa ge ǃgauna, tā ǁkhāti Babilons tawa sī, ti.
19 Nētib ra ǃKhūb Hoaǀgaixaba mî xui-ao, ǂkhâǃnâhaigu xa tsî hurib xa tsî ǂnûi-aiǃkhaidi xa tsî nau soadi, nē ǃās ǃnâ ge ǃgaudi tsîn xa, 20 Nebukadnesari Babilons gao-aob ūbē tamadi, Jexonjab, Jojakimmi ôab, Judab gao-aobab ge Jerusalemsa xu Babilons ǃoa ǃkhōsase ūǃgû ǃnubai, ǀgapiǃgôasagu Judab tsî Jerusalems tsîra digu ǀkha.
21 Ā, nētib ra ǃKhūb Hoaǀgaixab, Israeli Eloba mî, ǁnā xapadi, ǃKhūb ommi ǃnâ hâdi xa, tsî Judab gao-aob ommi ǃnâ tsî Jerusalems tawa ge ǃgaudi xa:
22 ǁÎdi ge Babilons ǃoa nîra ūsīhe, tsî di ge ǁnāpa nîra hâ, ǁnā tsēs tita ǁîna ǁîs ai nîra ôaǃnâs kōse,
tib ge ǃKhūba ra mî.ǃNubai ta ge tita ǁîna nîra ǂgaeǂguiǃapa tsî ǁîna nē ǃās ǁkhās ǃoa ǁkhawa nîra ūhā.
© Khoekhoegowab Elobmîs © Bible Society in Namibia, 2020.
