Jerusalems ǁoreb tsî orehes
1 Tsūba Jerusalems, ǁnā khâikhâisenxa tsî ǀuriǀurisen hâ ǃās, ǁîs di khoen ǂûna ra ǁgâiǀāsa. 2 ǁÎs ge ǃgâ ǂgao tama hâ, ǁîs ge ǂgōǀau kaisen tama hâ. ǁÎs ge ǃKhūb ai ǂgomaiǂnûi tama hâ, ǁîs Elob tawas ge ǀgū tama hâ. 3 ǁÎs di ǂamkhoegu ge ǃguru ra xamga, ǁîs ǂhanuǂhanu-aogu ge tsuxuǂhiragu, ǂkhō-i tsîna ǁgoas ǃaroma ǃgau tamaga. 4 ǁÎs kēbo-aogu ge ǃereamoǃnâ tsî ǀhôagao. ǁÎs pristergu ge ǃanusiba ra ǃanuoǃnâ kai tsî Elob ǂhanuba ǁîgu ǃgâib ǃoa ra unu. 5 ǃKhūb ǁîs ǃnâ hâb ge a ǂhanu-ai, ǁîb ge tsūdī tama hâ. Mâ ǁgoas hoasab ge ǁîb ǂhanu-aisiba ra ǁgau, ǀgui tsēs tsîna ǃkharu kai tamase, xawen ge ǂhanuoǃnâna taosa a ǀū.
6 “Tita ge ǁaede ge hîkākā, ǁîn di omǂnamisa ǃādi ge a khôaǂkhūsa. ǁÎn di ǃgangu ge a ǀkhaiǃnâ, khoe-i xare-i xa ǃgûǃnâhe tamase. ǁÎn ǃādi ge a hîkākāsa, ǀgui ǁanǂgāsabe-i tsîn ge ǁîdi ǃnâ ǃgau tama hâ. 7 Tita ge ge ǂâi titas nî ǃaoǃgâ tsîs tita xa nî ǂgōǀaukaisensa, os ǁanǃkhais âsa hîkākāhe tide tsîb ti ǁkharaba hāǂam si tidesa. Xawes ge ǃaruǀîǀgui ǂkhabadīgu âs ǃnâ ge ǀarosen.
8 “ǁNā-amaga tita ǃâu. ǃÂu ǁnā tsēs ǁîs ai ta khâi tsî ti ǁkhâuǁnâsa hā nî ūsa. Tita ge ǁaedi tsî gaosigu tsîna nî ǀhaoǀhao, ǁîn ai ta ti ǁaiba nî ǁhōǂuise, ǀoasa ǀgammi ti ǁaib diba. Hoaraga ǃhūbaib ge ti ǁaib di ǀaes xa nî hîkākāhe,”
tib ge ǃKhūba ra mî.9 “ǁNā ǃnubai ta ge ǁaedi amǁgauga nî ǃanuǃanu, în ǁîn hoana tita ǀgoreǀî tsî ǀguiǃnâxase ǃoaba. 10 Etiopiab ǃāgu nauǀkhāba xun ge ti ǀgaruǀgaruhe hâ ǁaes di khoena ǁguibade nî hā-ūba te. 11 ǁNā tsēs ais ge sasa dīgu âs ǀkhas ge tita ǃoagu mâǃoaxa ǃkhais ǂama taotaohe tide. Tita ge ǁnān ǁîn di ǂnīsasib ǃnâ gere koasenna sasa xu nî ūǂui, tsîs ge ǃaruǀî ti ǃanu ǃhommi ai ǀgapiǀgapisen tide. 12 Sas ǃnâ ta ge ǀkhomǀkhomsa tsî ǃgamǃgamsenxa khoena nî ǃgau. ǁÎn ge ǃKhūb ai nî ǂgomaiǂnûi. 13 ǃGau gen Israels din ge tsūdī tama i, ǂhumi tama i tsî gāxaǃnâs tsîna hî tide. ǁÎn ge gūn khami sâsase ǂû tsî nî ǁgoe tsî khoe-i xare-i xa ǃhuriǃhurihe tide.”
Dâb di ǁnaetsanas
14 ǁNae re Sionni ôase, dâ re Israelse.
Dâ re sa ǂgaob hoab ǀkha Jerusalemse.
15 ǃKhūb ge sa ǁkharaba go ǀamǀam;
ǁîb ge sa khākhoena go ūbē.
Israels di Gao-aob, ǃKhūb ge sas ǀkha hâ;
ǃaruǀîs ge tsū-i xare-e ǃao tide.
16 ǁNā tsēs ain ge Jerusalems ǃoa nî mî:
“Tā ǃao re Sionse,
A kha ǃomkha âsa tā ǂkhabu re.
17 ǃKhūb sa Elob ge sas ǀkha hâ;
ǁîb, huiǂui ra ǁē-aoba.
ǁÎb ge sas ǂama nî ǃgâiaǂgao
tsî ǁîb di ǀnammi ǃnâ sasa nî ǀasaǀasa.
ǁÎb ge sas ǂama dâxase nî ǁnae,
18 ǁâudīb di tsēs ais khami.”
Nētib ge ǃKhūba ra mî:
“Tita ge hîkākāhes di ǃaoba go ǀamǀam
tsî ǃharaxūba sado xu go ūbē.
19 ǁNā ǁaeb ai ta ge sa ǁgâiǀā-aona nî ǁkhara.
Tita ge ǃhorana hui
tsî doeǁgābēhe hâna ni ǀhaoǀhao.
Tita ge ǁîn taosiba ǃgôasib ǃnâ nî ǀkharaǀkhara,
tsîb ge hoaraga ǃhūbaiba ǁîna nî koa.
20 ǁNā ǁaeb ai ta ge tita sado nî oaǀkhī-ū.
Tita ge nî dī,
hoaraga ǃhūbaib ǃnâ ǂansa tsî du nî koahesa
tsî ta ge ǁkhawa nî ǃgâiǃgâxa kai du,”
tib ge ǃKhūba ra mî.© Khoekhoegowab Elobmîs © Bible Society in Namibia, 2020.
