Mateub 18 - Khoekhoegowab New Translation 2020 (KKG20)

Tari-e hoan xa a kai?

1 ǃNubu ǁae-i khaoǃgâ gu ge ǁkhāǁkhāsabega* Jesub ǃoa hā tsî “Tari-e Gaosib ǀHommi dib ǃnâ a kai?” ti ge dî.

2 Ob ge Jesuba ǀgôaro-e ǂgaihā tsî ǁîgu hoagu nî mûse ge mâ kai. 3 Tsîb ge ge mî: “Amase ta ra mîba go, ûib tsî ǀgaub âgo go ga dī-unu tama i tsî ǀgôaro-i khami ī tama i, o go ge Gaosib ǀHommi diba nî ǂoaǃnâ. 4 Nē ǀgôaro-i khami ǃgamǃgamsen hâ khoe-i ǀgui-i ge Gaosib ǀHommi dib ǃnâ a kai. 5 Tsî mâ-i hoa-i hîa ti ǀons ǃnâ nēti ī ǀgôaro-e ra ǃkhōǃoa-i ge tita ra ǃkhōǃoa-e.

ǁOreb ǃoa hâ ǃâitsâgu

(Markub 9:42-48Lukab 17:1-2)

6 “Xawe nē ǂkhariron hîa tita ǃnâ ǂgom hân di ǀgui-e ga a ǁoreb ǃnâ ǂgaeǂhapu-i, ge ǃgom ǁkhamiǀuisa ǁî-i ǃaos ai ǃgaehe hâse ǃgamsib hurib dib ǃnâ aoǂgāhesa anu hâ. 7 ǃHūbaib ǃnân ge ǀnai ǂgui xūna hâ khoe-e ra ǂgaeǂhapu tsî ǁoreb ǃnâ ǁnā kaina. Nēn ge hoaǁae hâ ǂgaeǂhapu-aina, xawe tsūba ǁnā khoe-e ǁî-i ǃaroma i nau-e ǁoreb ǃnâ ra ǁnā-e!

8 “Tsî sa ǃommi ga ǁoreb ǃoa ǂgaeǂhapu tsio ǁhāǁnâ bi! ǃGâi-i kom ao, ǀgui ǃommi ǀkha ûisa, ǀgam ǃomkha ūhâ tsîts nî ǀamoǀaeb, khauǀû tamab ǃnâ aoǂgāhes xa. 9 Tsîs ga sa mûsa ǁoreb ǃoa ǂgaeǂhapu tsio, ǁhoroǂui î aoxū! ǃGâi nî ǃkhais ge Elob Gaosib ǃnâ ǀgui mûs ǀkha ǂgâsa, xawe i ge kaise a ǃhauǃhausa ǀgam mûra ūhâ tsîts nî ǀamoǀaeb ǃnâ aoǂgāhesa.

Kā hâ gūs di ǂkhōs*

(Lukab 15:3-7)

10 “ǂAnbasen, î tā ǀgui-i nē ǂkhariron di-e ǃharaxū. Tsî mîba go ta ra, ǁîna ra ǃûi ǀhomǃgāgu hoaǁae ti Îb ǀhommi ǃnâ hâb xa mâxōǀkhāhe hâsa. [11 Khoen Ôab ge ge hā, kā hânab nî orese.]

12 “ǃÛi-aob ga ǀguikaidisi gūna ūhâ tsî ǀgui-i xa a kāhe, o tare xū-eb ra dī? ǁÎb kom nau khoesedisikhoeseǀana ǃû rase ǁnāxū tsî ǃnâugu ai ǂoa tsî kā hâ ǀguisa ra ôao. 13 Tsîb ga hō si, ob ge amase ra mîba go, nau khoesedisikhoeseǀadi ǃgâ-aib nē ǀguis ǃaroma kaise ra ǃgâiaǂgao ǃkhaisa. 14 ǁKhā ǀgaub aib ge sago Îb ǀhommi ǃnâ hâba mā-am tide nē ǂkhariron di ǀgui-i tsîn nî kāǁō ǃkhaisa.

Khoe-i ga ǁoreo

15 “Sa horesa ǂgomsabe-i ga [sa ǃoagu] dīsāo, ǁî-iǀî ǃgû, î ǂganǃgâsib ǃnâ hâ a ǃgomsiba sī ǃhoaǂui. Tsî ǁî-i ga ǁnâuǃā tsî a ǁguiǁnâ, os ge hōgusa a īǁkhā. 16 Xawe i ga ǁnâuǃā ǂgao tama i, o ǀgui tamas ka io ǀgam ǀkhara khoena ūsao, î ǁî-e ǃoa ǁkhawa oa, în Xoas ra mî khami ǀgam tamas ka io ǃnona khoena ǀhûǀgui, mâ mîs hoas hîa nî gowahesa. 17 ǁNā khoe-i ga ǃaruǀîǀgui ǁnâuǃāoǃnâo, sa ǁhōba kerkheb aiǃâ sī-ū. Tsî-i ga ǀunis kōse a ǁnâuǃāoǃnâ, o ǁî-e ǀūbe-i tamas ka io ǀhôagao ǁgui-aimariǃkhōǃoa-ao-i* ase ǃgapaǀî.

ǂKhās tsî mā-ams

18 “Amase ta ra mîba go: ǃHūbaib aits ga ǂganamǂui-i hoa-i ge ǀhommi tsîn ǃnâ nî ǂganamǂuihe tsî ǃhūbaib aits ga ǁkhowa-amba-i hoa-i ge ǀhommi tsîn ǃnâ nî ǁkhowa-ambahe.

19 “Tsî ǃaruǀî ta ra mîba go, sago di ǀgamkha ga nē ǃhūbaib ai mâ xū-i ǀgui-i ai a ǁnâuǃāgu, ob ge ti Îb ǀhommi ǃnâ hâba ǁnāsa nî īǁkhā kai. 20 ǁNā-amaga ǀgam tsî ǃnonan ga ti ǀons ǃnâ a ǀhaopa, ǁnāpa ta ge tita ǁîn ǀkha nî hâ.”

ǀÛbaoǃnâ ǃgāb di ǂkhōs

21 Tsîb ge Petruba Jesub ǃoa hā tsî ge dî: “ǃKhūtse, ti ǃgâsa-i ga ti ǃoagu ǀû tamase ǁoreo, mâtikō ǃnāde ta nî ǀûba? Hû ǃnāde?”

22 Ob ge Jesuba ge ǃeream: “Hî-î, hû ǃnādi ose, xawe hûdisi ǃnādi di hû ǃnāde. 23 ǁNā-amagab ge Gaosib ǀHommi diba ǁnā gao-aob, ǃgāga ǃereamde ra ǂgaoǀkhāb ǀkha a ǀgopeǀnōhe ǁkhā. 24 Nē ôaǃnâs ǃnâ i ge ra ǃgāsa, nē ǃgāgu di ǀguib kaise ǂgui miljundi di marisa surude bi hâsa. 25 Xaweb ge nē ǃgāba marisa ge mā-oa ǁoa, ob ge gao-aoba ge mîmā, îb nē ǃgāb ǂûb, ǁîb taras tsî ǀgôan tsî ǁkhāti ūb hâ xūn hoana ǁamaxūhe tsî ǁnāpa xu nē surudeba matarehe ti. 26 Ob ge nē ǃgāba gao-aob aiǃâ ǁnāǁgoe tsî ge ǀkhoma bi: ‘Toxopa, ǃnūǃnâxaba te re, hoaraga marisa ta nî mā-oa tsi xuige!’ 27 Ob ge ǀhonkhoeba kaise ǀkhom bi tsî ǁnāxū bi tsî hoaraga surudeba ge ǀûba bi.

28 “Xaweb ge nē khoeba gao-aoba xub ge ǃgû, o ǀhûǃoaba-aob hîa ǀguikaidisi denarde* surude bi hâb tawa ge sī. ǁÎb ge nē horesaba ǃkhō, ǃkhōdom tsî ge mî: ‘Nēsi ti mari-i surude tets hâ-e mā-oa te!’ 29 Ob ge nē ǀhûǃoaba-aoba ǁîb aiǃâ ǁnāǁgoe tsî ge ǀkhoma: ‘Toxopa, ǃnūǃnâxaroba te re, mā-oa tsi ta nî xuige!’ 30 Xaweb ge ǁîba ǀkhom bi tama i tsî ǃkhō-oms ǃnâ ge aoǂgā kai bi, ǀunib surude hâ marisab nî mā-oas kōse. 31 Tsî ǀnî ǀhûǃoaba-aogu ge tare-i ge īsa a mû, o gu ge kaise ge ǁgonǁgonǃnâhe. O gu ge ǁîga ǀhonkhoeb ǃoa ǃgû tsî nē ǃkhaisa sī ge ǂhôa bi. 32 Ob ge ǀhonkhoeba nē khoeb hîab ge ǀûba hâ iba ǂgai tsî ge mî: ‘Sa ǂkhaba tsî xū tama ǃgātse! Satsa ta kom ǀkhoma tets ge ǃkhais ǃaroma hoaraga kai maris hîats surude te hâsa ge ǀûbao. 33 Tare xū-i ǃaromats tita ge ǀkhomxa tsi khami sa ǀhûǃoaba-aoba go ǀkhomxa tama hâ i?’ 34 Ob ge nē ǀhonkhoeba kaise ǁaixa tsî nē khoeba ǃkhō-oms ǃnâ ge ǂganamǂgā kai, surudeb hâ maris hoasab nî matare-oas kōse.

35 “ǁNātib ge ti ǀhomsi ǁGûba nî dī, mâ-i hoa-i sago di-i hîa ǁî-i di ǃgâsa-e ǂgaob hoaba xu ǀûba ǂgao tama-i ǀkha.”