Aronni tsî ôasagu âba pristerse mâiǂgās ǁguiǂamdi
(Levitikus 8:1-36)1 ǃKhūb ge ǃaruǀî Moseb ǃoa ge mî: “Nēb ge Aronni tsî ôasagu âbats ga ti ǃoabas ǃnâ pristerse ǀnau ots nî dī ǀgauba. Tsâub tsî ǀgam ūo baikha ū. 2 ǂOaǂamsa, tsaura ǃhoromel-e xu ǃnonaǃnâgu khūkhū-e ūhâ tama pere-e kini. ǀNî pere-e ǀkhera-oli-i ose, ǀnî-e ǂhaba tsamperedi ǀkhera-oli-i ǀkha hâdi ǃnâ tsî ǀnî-i ǀkha ǂkhari tsampererodi, ǀkhera-oli-i ǀkha ǂkhausade. 3 ǁÎna ǀgui ǀharus ǃnâ ǂgā, î tsâub tsî baikha tsînats ga ǁguiba te ǁaeb ai ǁîna tita ǁguiba.
4 “Aronni tsî ǁîb di ôagu tsîna ǃKhūb di Tentommi ǂgâ-ams tawa hā-ū, î ǁîga ǁgam-i ǀkha ǁā. 5 ǁNās khaoǃgâ Aronna pristersi sarana ǂgaeǂgā: Anaǂamsarab, ǁîb ǀgapise ǃnubuǁôasarab, tsî ǁîb ai efoda, efodi ǀgapise ǁkhaisarasa tsî ǁnāpa xu kamanaǃgaesenna.Efodi, ǁkhaisaras ǀkha 6 ǃKhaiǀgapas, khaihe hâ ǃhuniǀuriǁharesa ǃgae-aihe hâsa ǁîba ǀgapa. 7 ǁNās khaoǃgâ ǀnau-ū oli-e ū, î ǁîb di danas ai ǂnâ tsî pristerse mâiǂgā bi.
8 “Aronni ôaga ǃKhūb di Tentommi ǂgâ-ams tawa hā-ū, î ǁîga anaǂamsaraga ǂgaeǂgā. 9 ǁÎgu kamanagu ai kamanaǃgaesenga ǃgae, î ǁîga ǃkhaiǀgapade ǀgapa. ǁÎgu tsî ǁîgu surib tsîn ge tita hoaǁae pristerse nî ǃoaba. Nēs ge Aronni tsî ôasagu tsîgats nî mâiǂgā ǀgausa.
10 “ǁNās khaoǃgâ tsâuba ǃKhūb di Tentommi aisǀkhāb ai hā-ū, î gu Aronni tsî ǁîb di ôagu tsîga ǁîgu ǃomga tsâub di danas ai ǁgui. 11 Tsî ǃKhūb di mûǁae tsâuba ǃKhūb di Tentommi ǂgâ-ams tawa ǂā. 12 ǀNî ǀaob tsâub dib ǃnâ ǀkhunuba ǀhari, î haka ǁnâgu altars ǁhôadi ai mâgu ai ǂkhau. ǃGau ra ǀaoba altars di ǃgaob ai ǁhōǂui. 13 ǁNās khaoǃgâ ǀhaub hîa ǃnāxūn, ǃnakab ǃâb âis dib tsî ǃnaira tsî ǁîra ai hâ kauba ǃgū-ai hâba ū, î altars ai khauǁguibas ase tita ǁguiba. 14 Xawe tsâub di ǁgan-i, khōb tsî ǃnāxūn tsîna Tentommi di ǃaugab ai khausa ǀaes ǃnâ ǂhubiǂui. Nēs ge a ǁoreǀûbas di ǁguiba.
15 “Baikha di ǀguiba ū, î gu Aronni tsî ǁîb di ôagu tsîga baib di danas ai ǁîgu ǃomga ǁgui. 16 ǁÎba ǃgam, î altars di ǂnamipe ǀaob âba ǁhō. 17 Baib di ǁgan-e ǃâdi ǃnâ ǃgaoǃā, ǃnāxūn tsî ǃūgu tsîna ǃanuǃanu, î ǁîb danas tsî ǃâdi tsîn ǀgapise ǂnûi. 18 ǁNās khaoǃgâ hoaraga baiba altars ai ǂhubi. Nēs ge khauǁguibas, ǃgâi ǁamaba ūhâs tita ǃgâibas ase īsa.
19 “Nau baiba ū, î gu Aronni tsî ǁîb di ôagu tsîga baib di danas ai ǁîgu ǃomga ǁgui. 20 ǁÎba ǃgam î ǀnî ǀaob baib diba ū, î Aronni tsî ǁîb ôagu di amǀkhāb ǂgaeǂaodi, ǁîgu amǀkhāb ǃomgu di kai ǀkhunudi tsî ǁîgu amǀkhāb ǂaidi di kai ǀkhunudi tsîna ǂkhau. ǃGau ra ǀaoba altars di ǂnamipe ǁhōǂui. 21 ǀNî ǀaob tsî ǀnau-ūs oli-i altars ai mâna ū, î ǁîna haba. ǁÎ-e Aronni tsî ǁîb di ôagu ai tsî ǁîgu saran ai ǀgapi. Nēs ǀkhan ge Aronni, ǁîb di ôagu tsî sarana tita ǃaroma nî khaihe.
22 “Aronni tsî ǁîb di ôagu di ǀnauǂgās ǃaroma, baib di kaub hoab, ǂarekaus, hoaraga ǃnāxūna ǃgū-ai hâ ǀhaub, âis di ǂhâǂhâsa ǃâs ai hâ kaub, ǃnaira ai hâ kaub tsî amǀkhāb tîs ai hâ kaub tsîna ǃgaobē. 23 ǃKhūb ge ǁguibahe khūkhū-e ūhâ tama pere-i di ǀharusa xu ǀgui peres ǀkhera-oli-i ǀkha hâs, ǀguis ǀkhera-oli-i ose hâs tsî ǀgui ǂkhari tsampereros tsîna ū. 24 Nē ǂûn hoana Aronni tsî ǁîb di ôagu tsîna mā, î gu ǀō-aisa gongonǁguibas ase tita khaiba. 25 ǁÎna ǁîgu di ǃomga xu ū, î altars ai, khauǁguibas di ǀgapise ǂûǁguibas ase ǂhubi. Nē ǁguibas ǃgâi ǁamab ge tita a ǃgâiba.
26 “Aronni ǀnauǂgās ǃaroma ra sîsenūhe baib di ǁkhaiba ū, î ǀō-aisa gongonǁguibas ase ǃKhūba khaiba. Nē ǃâs baib dis ge nî sa kai.
27 “Pristergu ga ǀnauǂgāhe, o ǀō-aisa ǀgam ǃâra baib di ǁgan-i dira, ǁkhaib tsî tîs tsîra mâiǂgās ǃaroma ra sîsenūhera ge tita ǃaroma ǀō-aisa māra ase ǁguibahe tsî pristergu ǃaroma nî khaihe. ǁKhaiba Aronni ǃaroma tsî tîsa ǁîb di ôagu ǃaroma. 28 Nēb ge Aronni tsî ǁîb di ôagu ǃaroma hâhâ nîse ī ǁgaraba, Israelǁîn ga ǁguibasa mā, on baib di ǁkhaib tsî tîb tsîna pristergu ǃaroma nî ǁguiba ǃkhaisa. Nēs ge khoen di ǁguibas ǃKhūb ǃoa hâsa.
29 “Aronni ga ǁō, o ǁîb di pristersi sarana ǁîb di surib hîa ǁîba pristerse nî saoǃgonna mā, î gu pristerse gu ga ǀnauhe, o ǂgaeǂgā. 30 Aronni di ôab ǁîba pristerse ra saoǃgonni tsî ǃKhūb di Tentommi ǃnâ ǂgâ tsî tita ǃAnu ǃKhaib ǃnâ nî ǃoabab ge hû tsēdi ǀgaiba nē pristersi sarana nî ǂgaeǂgā.
31 “Aronni tsî ǁîb ôagu di ǀnauǂgās ǃaroma gere sîsenūhe baib di ǁgan-e ǃanu ǃkhai-i ai sâi. 32 Aronni tsî ǁîb di ôagu tsîgu ge ǃKhūb di Tentommi ǂgâ-ams tawa nē sâisa ǁgan-i ǀharus ǃnâ ga ǃgau-e ǃnonaǃnâgu pereǃnôan ǀkha nî ǂû. 33 ǁÎgu ge ǁnā ǁguibadi, ǁîdi ǃnâ-u gu ǃKhūb ǀkha ra ǂkhîbagusa ǁîgu ǀnauǂgās tsēs ai dīde nî ǂû. Pristergu ǀguigu ge nē ǁguibade nî ǂû, tsî ǀnî khoe-i ose, ǁîdi a ǃanu xui-ao. 34 Nē ǁguibadi hapuhe tama hîa i ga ǁgoa, o di ge ǀaes ǃnâ ǂhubiǂuihe tsî ǂûhe tide, ǁîdi a ǃanu xui-ao.
35 “Tita ge mîmā tsi khami Aronni tsî ǁîb di ôagu di ǀnauǂgās ǁāxasiba hû tsēdi ǀguide ūhâ. 36 Mâ tsēs hoasa ǂkhîbagus ǃaroma tsâuba ǁoreǁguibas ase ǁguiba, îs altars tsîna ǃanuǃanuhe. ǁNās xōǀkhā ǀō-aisa ǀkhera-oli-e ū, î altarsa ǁî-i ǀkha ǀnau. 37 Nēsa mâ tsēs hoasa ǂkhîbagus ase hû tsēdi ǀgaiba dī. Os ge altarsa hoaragase nî ǃanu tsî mâ khoe-i tamas ka io xū-i ǁîs ai ga tsâǀkhā-i hoa-i ge nî ǃanu.
Tsēkorobe ǁguibadi
(Numeri 28:1-8)38 “Hoaǁae, mâ tsēs hoasa ǀgam, ǀgui kurixa ǁkhaokha altars ai ǁguiba. 39 ǀGui ǁkhaoba ǁgoaga tsî nauba ǃoes ǃnâ ǁguiba. 40 ǂGuro ǁkhaob ǀkha ǀgui kiloxram tsaura ǃhoromel-i, ǀkhera-oli-i ǀgui-i ǀkha habahe hâ-e ǁguiba. ǀGui literi di ǂauxûi-e ǁguibas ase ǂnâǂui. 41 ǀGamǁî ǁkhaoba ǃoes ǃnâ ǁgoagas khami ǁkhā ǀnōb di ǃhoromel-i, ǀkhera-oli-i tsî ǂauxûi-i tsîn ǀkha ǁguiba. Nēs ge khauǁguibas tsî āǁguibas tsîra, tita ǃKhūta ǃgâi ǁamaba ūhâba hâra. 42 ǃGoaxa surigu ǃaroma nēs ge khauǁguibas ǃKhūb di mûǁae tsēkorobe ǃKhūb di Tentommi ǂgâ-ams tawa nî ǁguibahesa. Nēpas ge ti khoena ǀhao-ū tsî ta ǁîn ǀkha nî ǃhoasa. 43 ǁNāpa ta ge Israelǁîna nî ǀhao-ū tsî ti ǀgaib di ǂkhaisib ge ǁnā ǃkhaiba nî ǃanuǃanu. 44 Tita ge ǃKhūb di Tentommi tsî altars tsîna nî ǃanuǃanu, tsî ta ge Aronni tsî ǁîb di ôagu tsîga ti ǃoabas ǃaroma pristerse nî khai. 45 Tita ge Israelǁîn ǁaegu ǁan tsî nî ǁîn di Elo kai. 46 Tsîn ge ǁîna tita ǃKhūta ǁîn di Elota ǁîna Egipteba xu ge ǂgaeǂguiǂui ta ase nî ǂan, ǁîn di ǁaegu ta nî ǁan ǁkhāse. Tita ge ǃKhūta ǁîn di Elota.
© Khoekhoegowab Elobmîs © Bible Society in Namibia, 2020.
