Eloǃoabas ge ǁkhawa ra tsoatsoa
1 Hûǁî ǁkhâb ge hā, ǁaeb ain ge Israelǁîn hoana ǀnai ǁîn di ǃādi ǃnâ ge ǁan hâ i. Tsîn ge ǁîn hoana ǀguiǂâixase Jerusalems ǃnâ ge ǀhao. 2 Ob ge Josadaki ôab Jesuab, ǁîb ǃgâsapristergu tsî Sealtieli ôab Serubabeli tsî ǁîgu di ǀaokhoen tsîna Israeli di Elob di altarsa ge ǂnubikhâi, ǁîs ain khauǁguibade nî ǁguibase, Elob aob Moseb di ǂhanub ǃnâ i a xoamâisa khami. 3 ǃHūb ǃnâ ge ǁan hâ i khoen xan gere ǃao, xawen ge oaǀkhī ge ǃhūsabena altarsa ǀnais ge mâ i ǃkhais ai ǁkhawa ge ǂnubikhâi. Tsîn ge ǁnās khaoǃgâ ǁîs ai ǁgoakhauǁguibadi tsî ǃuikhauǁguibadi tsîna ǃKhūba ge ǁguibatsoatsoa. 4 ǁÎn ge ǁHaodi ǁÂudība xoaǁguigu ǃoa tsēdī tsî mâ tsēs hoasa, tsēs ai nî dīhese xoaǁguisa ǁguibade gere ǁguiba. 5 ǁNās xōǀkhān ge ǁnaetisa khauǁguibadi tsî ǀAsa ǁKhâb Kaitsēs tsî mîǁguisa ǀgoreǀîtsēdi ai ǃKhūba ra hā-ūbahe ǁguibadi tsî māsenxase ra hā-ūhe ǁguibadi tsîna gere ǁguiba. 6 Noxopan ge Tempela ǂnubitsoatsoa tama hâ i, xawen ge ǁîna ǂguro tsēs hûǁî ǁkhâb dis ai khauǁguibade ǃKhūba ge ǁguibatsoatsoa.
Tempeli ge ra ǂnubitsoatsoahe
7 Khoen ge ǀuiǁhā-aogu tsî ǃnaokuru-aogu tsîgu nî matarehega mari-e ge mā, tsî ǂûn tsî āxūn tsî ǀkhera-oli-i tsîna Tirus tsî Sidons ǁga ge sî, Libanonni sederhain, hurib ai Jopasa ǃoa nî hā-ūhen ǃaroma. Nē xūn hoan ge Persiab gao-aob Koresi mā-ams ǀkha ge ī. 8 Tsîn ge ǀgamǁî kurib di ǀgamǁî ǁkhâb, ǁîn ge Tempeli tawa Jerusalems ǃnâ oaǀkhīs dib ǃnâ sîsenni ǀkha ge tsoatsoa. Serubabeli, Jesuab tsî nau aogu ǁaes digu, pristergu, Leviǁîgu tsî ǃhūsisa xu ge Jerusalems ǁga oaǀkhī khoen tsîn hoan ge sîsenna gere dīǀhao. Hoaraga Leviǁîgu ǀgamdisis xa ǃnāsa kuriga ūhâgu ge Tempela ǂnubikhâis di sîsenna gere mûǂam. 9 Leviǁîb Jesuab tsî ǁîb ôagu tsî ǀaokhoegu, Kadmieli tsî ǁîb ôagu (Hodaviab ǃhaoǃnās digu) tsîgu ge Tempela ǂnubikhâis di sîsenna mûǂams ǃnâ gere huiǀhao. (ǁÎgu ge Henadadi ǃhaoǃnās di Leviǁîgu xa gere huihe.)
10 Omaogu ge Tempeli di ǃgaoǃgaoba a ǁgui, o gu ge pristerga ǁîgu saraga ana tsî xâiǁnâde ǃomǁae ūhâse ǁîgu ǃkhaidi ai ge mâ i, tsî Asafi ǃhaoǃnās di Leviǁîgu ge simbaldi ǀkha ge mâ i. Tsî gu ge hoaga gao-aob Davidi ǁaeba xu hâ ǂnûiǂgāde ǃoa ǃKhūba gere koa. 11 ǁÎgu ge ǃKhūba sao rase gere koaǁnaeba:
“ǃKhūb ge a ǃgâi tsî Israela ǀamos kōse a ǀnam.” Tempeli tawa hâ hoaraga khoen ge ǃKhūb di koasa dâxase ge ǂgaiǂui, Tempeli ǃgaoǃgaob di sîsenni ge tsoatsoa ǃkhais ǃaroma. 12 ǂGui kaira pristergu, Leviǁîgu tsî ǃhaoǃnādi di danakhoegu ǂguro Tempela ge mû hâ igu ge nē Tempeli di ǃgaoǃgaob ra ǁguihe ǀgausa gu mâ ra mû hîa gere ā. Xawe nau khoen ge dâxase gere ǃau. 13 Khoe-i xare-i ge dâb di ǃaub tsî āb tsîn ǁaegu ge ǀgora ǁoa i, ǁîn di ǂkhupib ge ǃnūseb kōse gere ǁnâusen xui-ao.
© Khoekhoegowab Elobmîs © Bible Society in Namibia, 2020.
