1 Paulub, Elob di ǂâisa xu a Xristub Jesub di aposteli* tsî sada ǃgâsab Timoteub tsîkha xu.
Elob di kerkheb Korintes ǃnâ hâb tsî Axajab ǃnâ hâ ǂgomsaben Elob din ǃoa.
2 Ab Elob sada ǁGûb tsî ǃKhūb Jesub Xristuba ǀkhommi tsî ǂkhîba mā du.
Paulub ge Eloba ra gangan
3 Ab Elob tsî ǁGûb sada ǃKhūb Jesub Xristub diba koahe, ǁGûb ǀkhomxaǂgaosigu dib, Elob hoa ǂgaoǂgaoǃnâs dib, 4 sige ǃgomsigu hoagu ǃnâ ra ǂgaoǂgaoǃnâba. ǁNā-amaga ge ge ǁkhāti ǁnān mâ ǃgomsi-i hoa-i ǃnâ hâna a ǂgaoǂgaoǃnâ ǁkhā. ǁÎna ge ge ǁkhā ǂgaoǂgaoǃnâs Elob ge ǂgaoǂgaoǃnâ-ū ges ǀkha a ǂgaoǂgaoǃnâ ǁkhā. 5 ǃNāǂamsase da Xristub di tsâgu ǃnâ ra amǃnâxas ǁkhās khami da ge ǁkhāti Xristuba xu ǃnāǂamsase Elob di ǁkhaeǂgaob ǃnâ ra amǃnâxa. 6 Sige ga ǃgomma tsâ, os ge ǁnāsa sadu di ǁkhaeǂgaob tsî ǃgâiǃōb ase ī. Xaweb ga Eloba sige ǁkhaeǂgao-o, ǁnās ge sadu ǁkhaeǂgaos asesa. Sadu nî ǃgommi sige ra tsâba mâǃkharu ǁkhāse. 7 Tsî sige ǃâubasens sadu ǃnâ ge ūhâs ge tātsē ǁnobeǁnobehe tide, tsâgu ǃnâ du ra amǃnâxas ǁkhās khami du ǁkhāti ǂgaoǂgaoǃnâs ǃnâ ra amǃnâxa ǃkhaisa ge a ǂan amaga.
8 ǃGâsago, ǂgao ge ra ǃkhais ge Asiab ǃnâ ge sige ǀkha ī ǃgomsigu xa go nî ǂansa. ǃGomsigu sige ai gere ǁguihe gu ge sige ǀgaib ǂamai ge hâ i, ûitsamase hâs di ǃâubasens tsîna xu ge ge ǃans kōse. 9 Xawe ge ge sige ǂûge ǃnâ ǀnaib ǁōb ǁkharaba sige ai gowaǂuisa khami ge tsâ, xawe nēs ge sige ǂûge ai ǂgomǃgâs ose ge Elob ǁō hâna ra ǂkhaiǂkhaib ǃnâ ge nî ǂgomǃgâsa ūhâgasa. 10 ǁÎb ge nētikō ǃaorosasigu ǁōb diga xu ge sâuǂui ge tsî ǃaruǀî nî sâu ge. Sige ge ǁîb ai ge ǃâubasen hâ i tsîb ge ǁîba ǃaruǀî nî sâu ge. 11 Elob ge ǂgui khoen di ǀgoredi ǃaroma ra ǀkhae ge tsîn ge ǂgui khoena Eloba sige ǃaroma nî gangan.
ǀKharaǀkharas Paulub ǀapeǁguigu ǃnâ
12 Nēs ai ge ge ra koasen: Sige ǂgaoǂans ge mâti ge nî ǂhauǃnâsib tsî amab ǀkha ǃhūbaib ai tsî ǃgōsase sadu tawa tanisen ǃkhaisa ra ǃkhō-am. Sige gere tanisen ǀgaub ge khoesi gā-aisi tama hâ, xawe Elob di ǀkhomma xu hâ. 13 Khomai tsî du a ǁnâuǃā ǁkhā xūn ǀguina ge ge ra xoaba du, tsî ta ge ǀoasase du nî ǁnâuǃā ǃkhaisa ra ǃâubasen. 14 Tsî ta ge nēsi du ǀoasase ǁnâuǃā tama, xawe du nî ǀoasase ǁnâuǃā ǃkhaisa ra ǃâubasen. O du ge sadu tsîna sige ǁkhāge khami sada ǃKhūb Jesub di Tsēs ai nî koasen.
15 Tsî nē ǂanǁapos ǀkha ta ge ǂgurosa ge ǀapeǁgui sadu tawa ta nî sī ǃkhaisa, ǀgamǃnâgu ǀkhaeba du nî ǃkhōǃoase. 16 Tita ge Masedoniab ǃoa garuse sado ra sari ǂgao tsî ǁkhawa Masedoniaba xu ta ga oao, sadu tawa nî hāse tsî sadu huib ǀkha Judeab ǃoa nî ǃkharuse. 17 Nē ǀapeǁguiba ta kha îganǀgēb ǀkha ge dī? Tsî khoesi ǀgaub ai ta kha ti ǀapede ra dī, tita nî “ā” tsî “hî-î” ti ǀgui ǁaeb ai mîse? 18 Xawe Elob a ǂgomǂgomsa ǃkhais ǁkhās khamis ge sige mîs sadu ǃoa hâsa, ǀgui ǁaeb ai “ā” tsî “hî-î” tama hâ. 19 Jesub Xristub, Elob Ôab hîa ge tita, Silvanub tsî Timoteub hâge sado gere aoǁnâbab ǃnâs ge “ā” tamas ka io “hî-îsa” ǀkhai, xawe Xristub ǃnâs ge hoaǁae “ās” ǀguisa hâ. 20 Xristub ǃnâ di ge hoa mîmâide dīǀoaǀoasa tsî di ǁîb ǃnâ a “ā.” ǁNā-amaga da ge “Amen” ti Elob ǂkhaisiba ǃoa Xristub ǃnâ-u ra mî. 21 Tsî Elob ge ǁnāb sige sadu ǀkha Xristub ǃnâ mâǁapo kai, sige ǀnau,* 22 ǀhonkhoesis di saosa sige ai ǂnûi tsî ge ǁîb di Gagaba ǁapoǁapos ase sige ǂgaogu ǃnâ māba.
23 Tsî ta ge Eloba ǃkhō-amaose ti ǀoms ǂama ra ǂgaiǀî, sado ta ǁkhara ǂgao tama hâ xui-ao ta ge Korintes ǃoa hā tama i ǃkhaisa. 24 Sadu ǂgomsa ge ge gaoǂam ǂgao tama hâ, xawe ge ge sadu ǀkha ra sîsenǀhao ǂgao, ǂgoms ǃnâ du nî mâǁapo tsî ǃgâiaǂgaose.
© Khoekhoegowab Elobmîs © Bible Society in Namibia, 2020.
