Hakaǁî ais: ǀGapipristeri ai-i kēbo-aob ge ǁgauhe-i
1 ǁNās khaoǃgâb ge ǀgapipristeri Josuaba ǃKhūb di ǀhomǃgāb aiǃâb mâse ge ǁgau te. Satanni ge Josuab di amǀkhāb ai ge mâ i, ǁîba nî ǀhapimāse. 2 Ob ge ǃKhūba Satanni ǃoa ge mî: “Ab ǃKhūba ǀau tsi, ǀhapimā-aotse! Ab ǃKhūb, Jerusalemsa ge ǁhûiǂuibasenna ǀau tsi. Nēba kha ǀaesa xu tsubuǂuihe hâ ǀae-am tamaba?”
3 Josuab ge ǀurisa sarana ǂgaeǂgā hâse ǀhomǃgāb aiǃâ ge mâ i. 4 Ob ge ǃeream tsî ǁnān ǁîb aiǃâ mân ǃoa ge mî: “Nē ǀurisa sarana ǂgaeǂuiǀkhā bi!” tsîb ge ǁîb ǃoa “Sa dīsasa ta ge satsa xu go ūbē tsî ta ge anaǂamsaraga nî ǂgaeǂgā tsi” ti ge mî.
5 Tsî ta ge “An ǃanu ǃkhaiba ǀgapa bi” ti ge mî. On ge ǃanu ǃkhaiba ǀgapa tsî anaǂamsarana ge ǂgaeǂgā bi, ǃKhūb di ǀhomǃgāb mâ hîa.
6 ǁNās khaoǃgâb ge ǃKhūb di ǀhomǃgāba Josuaba ge mîba: 7 Nētib ge ǃKhūb Hoaǀgaixaba ra mî: “Ti daogu ǃnâts nî ǃgûs ka, tsîts nî ti ǂnûiǂgāde ǃkhōǀgaipes ka, ots ge ti omma gaoǂam tsî ti ai-omga nî ǃûi, o ta ge satsa nē mân ǁaegu ǃkhai-e nî mā. 8 Sats Josuats, ǀgapipristertsa ǃgâ re, sats tsî sa aiǃâ hâgo tsîgo. Sago hoago ge a ǃgâi ǃgoaxaǁaeb di ǁgauǁgau. O ta ge nēsi ti ǃgāb, ‘ǂGonaba’ ra hā kai. 9 Mû, ǁnā ǀuis Josuab aiǃâ ta ra ǂnûis ai di ge hû mûde hâ. ǁNāpa ta ge ǃgaoǂgāsa nî xoa tsî ta ge ǂhanuoǃnâsiba ǀgui tsēs ǃnâ ǃhūba xu nî ūbē, tib ge ǃKhūb Hoaǀgaixaba ra mî. 10 ǁNā tsēs ai i ge mâ-i hoa-e ǁî-i di ǁanǁare-ao-e nî ǁkhau, draibehais ǃnaka tsî ǀnomahais ǃnaka, tib ge ǃKhūb Hoaǀgaixaba ra mî.”
© Khoekhoegowab Elobmîs © Bible Society in Namibia, 2020.
